Македонија
Тренчевска: САСА е пример за современ руднички комплекс кој се грижи за родовата еднаквост

Во рамки на активностите посветени на економското зајакнување на жената, кои се спроведуваат во текот на месец март во склоп на кампањата „Гласна и храбра“, министерката за труд и социјална политика Јованка Тренчевска го посети рудникот САСА. На средбата со раководниот и техничкиот тим на САСА, министерката се запозна со сите позначајни аспекти од работата на САСА, како и со ефектите од континуираните вложувања во модернизација на производството, во безбедноста и условите за работа, во професионалниот развој и благосостојба на вработените, како и во областите на животната средина, одржливиот развој и поддршката на локалната заедница.
Посебен акцент на средбата беше ставен на активностите и вложувањата на САСА насочени кон охрабрување и јакнење на жените, како и обезбедување конкретна поддршка за нивниот кариерен развој во компанијата и воопшто во рударската индустрија.
Министерката посети и дел од индустриските постојки на САСА, каде директно се запозна со работните процеси и разговараше со вработените, меѓу кои и со жените – членови на тимот на САСА од различни професионални профили и работни позиции. Компанијата континуирано работи на зголемување на бројот на жени вработени во рудникот и нивната процентуална застапеност сега е 8,9 % од вкупниот број вработени.
„Економското зајакнување на жените значајно влијае на постигнувањето родова еднаквост во сите сектори и во намалување на родово базирана дискриминација, што е еден од најзначајните приоритети на кои сме посветени во министерството. Драго ми е што гледам дека и во рударството сѐ повеќе се менува перцепцијата и се рушат табуата околу традиционалната поделба на машки и женски професии. САСА е одличен пример за тоа како компаниите треба да создаваат средина во која жените и мажите имаат еднакви можности за кариерен развој“, истакна министерката за труд и социјална политика Јованка Тренчевска на средбата со жените – вработени во САСА.
Министерката информираше и дека во рамки на тековниот инклузивен процес на подготовка на новиот Закон за работни односи, утврдена е и потребата од усогласување на домашната регулатива со современите светски гледишта и практики за еднаков третман на мажите и жените во поглед на правата од работен однос, што помеѓу другото ќе отвори и нови можности за кариерен развој на жените во рударската индустрија.
„Благосостојбата на сите наши вработени и нивниот развој отсекогаш била и ќе остане една од главните заложби на САСА и на групацијата Централ Азија Металс каде што припаѓаме. Активностите и вложувањата што ги правиме за поддршка, охрабрување и јакнење на жените во САСА, но и на оние во локалната заедница, се важен дел од овие наши заложби и истовремено се дел од нашата интегрална стратегија за одржлив развој која го трасира патот кон подобра иднина за сите оние кои на каков било начин се поврзани и можат да имаат придобивки од работењето на САСА“, рече генералниот директор на САСА, Кристофер Колбурн, заблагодарувајќи ѝ се на министерката и на останатите институции на национално и локално ниво за нивниот досегашен интерес и соработка.
За време на престојот во САСА, министерката Тренчевска имаше прилика да се запознае и со прогресот во реализацијата на новиот капитален проект, во кој се инвестирани околу 25 милиони долари, а кој ќе овозможи стабилна работа на САСА во наредните години, уште поголема сигурност и стабилност на работните места и отворање можности за нови вработувања, натамошно унапредување на безбедноста и животната средина, како и дополнителни придобивки за локалната заедница и пошироко за земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.