Ветон Груби купува, а Артан Груби плаќа. Вака некако изгледа врската во семејството Груби, а тоа најдобро се гледа по купувањето на дуќанот на улицата Македонија од страна на Ветон Груби и наплаќањето за туристички услуги од државните институции со кои раководи Артан Груби, изјави портпаролката на ВМРО-ДПМНЕ, Марија Митева.

„Или математички тоа би изгледало вака: Ветон Груби купува за 6 милиони денари, а добива од државата или директно од брат му еден милион денари. Практично, 1/6 од тоа што дал Ветон Груби си наплатил од Артан Груби“, рече Митева.

Ова, според Митева, се отворени сомнежи за кои институциите треба веднаш да реагираат, особено затоа што ова директно се коси со правните одредби од Законот за спречување на корупцијата и судир на интересите.

„Доколку институциите не знаат по кој член треба да постапат, еве и тоа ќе им го посочиме. Имено, во чл. 72 ст. 1 од законот е наведено дека службеното лице во текот на вршењето на позицијата е должно да внимава на потенцијален судир на интереси, како и да преземе мерки за негово одбегнување. Ако одиме подетаљно, во истоимениот закон постои одредба со која Артан Груби би требал да информира за потенцијален судир на интереси. Но, тоа е невозможна мисија со оваа власт. Напротив, тие не се борат против корупцијата, туку се нејзини креатори.

Ветон Груби како сопственик на фирмата „ЕТЦ травел“ ДООЕЛ Скопје наплатил туристички услуги во вредност од 1 милион денари од државни институции, дури 8 пати. Се поставува прашањето дали целта била да се стигне до наплата од еден милион денари или, пак, целта било по секоја цена братот на Артан Груби да добие државни пари? Аздисаноста оди до таму што Владата, чиј втор човек е Артан Груби, префрла пари на „ЕТЦ травел“ на Ветон Груби три месеци по ред во 2020 година или, пак, во два наврата во временска дистанца од само 5 дена во 2021 година. Изгледа важно е секоја година по неколку трансакции да има кон „ЕТЦ травел“ на Ветон Груби.

Дали овие информации не се доволни на ДКСК веднаш, без одлагање, да постапи по нив и, конечно, да не биде институција што го констатира неправилното работење на власта, туку да преземе конкретни чекори. Зошто ДКСК веќе три дена молчи за овие сознанија, кои се јавно достапни и објавени на алатката отворени финансии, од каде што се гледаат сите информации за изведените трансакции. Дали повторно ДКСК ќе најде изговор дека немаат доволен кадар и средства за петминутна онлајн-проверка на отворените финансии?“, посочи Митева.

Таа обвини дека додека сите надлежни институции молчат, СДС и ДУИ ги претвораат државните институции во подружници на нивните фирми нагласувајќи дека државниот апарат се користи за да се создадат добри бизнис-услови за фирмите на луѓето од власта, а да се оневозможи развојот на сите други.