Македонија
(Видео) Запленета дрога од половина милион евра, откриена лабораторија за амфетамин во Скопје
Полицијата заплени дрога вредна половина милион евра и откри лабораторија за производство на амфетамин во Скопје.
Во голема полициска акција приведени се петмина скопјани, а извршени претреси на седум локации во главниот град.
„Откриена е лабораторија за производство на амфетамин, како и дрога со вредност од речиси половина милион евра. Пронајдени се синтетичка дрога амфетамин во количина од седум килограми, еден килограм кокаин, околу 22 килограма марихуана, речиси 3.000 таблети ‘екстази’, автоматска пушка ‘калашников’, 667 куршуми во различен калибар, рамка за автоматска пушка, две рамки за пиштол, повеќе дигитални ваги со остатоци од амфетамин, опрема за производство на синтетичка дрога амфетамин, калапи за амфетамин, поголема количина течност за производство на синтетичка амфетамин, евиденции, тетратки и листови со прибелешки за должници, односно лица што купувале дрога, пари за кои постојат основи на сомнение дека потекнуваат од продажба на дрога и четири патнички возила“, соопшти МВР.
Од полицијата додаваат дека претходно, во текот на јануари, февруари и март, по наредба на јавен обвинител, беше спроведено криминалистичко истражување насочено кон лица улични дилери, кои вршат продажба на синтетичка дрога амфетамин и на марихуана од Скопје, при што веќе беа лишени од слобода три лица – Д. Т (33), Д.М. (37) и Ј.С. (41) – сите од Скопје, кои набавувале синтетички дроги и кои се веќе кривично процесирани.
Приведените лица подолго време биле инволвирани во улична продажба на синтетичка дрога амфетамин на подрачјето на Скопје за што изнајмиле повеќе станови во центарот на Скопје, како и во населбата Ѓорче Петров, кои ги користеле како депо за чување, производство и пакување синтетички дроги и во нив презеле мерки на заштита со инсталирање на видеонадзори. Дрогата ја продавале по 2.000 денари за грам амфетамин, 3.000 денари за грам кокаин, 600 денари за таблета „екстази“, а пакување марихуана за 1.000 денари.
Вакви активности полицијата спроведува и во другите градови од државата. Од почетокот на оваа недела извршени се 36 претреси, приведени се 32 лица, при што запленети се амфетамин, „екстази“, марихуана и други видови дрога.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На покана на ЕИБ, Анѓушев говореше за поставување батерии на фотоволтаични електрани во Штип
Кредити од Европската инвестициска банка (ЕИБ) за македонските фирми да постават батерии на фотонапонските електрани, инсталирани на покривите на индустриските објекти, е поволноста со која европската финансиска институција ќе го поттикнува македонското стопанство да биде енергетски ефикасно.
Пред штипските фирми, во салата на општина Штип, консултантите на Европската Банка, Ловре Ристевски и проф. Даме Димитровски, порачаа дека има потреба ефикасно да се искористува електричната енергија од обновливи извори, наместо во значаен дел таа да се губи.
На претставувањето во Штип, бизнисменот Кочо Анѓушев, сопственик на енергетската компанија ФРОИНВЕСТ, говореше за батериските системи како единствено решение во моментот за справување со вишокот електрична енергија произведена од фотоволтаици, кој вишок производителот не може да го потроши, а електричната мрежа не може да го прими.
Анѓушев ги запозна штипските фирми за важноста на тоа дека секој кој инвестира во обновливи извори, без оглед на големината, потребно е да оди на интегрирано и комплетно решение за да има најбрз поврат на инвестицијата, и оптимало работење на електраната и на батеријата.
Поволните кредити на Европската инвестициска банка (ЕИБ) ќе бидат достапни преку македонските банки, по услови пропишани од ЕИБ.
Македонија
Околу 14.000 македонски граѓани останаа без денар вложувајќи пари преку Конти
Граѓаните да внимаваат со потенцијалните инвестиции преку различни апликации, апелираше денес министерот за внатрешни работи Панче Тошковски и информира дека досега не е поднесена ниту една кривична пријава поврзани со апликацијата Конти која остави без денар околу 14.000 македонски граѓани кои вложувале пари преку Конти, а биле членови на група на Телеграм.
Според Тошковски, оние што учествувале како жртви во овој, како што рече, потенцијално кривично-правен настан, да се обратат до МВР за да се истражат случаите и соодветно да се реагира.
„Според информациите од утринава, кривична пријава официјално не е поднесена, но изразувам оргомна загриженост за ваков пирамидален инвестициски финансиски потенцијален криминал што се случува по не знам кој пат во земјава. Од службите бев информиран дека многу слична апликација за измама била констатирана и во 2022 година. И тогаш е упатен апел граѓаните особено да внимаваат кога станува збор за вакви потенцијални инвестиции кои најчесто завршуваат како класични измами. И сега апелирам, граѓаните особено да внимаваат на вакви инвестициски вложувања, да се консултираат со експерти од областа, да се обратат и до МВР каде исто така има експерти кои првично може да проценат дали станува збор за потенцијална измама, а оние што учествувале како жртви во овој потенцијален кривично-правен настан, да се обратат до МВР за да истражиме и соодветно да постапиме“, истакна министерот по прес-конференцијата по повод 100 дена од работата на Владата.
Македонија
Околу 36 килограми марихуана запленила Царинската управа пред два дена
Директорот на Царинската управа, Бобан Николовски, на денешниот настан за реконструкција на граничниот премин Деве Баир, објави дека пред два дена Царинската управа запленила 36.4 килограми опојна дрога марихуана на граничниот премин Блаце, додека вчера на Jажинце бил спречен шверц на голема количина лекови.
„Од 1 јули до 30 септември годинава или за последното тримесечје, за 70 отсто е зголемен бројот на случаи на заплени, споредено со истиот период 2023 година, лани во тој период биле 54, со 73.631 запленето парче, додека годинава бележат 92 заплени, со 396.592 парчиња. Тоа значи дека за она што се бориме, а тоа е професионално врешење на работата на царинските службеници, тоа и се забележува, резултатите се видливи и мерливи, и од аспект на финансии, полнење на буџетот, но и од аспект на нашето оперативно работење. Со реконструкцијата на управната зграда ќе добиеме нови помодерни услови, современи услови за работа на царинските но и на полициските службеници, но се создаваат и услови за подобро оперативно работење, што за нас како службеници е многу битно, со фокус на квалитет, што значи откривање и спречување на недозволената трговија со забранети стоки“, рече Николовски, објавувајќи ја големата заплена од пред два дена на Блаце.