Македонија
Мицевски: Оваа тендерашка и нереформска влада тргува и лицитира со функциите и позициите
Пратениците од мнозинството имаат двојни аршини затоа што истите овие пратеници пред само 13 месеци пишуваа дека ја избрале европската влада, дека европскиот фронт и пат победил, дека ова се министрите кои ќе ги направат реформите кои што ги ветува на граѓаните. Ама истите овие пратеници кои што имаа двојни аршини не знаеја да напишат деновите пост и да се извинат на своите граѓани за разрешувањето на замениците министри, рече денеска од собраниската говорница координаторот на пратеничката група на ВМРО-ДПМНЕ Никола Мицевски.
Мицевски беше саркастичен и додаде дека довербата на парламентарното мнозинство пораснала од 64 на 62 пратеници.
Довербата во оваа влада и во она што го слушаат пратениците од власта бидејќи ниту еден нема храброст и да продискутира од вчера до денес порасна од 64 на 62 пратеници, рече тој.
Мицевски смета дека ова е тендерашка и нереформска влада, како и дека кога СДС беше во опозиција маршираа дека нема правда, за денеска да тргуваат со министерството за правда.
Ова е нереформска, антимакедонска и тендерашка влада. Овие пратеници зборуваа за правда, биле борци за правда имаа маршови до пред некоја година дека нема правда и внимавајте истите овие борци за правда го дадоа министерството за правда. Единствениот министер кој што не доаѓаше од министерствата, односно доаѓаше од фелата човек кој што можеше и имаше желба беше излицитиран и истргуван, истакна Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.