Македонија
Ристески: Селекторот Груби го пушта Ковачевски да игра само наместени натпревари
Oчигледно денес премиерот има дозвола да одговара само на пратенички прашања од власта или со фудбалски речник селекторот Груби го пушта да игра само наместени натпревари, рече пратеникот Петар Ристески од ВМРО-ДПМНЕ на денешната седница за собраниски прашања. Ристески постави три прашања две од областа на здравството и едно од областа на правдата, ресори кои добија нови кадри со реконструкција на Владата и влезот на алијанса за Албанците.
Ристески го праша министерот за здравство, Фатмир Меџити, поточно укажа дека додека траеше пазарењето тој да биде министер „во здравствениот сектор се случуваше хаос, а пациентите останаа колатерална штета, немаше договори за инсулин, умираа од сепса, ретки бактерии“.
„Одговорност нема за Гордана од Прилеп, Благојче од Битола и деновиве малата Јана исто од Битола. Барам веднаш расчистување на случајот со малата Јана, а министерот Меџити и директорската на Државниот здравствен и санитарен инспекторат Младеновска да се фатат за работа, а не да промовираат донации“, рече Ристески.
Второто прашање беше во врска со цистичната фиброза.
„По гласање на измените на соодветниот закон за набавка на лекови за ретки болести меѓу кои и цистичната фиброза ве прашувам кога ќе го има лекот Трикафта за сите, потоа зошто на овие по 26 годишна возраст им се укинува правото за неплаќање на медицински услуги кога тоа е болест која има прогресија, и дали воопшто планирате и кога да има центар за болни од цистична фиброза зошто по 18 години се упатуваат на Клиниката за пулмологија каде нема услови за овие пациенти“, праша Ристески.
Ристески се осврна и на Извештајот на Стејт департментот кој е најлош извештај за состојбата со човековите права.
„Висока корупција, бавна правда е карактеристика за Извештајот. Според истиот Владата е најкорумпираниот елемент на државата, а корупцијата неизлечива болест за оваа Влада или краде кој ќе стигне, а корупција има во сите ешалони на власта. Ковачевски ако ветува ветинг треба да почне од себе, затоа новиот министер за правда Кренар Лога наместо да водите гол популизам треба да одговори што ќе преземе ваквите негативни извештаи да станат минато“, посочи Ристески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре променливо облачно и релативно топло
Времето утре ќе биде променливо облачно и релативно топло.
Претпладне ќе има слаб локален дожд, а по одделни котлини ќе има појава на магла. Кон крајот на денот и во текот на ноќта во западните делови ќе има врнежи од дожд. На повисоките планини во северозападните делови врнежите ќе бидат од снег. Ќе дува слаб до умерен, а во западните делови наместа повремено засилен ветер од западен правец. Минималната температура ќе биде во интервал од 2 до 5, а максималната ќе достигне од 11 до 18 степени.
Во Скопје, времето ќе биде променливо облачно со сончеви периоди. Претпладне во делови од котлината ќе има појава на магла. Ќе дува слаб променлив ветер. Минималната температура ќе се спушти до 3, а максималната ќе достигне до 15 степени.
Во наредните денови следува период на променливо време. Во недела претпладне ќе има локални врнежи од дожд, а на планините во северозападните делови од снег. Врнежи од дожд ќе има и во понеделник кои ќе бидат поинтензивни во југоисточните делови, а на планините ќе бидат од снег. Поради продор на постуден воздух врнежите од дожд ќе преминуваат во снег и на некои од повисоките места. Потоа во следните два дена ќе се задржи претежно стабилно време, а нови врнежи повторно се очекуваат од четврток.
Македонија
Трипуновски: Работиме на стабилен откуп и цена на суровото млеко
Министерот за земјоделство, шумарство и водостопанство, Цветан Трипуновски оствари средба со претставниците на поголемите млекарници во државата, на која се разговараше за стабилен откуп и цена на суровото млеко, покрај тоа што европскиот пазар и регионот се соочуваат со вишок на млеко.
На средбата се договори дека откупната цена на суровото млекото ќе биде стабилна, како и дека нема да има неоткупено млеко од страна на млекарниците.
Ќе се засилат контролите на пазарот со фокус на безбедноста и квалитетот на млекото и млечните производи, како и на добиточната храна.
Министерството останува посветено на унапредување на млекопроизводниот сектор и обезбедување на одржливи услови за фармерите и млекарниците, велат од таму.
Македонија
ЗНАМ до СДСМ: Димитриевски нема „златни визи“, не е вмешан во скандали и не оди на журки во Дубаи
Движењето ЗНАМ – За Наша Македонија обвини дека СДСМ со нападите врз Максим Димитриевски и партијата се обидува да ја дефокусира јавноста од сопствената политичка и економска катастрофа. Во соопштението, ЗНАМ ги нарекува обвинувањата на СДСМ „политичка манипулација и замајување“, оценувајќи ги како „неосновани, тенденциозни и без докази“.
Од партијата велат дека Димитриевски има лична и професионална кариера надвор од политиката и дека не бил поврзан со корупциски скандали.
„За разлика од двоецот Заев-Филипче кој ги троши народните пари по луксузни јахти низ светот, тој не поседува ‘златни визи’ и не оди на журки во Дубаи“, се наведува во соопштението.
Според ЗНАМ, сите јавни набавки и финансиски постапки се спроведуваат законски и под надзор, а партијата останува доследна на принципите на отчетност и јавна одговорност. „Политиката за нас не е приватен бизнис, туку јавна одговорност во интерес на граѓаните“, велат од движењето.

