Македонија
Жените во политиката порачаа: Јавно говорење, осуда и пријава на вербалното насилството клуч за решавање на проблемите
																								
												
												
											На конференцијата „Жени во политика-Говор на омраза, сенка која обесхрабрува“, во организација на Министерството за труд и социјална политика, а со поддршка на „УН Вомен“, на панелот три за искуствата со говорот на омраза зборуваа пратеничките во Собранието, Санела Шкриељ, Моника Зајкова, Арбана Пашоли и координаторката на советничката група во Советот на Град Скопје, Љубица Јанчева.
„Крајната цел е секако обесхрабрување на жените да учествуваат активно во јавниот живот и носењето на одлуки. Политичката култура, односно некултура, изобилува со родови стереотипи, сексизам, мизогинија, говор на омраза и сето тоа дополнително го засилува насилството врз жените во политиката. Многу е важно да се истражува и следи говорот на омраза врз жените во политиката за да се укаже на штетното влијание што го има не само врз поедини жени и нивната благосостојба, туку и врз општата мотивација на жените активно да се вклучат во политичкиот и општествениот живот“ потенцираше Шкриељ.
Зајкова посочи дека, сексизмот, личните навреди, потсмев, пцовки, навлегување во приватниот живот, мизогинија се само дел од работите со кои се соочуват жените особено во политиката.
„Стануваме предмет на навреди и секакви погрдни зборови од луѓе кои воопшто не не познаваат како личности. Да ви ги покажам пораките на мојата страна по трагично од тоа што добивам ниски коментари па и слики од полови органи на мажи е што погрдни и навредливи зборови добиваме и од жени. Не знам дали тие луѓе немаат мајки, сестри или ќерки. Се додека секоја жена не застане позади друга жена, но се приклучува на тие навреди или додека ги премолчуваме, а не ги објавуваме јавно таквите напади и говор на омраза кон жените нема да заврши. Едукација од најрана возраст, јавно говорење и пријава на ваквото вербално насилство е клуч за да почнат проблемите да се решаваат. Се додека ние како жени молчиме и игнорираме тие ќе се погласни и нема да запрат,“ порача Зајкова.
Пратеничката Пашоли истакна дека жена со амбиции за професионален развој се предизвикува себеси, но и околината во која живее.
„Успехот на една жена или девојка не е случаен! Тоа е преплет на вредности, многу труд но и истрајност за надминување на предизвиците како и поддршка пред се од важните жени во нејзиниот живот,“ потенцираше Пашоли.
Координаторката на советничката група во Советот на Град Скопје, посочи дека конференциите налик на денешнава, треба повеќекратно да се организираат, и секогаш одново да се препрочитува и превреднува нивната содржина, како четиво на мудри сознајби, но и како пример за жестоката интелектуална женска будност и аналитичка обдареност, и како апел до човековата свест за штетноста на говорот на омраза и за важноста на родовата еднаквост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
																	
																															Македонија
Стартува изградбата на железничкиот тунел кој ќе ги поврзува Македонија и Бугарија, утре министрите на двете земји ќе го потпишат договорот
														Заменик претседателот на Владата и министер за транспорт Александар Николоски, утре, 6 ноември, заедно со вицепремиерот и министер за транспорт и врски на Република Бугарија, Гроздан Караџов ќе го потпишат Догорворот за подготовка, изградба и оперативност на меѓуграничниот железнички тунел на Коридор 8.
На потпишувањето кое ќе се случи на железничката станица Ѓуешево, предвидено е да присуствуваат претставници на Европската комисија, претставници на НАТО, претставници на САД на Европската инвестициска банка, Европската банка за обнова и развој, како и претставници на Светска банка.
Изградбата на железничкиот тунел ќе претставува меѓугранична точка на двете држави на Коридор 8. Проектираната должина на тунелот е околу 2,4 км, од кој 1,2 км се наоѓа на територијата на Македонија.
Изградбата на железничкиот Коридор 8, покрај економското значење за Македонија и регионот, има и безбедносно значење во рамки на НАТО Алијансата. Во таа насока, на источниот Коридор 8 веќе е изградена и пуштена за сообраќај пругата од Куманово до Бељаковце. Делницата од Бељаковце до Крива Паланка е во фаза на изградба, а интензивно се работи и на подготовка за третата делница од Крива Паланка до границата со Република Бугарија која во продолжение ќе го опфати и тунелското решение.
Македонија
Воведена нова процедура на Клиниката за кардиологија, пациентите со сложени срцеви аритмии повеќе нема да бидат упатувани во странство
														Министерот за здравство Азир Алиу денеска ја посети Универзитетската клиника за кардиологија по повод извршената прва аблација за коморна тахикардија во нашата држава.
„Со воведувањето на новата процедура на Клиниката за кардиологија овозможуваме пациентите со сложени срцеви аритмии да бидат згрижени и соодветно третирани во оваа врвна терциерна установа, без да има потреба да бидат упатувани во странство. Тимот од оваа клиника покажа дека во македонското здравство постои знаење, храброст и визија за врвни резултати. Ова е голем чекор напред за нашето здравство и потврда дека инвестицијата во знаење, технологија и човечки потенцијал овозможува врвни резултати“, истакна министерот Алиу при посетата.
Директорката на Клиниката за кардиологија, Даница Петкоска-Спирова, изрази благодарност до целиот тим за посветеноста во работата и грижата за пациентите со кардиолошки заболувања.
„Министерството за здравство продолжува со поддршка на иницијативите за воведување нови процедури и методи во јавните здравствени установи, со цел унапредување на третманот на пациентите на сите нивоа на здравствена заштита“, порача министерот Алиу.
Македонија
Љутков ќе се обрати на 43. сесија на генералната конференција на УНЕСКО
														Министерот за култура и туризам Зоран Љутков ја предводи македонската делегација на 43. сесија на Генералната конференција на УНЕСКО што од 30 октомври до 13 ноември се одржува во Самарканд, Република Узбекистан.
Љутков утре (5 ноември) во Конгресниот центар „Патот на свилата“ во Самарканд ќе се обрати на дебатата посветена на генералните политики на Организацијата, на која учествуваат министри и претставници од земјите членки на УНЕСКО.
На Генералната конференција учествуваат претставници од над 200 земји и меѓународни организации. За време на двонеделното заседание ќе бидат усвоени значајни документи што ги одредуваат буџетот и програмата за работа на УНЕСКО за следниот период, а државите членки ќе изберат и членови на извршниот одбор. Се очекува во текот на Конференцијата да биде именуван и нов директор на Организацијата.
Одржувањето на Конференцијата во Самарканд е од особено значење бидејќи за првпат по повеќе од четири децении Генералната конференција на УНЕСКО се одржува надвор од седиштето на Организацијата во Париз.
Учеството на овој меѓународен собир, во кој Република Македонија е полноправна членка од 28 јуни 1993 година, ја потврдува континуираната посветеност на земјава кон целите и вредностите на УНЕСКО, а претставува и можност за унапредување на видливоста на македонската култура на глобално ниво.

