Спорт
Далиќ: Заслужуваме поголема почит од ФИФА

Селекторот на фудбалската репрезентација на Хрватска, Златко Далиќ, изненади со одлуката да не гласа во изборот за наградата на ФИФА. Селекторот откри зошто решил да го бојкотира изборо. Наградата за најдобар играч заврши кај Лионел Меси.
Далиќ одбил да гласа бидејќи смета дека во изборот биле застапени премалку хрватски репрезентативци. Тој образложи на што се темели неговото разочарување.
„Разочаран сум од односот на ФИФА кон хрватската репрезентација, верувам дека заслужуваме поголема почит од Светската фудбалска организација за резултатите што ги постигнавме во последните години. Ние сме единствената репрезентација која се најде меѓу четирите најдобри на светот на СП и во Лигата на нации.
Го шокиравме целиот свет со победата против најголемата светска репрезентација Бразил, а ние сме единствената селекција со два медали од последните две светски првенства, заедно со Французите. Ја победивме Франција во Париз, Данска во Копенхаген, ги исфрливме Бразил и Белгија од СП, на 23 натпревари по ЕП загубивме само два пати.
И покрај ова, погледнете ја листата од 14 кандидати за најдобар играч на светот – освен одличниот Модриќ, каде се Хрватите? Не би набројувал поединци од други земји бидејќи навистина имам голема почит кон секој играч и тренер, но немаше ли место за Матео Ковачиќ кој стана светски клупски шампион и одигра брилијантно на Светското првенство?
Немаше место за Гвардиол, кој според повеќето избори беше меѓу најдобрите 11 на Мундијалот и во Бундеслигата? Зарем Ливаковиќ не заслужи да биде меѓу петте кандидати за најдобар голман по се што направи на Мундијалот?
Меѓу петте предложени селектори кои многу ги ценам има и тројца селектори, но ниту еден не избори пласман на завршниот турнир од Лигата на нации и медал на Светското првенство. Со голема почит за успехот на Мароко и нивниот селектор, но Хрватска на два меча има нерешено и победа во борбата за бронзениот медал.
Да потсетиме, според бројките и впечатокот, Доминик заслужи да биде најдобар голман на Мундијалот, а Јошко најдобар млад играч на Мундијалот. Сето тоа го доживувам како недостаток на почит, што го доживеав и при изборот на термините на нашите натпревари, но и според критериумот на судење што го имавме за време на Светското првенство, особено во полуфиналниот натпревар.
Верувам дека нашата репрезентација со своите игри и со однесувањето на теренот и надвор од него заслужи поголема почит, истата почит што ја покажуваме кон противниците од натпревар во натпревар.
Ако англиските, бразилските, шпанските, германските или италијанските играчи и тренери постигнаа резултати како нас, ќе беа добро застапени на сите избори. Сакам повеќе почит за нас, за нашата репрезентација, за нашите играчи, па дури и за себе, бидејќи со два медали сме апсолутна светска сензација.
ФИФА треба повеќе да не промовира бидејќи покажавме дека една мала земја може да биде конкурентна на најголемите, што е најдобрата реклама за фудбалот во целиот свет.
Поради сето горенаведено решив годинава да не учествувам во изборот, но на сите победници од срце им честитам на заслужените награди, а особено на нашиот Лука на одличното четврто место, со фактот дека за мене тој е секогаш број еден“, изјави Далиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Реал Мадрид издвојува најмногу за плати од сите клубови во Европа

Реал Мадрид и во новата сезона 2025/2026 го потврдува статусот на клуб со највисоки плати во европскиот фудбал. Според податоците на специјализираните страници „Betideas“ и „Capology“, просечната годишна плата на играчите на „кралскиот клуб“ е 11,2 милиони евра.
Оваа бројка е дури за 60 проценти повисока од сумата што ја издвојуваат повеќето други европски гиганти. Интересно е што ова е сепак мало намалување во споредба со минатата сезона, кога просекот беше малку повеќе од 12 милиони евра.
Далеку зад Реал Мадрид е нивниот најголем ривал, Барселона, чии играчи заработуваат просечно 7,91 милиони евра годишно. Каталонците исто така забележаа пад, со оглед на тоа што минатата сезона просекот беше 8,5 милиони евра.
Третото место на рангирањето го зазема Манчестер сити со просечна плата од 7,43 милиони евра. Сепак, за разлика од шпанските гиганти, англискиот клуб ја зголеми својата сметка за плати за повеќе од еден милион евра во споредба со претходната сезона.
По водечкото трио следува Баерн Минхен со 7,38 милиони евра, потоа Пари Сен Жермен и Арсенал, кои издвојуваат околу 7 милиони евра за просечна плата.
Клубови со највисоки просечни бруто плати во светот
1. Реал Мадрид – 11,2 милиони евра
2. Барселона – 7,9 милиони евра
3. Манчестер Сити – 7,43 милиони евра
4. Баерн Минхен – 7,38 милиони евра
5. ПСЖ и Арсенал – 7 милиони евра
6. Ливерпул и Манчестер Јунајтед – 6 милиони евра
7. Челзи и Тотенхем – 4,5 милиони евра
Foto/ EPA/J.L. Cereijido
Спорт
Нико Ковач го продолжи договорот со Дортмунд

Тренерот на Борусија Дортмунд, Нико Ковач, го продолжи договорот со „милионерите“ до јуни 2027 година, објави германскиот клуб.
„Нико целосно се посвети на својата улога во Дортмунд. Тој многу добро го познава фудбалот, има јасни принципи, е искрен и директен во комуникацијата и наградува добра работа“, изјави Ларс Рикен, спортски директор на Дортмунд.
Ковач, кој претходно освои трофеи со Баерн Минхен и Ајнтрахт Франкфурт, го презеде тимот во февруари кога беа 11-ти на табелата во Бундеслигата, по лошиот почеток под водство на Нури Сахин.
Под негово водство, тимот стана многу постабилен и ја заврши сезоната на четвртото место, со што ја обезбеди Лигата на шампионите.
Медиумите известуваат дека клубот преговара со Челзи за потпишување на договорот со аргентинскиот стопер Арон Анселмино, со цел зајакнување на одбраната.
„Веруваме дека тука, заедно со клубот и навивачите, можеме да постигнеме нешто посебно. Нашите разговори во последните недели го зајакнаа моето верување дека можеме да изградиме долгорочен успех врз основа на досегашните резултати и да ја вратиме Борусија таму каде што припаѓа“, изјави 53-годишниот Ковач.
Спорт
Кадилак го потврди и Серхио Перез

Кадилак од наредната сезона ќе се натпреварува во шампионатот на Формула 1. Минатата недела тимот го потврди дека еден од возачите ќе биде Валтери Ботас, а денес потврда дојде и за Серхио Перез.
Мексиканецот и Финецот имаат многу искуство зад себе, бидејќи во својата богата кариера возеа и за Ред Бул и за Мерцедес во своите најдобри сезони. Ова ќе биде интересен тим, бидејќи за прв пат ќе имаат можност да се борат за статусот на прв возач, што не беше можно ниту за Перез поради Ферстапен, ниту за Ботас поради Хамилтон.
„Потпишувањето на овие двајца возачи е голем чекор за овој нов тим. Сите ги познаваат, додека тие знаат како да бележат одлични резултати во Формула 1“, соопштија од Кадилак.
Од следната сезона, Формула 1 ќе претрпи големи промени, буквално „најбрзиот циркус“ ќе влезе во нова ера, со нов тим во името на Кадилак, кој ќе настапува во докажан состав.
Серхио Перез не е во караванот на Формула 1 оваа сезона, додека Валтери Ботас е трет возач во тимот на Мерцедес.