Европа
Фон дер Лаен: Сакаме што побргу да ги приближиме земјите од Западен Балкан до ЕУ
Претседателката на Европската комисија, Урсула фон дер Лаен, оцени дека сега е клучниот момент за постигнување договор меѓу Србија и Косово и за решавање на меѓусебните прашања бидејќи тоа е многу важно за процесот на проширување, но и за постигнување стабилност во Европа.
Претседателката на Европската комисија, Урсула фон дер Лаен, ова го изјави во интервју нагласувајќи дека војната во Украина ја истакна стратешката важност на проширувањето на Европската Унија.
„Знаете дека сакаме да ги приближиме нашите партнерски земји од Западен Балкан што е можно побргу до Европската Унија“, додаде Фон дер Лаен.
Кога станува збор за дијалогот меѓу Србија и Косово, таа вели дека на маса има план на Европската Унија за нормализација на односите меѓу Белград и Приштина поради што смета дека сега е моментот да се разбере важноста на постигнување договор за двете страни.
„Нормализацијата на тие односи е најважна и клучна за безбедноста, стабилноста и за просперитетот на целиот регион. Затоа се надевам дека во пресрет на новите разговори двете страни ќе бидат многу конструктивни“, рече претседателката на Комисијата.
На прашањето дали ќе има последици доколку не се постигне договор, Фон дер Лаен рече дека е потребно, прво, да се обиде да најде решение, а потоа да се гледаат резултатите, пренесе „Аваз.ба“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Финска им дозволи на САД пристап до воените бази; Русија: Ќе возвратиме
Русија ќе одговори на одлуката на Финска да дозволи пристап на САД до нејзините воени бази, соопшти денеска руското Министерство за надворешни работи.
На 1 јули финскиот парламент едногласно го одобри договорот за одбранбена соработка со Соединетите Американски Држави, кој беше потпишан во декември 2023 година.
Договорот наведува 15 објекти и области во Финска до кои американската војска ќе има неограничен пристап и каде што може да складира и воена опрема и муниција.
„Можам само да потврдам дека Русија нема да пропушти да одговори на трупањето сили на НАТО на нашата граница, што претставува закана за безбедноста на Руската Федерација“, изјави заменик-портпаролот на Министерството, Андреј Настасин.
„Ќе ги преземеме и сите неопходни мерки, вклучително и мерки од воено-техничка природа, со цел да возвратиме на агресивните одлуки на Финска и нејзините сојузници во НАТО“, додаде тој.
Финска стана членка на НАТО минатата година.
Европа
Членките на НАТО договорија 40 милијарди евра воена помош за Украина
Сојузниците на НАТО се согласија да финансираат воена помош за Украина со 40 милијарди евра следната година, изјавија двајца западни дипломати за Ројтерс во средата, една недела пред самитот на алијансата во Вашингтон.
Генералниот секретар на НАТО, Јенс Столтенберг, побара од сојузниците да се согласат на повеќегодишна посветеност да продолжат да му помагаат на Киев на исто ниво како од почетокот на руската инвазија во 2022 година, во износ од речиси 40 милијарди евра годишно. Земјите членки, сепак, не го поддржаа првичното барање на Столтенберг, но договорот вклучува одредба дека придонесите на сојузниците ќе бидат разгледани на идните самити на НАТО, според дипломатот.
Сојузниците одлучија да подготват два извештаја во текот на следната година за да одредат која земја што испраќа во Украина, рече дипломатот, за да се исполнат барањата за поголема транспарентност во распределбата на товарот меѓу сојузниците.
Земјите членки „ќе имаат цел да го исполнат ова ветување преку пропорционални придонеси“, се вели во договорот. Финансиската обврска е дел од поширокиот пакет за Украина за кој лидерите на НАТО ќе се договорат на состанокот во Вашингтон од 9 до 11 јули.
Европа
(Видео) Страшен руски ракетен напад врз Днипро, многу мртви и ранети
Во руски напад со проектили и беспилотни летала врз украинскиот град Днипро во средата загинаа четворица цивили, а 27 беа ранети, оштетени се градинки, училишта и болници, а предизвикаа и пожари во градот, соопштија регионалните власти.
Украинскиот претседател Володимир Зеленски сподели драматично видео од ракетниот напад врз Днипро.
„Утрото не беше добро за нас. Непријателот изврши комбиниран напад врз нашиот град“, рече Серхиј Лисак, гувернер на околниот регион Днепропетровск, во видео објавено на „Телеграм“.
Russian terrorist attack struck Dnipro this morning. Four civilians have been killed, and 27 injured, with two in critical condition. pic.twitter.com/GWYpzqVFjs
— Iryna Voichuk (@IrynaVoichuk) July 3, 2024
Од повредените 11 се пренесени во болница, а двајца се во тешка состојба, рече тој.
Лисак објави фотографии од работниците на итната помош како отстрануваат скршено стакло и го гаснат пожарот.
Украинските воздухопловни сили објавија дека руските сили ја гаѓале областа Днепропетровск со седум проектили и пет беспилотни летала „Шехид“.
Противвоздушната одбрана успеала да собори пет проектили и сите беспилотни летала, се наведува.
Градоначалникот на Днепро, Борис Филатов, прогласи ден на жалост за четврток. Тој рече дека се оштетени две училишта и три градинки.
Фрагменти од проектил паднале врз детската болница, а оштетени се уште две болнички згради. Оштетени се и деловни згради, соопштија властите.
Русија во последните месеци ги засили воздушните напади врз украинските градови.
Москва негира дека цели на цивили, иако илјадници се убиени откако Русија ја почна својата инвазија на Украина во февруари 2022 година.