Македонија
Тренчевска: Старите изнемоштени лица од општина Кисела Вода добиваат нова социјална услуга за помош и нега
40-ина лица над 65 години, на кои им се потребни грижа и нега, како и лица со намален функционален капацитет и попреченост, кои живеат на територијата на општина Кисела Вода, во наредниот период ќе почнат да ја добиваат неопходната помош и нега во рамките на своите домови. За нив секојдневно ќе се грижат 20 лиценцирани негуватели од центарот за нега во Кисела Вода, кои ќе им обезбедуваат помош во одржување на личната хигиена, при обезбедување на потребните производи, лекови и слично, како и во одржување на домот.
Развојот на оваа услуга е дел од сеопфатната социјална реформа на Владата и ресорното министерство, која финансиски е поддржана од Светската банка преку проектот за подобрување на социјалните услуги, а има цел да го одржи и подобри вкупниот квалитет на животот на корисниците во нивното семејно опкружување.
„Ефектите од воведувањето на ваквите нови социјални услуги, со кои значајното се подигнува квалитетот на живот на старите изнемоштени лица, кои, наместо во установа, неопходната грижа ја добиваат во својот дом, се вистинскиот показател за успешноста на социјалната реформа. Дополнително, преку оваа реформа се создадоа реални можности за работно ангажирање како негуватели на невработени лица, самохрани родители и лица од социјален ризик. Особено е важно што повеќето од нив се жени, што ја покажува посветеноста на Министерството за економско зајакнување на жените, особено на оние од ранливите категории. Сето ова говори дека стратешка определба на Владата и Министерството за труд и социјална политика за зајакнување на човечкиот капитал, намалување на сиромаштија и подигнување на квалитетот на живот во земјата се остварува“, истакна министерката за труд и социјална политика, Јованка Тренчевска.
Со новиот центар ќе управува Црвениот крст на Град Скопје, кој за воспоставување на новата социјална услуга ја доби соодветната дозвола за вршење дејност од областа на социјалната заштита што ја издава Министерството за труд и социјална политика.
„Задоволни сме што нашата организација ги доби довербата и поддршката од Министерството за труд и социјална политика, во соработка со Општина Кисела Вода, да ја организира работата на негувателите од новиот центар за нега, кои ќе обезбедуваат помош и нега на корисниците што живеат на територијата на оваа општина. Тргнувајќи од нашето досегашно искуство, сигурни сме дека нашите обучени негуватели ќе внесат нова свежина и радост во секојдневниот живот на корисниците помагајќи им да ги совладаат секојдневните предизвици и животни потреби“, изјави Сузана Тунева-Пауновска, секретар на Црвениот крст на Град Скопје.
За да се обезбеди поголема функционалност на системот и достапност на новите социјални услуги до оние на кои тие им се најпотребни, од клучно значење е улогата на општините, кои треба соодветно да ги препознаат потребите и барањата на жителите во нивните заедници и да подготват проекти за развој на социјални услуги со кои ќе аплицираат во ресорното министерство.
„Големо е моето задоволство што во општина Кисела Вода почнуваме со уште еден проект за подобрување на социјалните услуги, чија цел е значително да го унапреди квалитетот на животот на повозрасните и на лицата со попреченост, кои не се во можност во целост самостојно да се грижат за себе. Од денес преку трипартитниот договор потпишан помеѓу Кисела Вода, Минитерството за труд и социјална политика и Црвениот крст на Град Скопје, за што на овие институции сакам искрено да им се заблагодарам, функционира центарот за нега како сервис за домашна нега и грижа на стари и немоќни лица, кои од страна на сертифицирани и професионални негуватели ќе добиваат услуги приспособени на нивните индивидуалните барања и потреби. Како општина со јасна стратегија за градење општество во кое услугите ќе бидат достапни за сите и во кое различностите се почитуваат и вреднуваат, Општина Кисела Вода реализира многубројни проекти за социјална грижа и инклузивност. Ќе потсетам дека Општина Кисела Вода е првата и единствена општина во која од пред два дена старите и немоќни лица добиваат посебен бесплатен транспорт за користење здравствена, социјална или друга административна услуга. Ова го реализираме заедно со Црвениот крст. Дополнително, ние сме првата општина што вработи лице со Даунов синдром и јас и како градоначалник, но и како претседател на ЗЕЛС, упатив апел овој чекор да го следат и сите други општини, но и институции од централната власт. Ќе потсетам и дека отворивме клуб за децата со церебрална парализа, а овозможивме и функционирање дневен центар за окупациона терапија за лица со попреченост. Се надевам дека ваквите позитивни примери ќе поттикнат големи промени и ќе донесат позитивни резултати во целата држава“, истакна градоначалникот на Кисела Вода, Орце Ѓорѓиевски.
Во рамките на проектот за подобрување на социјалните услуги, што го спроведува Министерството за труд и социјална политика, досега се воспоставени и поддржани 22 проекта за воведување социјални услуги во 27 општини во земјата. Обезбедена е конкретна поддршка за развој на различен тип социјални услуги на локално ниво, како што се: помош и нега во домот, центри за активно стареење и дневни центри за лица со попреченост. За давање на услугите обучени се и лиценцирани над 300 лица, кои обезбедуваат стручна поддршка и нега за речиси 1.000 корисници.
Преку вториот јавен повик доделени и избрани се уште 12 проекти во 17 општини, кои се во фаза на лиценцирање и подготовка за спроведување на социјалните услуги. Се очекува до средината на годината да почнат да даваат услуги кон корисниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЦУК: Пронајдено повозрасно лице изгубено на Плачковица
Во спасувачка потрага синоќа е пронајдено 66-годишно лице кое се изгубило на планината Плачковица.
Како што денеска соопшти Центарот за управување со кризи (ЦУК),лицето е пронајдено околу еден часот по полноќ од страна на спасувачите од Доброволната планинска спасувачка служба „Осогово“ од Кочани откако во 18:08 часот на Единствениот број за итни случаи 112 во ЦУК била добиена информација за исчезнато лице.
– Лицето заедно со негов пријател дента се упатиле по пешачка патека кон езерото Дивичев Вир на планината Плачковица. Но, при крајот на денот, пријателот се вратил дома, а 66-годишникот не, бидејќи се изгубил во планината. Случајот бил веднаш пријавен во Полициската станица Кочани. Во потрагата на лицето прво се вклучиле членови од неговото потесно семејство. За итниот случај, од ЦУК биле известени ДЗС од Кочани и Горска служба, а на потрагата се приклучиле и други субјекти од локалната самоуправа. егионалниот ЦУК Штип пред полноќ информираше дека изгубеното лице на Плачковица е пронајдено живо и во добра состојба во 22.50 часот, од страна на членови на Доброволна планинска спасувачка служба „Осогово“ Кочани, информира ЦУК.
Поради подолгиот престој на студено време во планината, лицето било згрижено од страна на спасувачите, а потоа безбедно спуштено до селото Зрновци, каде што имало возила на полицијата и на Итната медицинска помош од Кочани.
Македонија
Професор д-р Атанаско Тунески: Енергетската самостојност е услов за самоодржлива држава, а ЗНАМ нуди мерки кои тоа ќе го овозможат
Денеска Движењето ЗНАМ – За наша Македонија одржа прес конференција на која професор д-р Атанаско Тунески зборуваше за мерките во енергетиката што се предвидени во програмата на Движењето „Проглас за достоинствена Македонија“ за претстојните парламентарни избори.
Професор Туневски рече дека заложбите за самоодржлива држава подразбираат самојстојност во покривањето на потребите од електрична енергија со производство во енергетските капацитети во државна сопственост.
„Најважните цели во делот за енергетиката од програмата “Проглас за достоинствена Македонија” се: изградба на 2 гасни когенеративни електрани (ТЕ-ТО Скопје и ТЕ-ТО Неготино), до мај 2027, во државна сопственост; почеток на изградба на ХЕЦ Чебрен во државна сопственост, со формирање на Дирекција за изградба на ХЕЦ Чебрен, најдоцна 4 месеци по формирањето на новата Влада; избор на стратешки инвеститор за реализација на проектот Вардарска долина, кој содржи 12 хидроцентрали, најдоцна 2 години по формирањето на новата Влада; завршување на изградбата на гасоводите: Неготино (Кавадарци) – Битола, Скопје-Тетово-Гостивар-Кичево, како и интерконективниот гасовод со Грција, со што со гасоводна мрежа ќе биде покриено околу 70% од населението во Македонија,; зголемување на производството на електрична енергија во енергетските капацитети во државна сопственост за најмалку 30% во однос на 2023-та година; намалување на трошоците за производство на електрична енергија во енергетските капацитети во државна сопственост за најмалку 25% во однос на 2023-та година“, рече професор Туневски.
Тој нагласи дека реализацијата на овие цели ќе овозможат енергетска независност на Македонија преку сериозно зголемување на производството на електрична енергија во енергетските капацитети во државна сопственост.
уневски додаде дека Програмата “Проглас за достоинствена Македонија” на Движењето ЗНАМ – За наша Македонија обезбедува максимум за Македонија преку максимум во енергетиката во Македонија.
Македонија
Крмов од Македонска Каменица: Посебен закон за пензионирање на рударите. 20 години стаж и 10 години бенефициран стаж
Денес, Носителот на листата на Левица во ИЕ3 – пратеникот Борислав Крмов, заедно со членот на Президиумот на Левица – Александар Симонов и советникот од Левица, Тони Стаменковски, остварија средба со граѓаните на Македонска Каменица.
На средбите со рударите, имајќи ги предвид проблемите со кои се соочуваат тие, пратеникот Крмов истакна:
,,Во моментов рударите одат во пензија со,
од прилика, 27 годишен стаж и 13 години бенефициран стаж. Во ниедна држава не е така. Секаде е тоа помалку, што значи дека ние како пратеници во Собранието ќе бараме посебен закон за рударство, којшто ќе намали на: 20 години стаж и 10 години – бенефициран стаж”.
Пред граѓаните на Македонска Каменица, Крмов истакна и дел од мерките предвидени во изборната програма на Левица што се однесуваат на инфраструктурата и заштитата на природните ресурси:
– Целосна обнова и проширување на руралната патна инфраструктура на локални патишта – со цел поврзаност
на секое село до главните транспортни артерии;
– Прогласување за национални богатства на водите, шумите, рудите и минералните ресурси и забрана за нивно издавање под концесија!;
– Ограничување на концесионерството на природните богатства и на јавните добра и услуги, со целосна забрана за давање под концесии на водни ресурси.
Во однос на домашното земјоделско производство и мерките за земјоделството и стопанството, Крмов се задржа на следново:
– Заштита на домашното производство (Made in Macedonia);
– Рестартирање или отворање на нови профитабилни државни компании во секоја стратешка гранка од стопанството како: рудници, металопреработувачка индустрија, откупни пунктови за земјоделски и шумски производи, производство на автохтона храна и пијалоци и многу други стопански дејности.
Стимулирање на задругарството и кооперативите, во сите сфери на здружување е една од мерките во Програмата на Левица. Тука се мисли на работнички кооперации, земјоделски задруги итн.
Оттука, Левица се залага за поттикнување на задругарството преку проектот „Мало селско стопанство“ (т.н. аграрни кооперативи) со стручна, техничка и техолошка, т.е. механизациска поддршка на земјоделските задруги.
Крмов од Македонска Каменица ја истакна и програмската мерка за гарантирани цени за најосновните прехранбени продукти и намирници потребни за секојдневен живот на населението.
Ова е само мал дел од над 1000 мерки и проекти, предвидени во Изборната програма на Левица, нагласи Крмов.