На неодамнешниот 74-ти регионален состанок на Светската здравствена организација (СЗО) за Европа, министерот за здравство и претседателот на Алијансата за Албанците, Арбен Таравари, доби признание од д-р Ханс Клуге, регионалниот директор на СЗО за Европа.

Д-р Клуге изрази пофалби за напорите на Таравари за ажурирање на позитивната листа, чекор кој ја одразува неговата посветеност кон подобрување на здравствените услуги и пристапот до неопходни лекови за граѓаните.

Учеството на министерот Таравари потврдува посветеност на Северна Македонија за активно учество во глобалниот дијалог за напредок на јавното здравје и справување со актуелните предизвици во здравствениот сектор.

Министерот за надворешни работи и надворешна трговија, Тимчо Муцунски, денес и утре учествува на Министерската конференција за хуманата димензија на Формулата за мир на Украина, која се одржува во Монтреал, Канада. Конференцијата е организирана во ко-партнерство од страна на министерствата за надворешни работи на Канада, Норвешка и Украина.

На конференцијата се очекува министрите да разменат мислења и ставови околу враќањето на воените заробеници и незаконски притворените цивили како резултат на руско-украинската војна, како и за изнаоѓање најсоодветни механизми за враќање на незаконски раселените и присилно депортираните украински деца од страна на Руската Федерација. Дополнително, се очекува од конференцијата да произлезе акциски план за ослободување на притворените цивили, воени и политички заробеници, како и за враќање на депортираните деца. Планот ќе опфати и мерки за нивна рехабилитација и повторна реинтеграција со нивните семејства по враќањето во татковината.

Во рамките на конференцијата, предвидено е Муцунски да оствари и неколку билатерални средби.

Групацијата на небанкарски финансиски друштва при Стопанската Комора на Северна Македонија, заедно со претставници од Министерството за Финансии и Народната Банка на Северна Македонија ќе земат учество на престижната регионална конференција „Microbalkans 2024“ која ќе се одржи на 31 октомври и 1 ноември 2024 година во Сараево- Босна и Херцеговина. Конференцијата е организирана со поддршка на Европската Унија, од страна на Асоцијацијата на микрокредитни организации на БиХ (AMFI) и има за цел да го поттикне развојот на микрофинансискиот сектор во Западен Балкан преку засилена соработка и иновации.

Настанот ќе собере над 200 учесници, вклучувајќи лидери на финансиски и микрофинансиски институции, експерти за дигитална трансформација, претставници од централните банки, регулатори, правни советници, провајдери на информациски технологии и други важни чинители на екосистемот, од регионот и пошироко.

На панелот „Дигитализација во микрофинансискиот сектор“ учество ќе земе Никола Јошевски, претседател на Групацијата на небанкарски финансиски друштва при Стопанската комора на Северна Македонија и генерален менаџер и сопственик на Mint Fintech Group, кој ќе говори за дигиталната трансформација и придонесот на финтек решенијата во модернизацијата на финансискиот сектор. Модератор на панелот „Дигитализација во микрофинансискиот сектор,“ ќе биде Арлинда Муја, Потпретседател на Групацијата на небанкарски финансиски друштва при Стопанската комора на Северна Македонија и главна Извршна Директорка на Финмак ДОО, која воедно е и Претседател на „Albanian Microfinance Association“

Во воведниот панел ќе се обрати Биљана Мишиќ, потпретседател на Групацијата на небанкарски финансиски друштва и Извршен Директор на Iute Македонија, која ќе го претстави македонскиот сектор на финансиски друштва и неговиот удел во целокупниот финансиски систем.

Во оваа насока, на конференцијата ќе се одржи и тркалезна маса насловена како „Регулаторна рамка и позитивни практики од ЕУ и Западен Балкан“, каде учесник е Иван Недев, раководител на Одделот за финансиски систем при Министерството за финансии на Македонија.

На панелот „ESG во микрофинансискиот сектор: потреби и услови“, ќе говори Фросина Целеска, Директорка на дирекцијата за банкарска регулатива и решавање банки, која заедно со другите панелисти ќе ги споделат своите искуства и перспективи и ќе се фокусираат на искористување на можностите кои ги пружа ESG за развојот на микрофинансискиот сектор во регионот.

На конференцијата ќе се потпише и Меморандум за соработка помеѓу микрофинансиските институции од Западен Балкан, со што ќе се постават основите за создавање на заедничка платформа за поддршка на микрофинансискиот сектор. Преку оваа платформа, земјите од регионот, вклучувајќи ја и Северна Македонија, ќе имаат пристап до дополнителен капитал, гаранции за финансирање и техничка поддршка, како и до ресурси кои се достапни во ЕУ.

Оваа иницијатива претставува важен чекор кој ќе помогне во градење на посилен имиџ на микрофинансиските институции како носители на социјална одговорност и поддржувачи на одржливиот развој, воедно создавајќи услови за подобрување на финансиската инклузија и економскиот развој на регионот.

ПР текст