Македонија
(Видео) Стоилковски: Груби манипулира за дивоградба од над160 кватратни метри без одобрение

Во Бутел, во Радишани, од Општината е сопрена почната градба на диво за која има основано сомневање дека зад неа стои Артан Груби, а градител е негов братучед, објави на прес-конференција портпаролот на ВМРО-ДПМНЕ, Наум Стоилковски.
Како што рече, Груби се смета за толку моќен и над законот што може со партиско соопштение да дозволи градба без документи. И ако стане видлив криминалот или нелегалноста, тој смета дека може да се повика на партијата и функцијата и со тоа да остане неказнет.
„Објект над 160 квадратни метри да никне без одобрение и решение од Општината. Никој не е против градба, ниту сопирањето има етничка заднина, ВМРО-ДПМНЕ е против криминалот, а градење без документи е криминал! И тоа го боли Артан Груби! Артан Груби злоупотребува партиски соопштенија и повикува на етнички мотивирани дејства, само затоа што е сопрена дивоградба!
Кога Груби преку партиски соопштенија ја манипулира јавноста дека наводно некој забранува Албанците да градат во општините, притоа злоупотребувајќи го албанскиот етникум за политички цели, Артан Груби мислел на семејната дивоградба, градба за која сè уште нема дозвола!
Сè додека Артан Груби смета дека етничката припадност е професија и е основа за неказнивост, тој нанесува штета и на државата, и на Албанците и на сите во Македонија.
Залудно е тоа што Артан Груби секогаш кога е фатен во тесно се повикува на етничка припадност и се заканува.
Никој веќе не им верува на неговите приказни. По деловниот простор на брат му, по фирмата за баждарење, по продажбата на хотелот на Попова Шапка, по тендерот за надзор вреден 22 милиона евра, сега и дивоградба, станува дел од портфолиото скандали на Груби и редно време е Обвинителството да се позанимава посериозно со овој лик“, рече Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За да нема одење на партиски митинзи со службени возила, Владата апелира сите институции што не го почитуваа рокот 18 август да поднесат пријави

Непослушните државни институции, кои до 18 август не ги пријавија службените возила, денес од Владата добија уште еден апел да го сторат тоа. Државната комисија за спречување корупција се пожали дека иако институциите располагаат со 6.500 возила, во дадениот рок се пријавени помалку од една третина од возилата, односно само 1.916 службени возила со кои располагаат.
„Јас ја видов оваа вест од Државната комисија за спречување корупција и еве како портпарол на Владата апелирам до сите институции да го поднесат бројот на службените возила. Веќе е донесена и одлука на седница на Владата дека рокот за поставување на регистарските таблички во боја е до 15 септември. И тоа ќе го завршиме сè во насока на тоа да нема повеќе злоупотреби на службени возила за цели што се надвор од службените“, рече портпаролката на Владата, Марија Митева.
Сите институции што користат државни службени возила имаа рок до 18 август да со пријават колку возила располагаат, од која марка, која година на производство се и да го пријават регистарскиот број на секое возило.
Државната комисија за спречување корупција во рок од 15 дена по истекот на рокот за пријавување на службените возила може да поднесе прекршочна пријават против непослушните институции.
Од институциите беше побарано да ги пријават служените возила за да се спречат злоупотреби во пресрет на локалните избори откога вицепремиерите Изет Меџити и Арбен Фетаи беа фотографирани како околу полноќ ги паркираат службените возила пред деловно-трговскиот центар „Мавровка“. Тие јавно не дадоа објаснување на каков состанок биле иако и премиерот Христијан Мицкоски рече дека лично ќе ги праша дали користеле службени возила за приватни или за партиски цели. Возилата на вицепремиерите беа паркирани во близина на партиски штаб на „Вреди“ од кај што доаѓаат и двајцата.
За полесно да може граѓаните да пријават злоупотреби, до 15 септември сите службени возила треба да добијат таблички во боја.
Македонија
(Видео) Митева: Од 8 активни меѓународни арбитражи, оваа Влада успешно заврши 3 во полза на Македонија

Од осум активни меѓународни арбитражи оваа Влада успешно заврши три во полза на Македонија, соопшти портпаролката на Владата, Марија Митева.
„По вчерашната информација дека Македонија го доби случајот познат како Казандол и заштеди 115 милиони евра, пари на граѓаните, цениме дека јавноста има потреба да ги знае работите, кои во согласност со класификацијата на доверливост може да се споделат во јавноста. Оваа победа не е само правен успех, туку јасна порака дека државата може да ги брани своите интереси кога настапува организирано, со посветеност и со сериозна работа“, рече Митева.
За обвинувањата од СДСМ дека оваа арбитражна постапка била добиена и завршена уште во 2023 година кога тие биле дел од Владата, Митева побара, прво, да одговорат зошто во 2023 во првата половина од април во Виена се водени преговори за можна спогодба со Казандол помеѓу претставници од владата и претставници од страна на тужителите и, второ, зошто тогаш оваа влада носи одлука и зазема став да ја одбие предложената спогодба?
„Генералната состојба е следна – со доаѓањето на новата Влада во јуни 2024, таа наследи 8 активни меѓународни арбитражни постапки, што претставува рекорден број активни арбитражни постапки во даден момент, од кои 3 постапки беа инвестициски спора 5 трговски, како и најава со опомени пред тужби за најмалку уште 4 постапки. Во сите активни арбитражни постапки потенцијалната штета за буџетот на државата беше во износи од 865 милиони евра плус трошоци во постапките“, рече Митева.
Таа праша зошто токму во периодот на претходната влада биле отворени толку многу меѓународни спорови, дали всушност се создавал терен за вонсудско решавање на споровите и начин за испумпување пари од буџетот на граѓаните.
Митева рече дека Владата на ВМРО-ДПМНЕ има успешно завршено вкупно 3 арбитражни постапки во полза на Македонија и е направена заштеда на буџетот во износ од речиси 565 милиони евра и дополнително за овие 14 месеци нема нови отворени постапки.
Постапките што се завршени се арбитражна постапка, позната како „Казандол против Македонија“, со вредност од речиси 115 милиони евра, арбитражна постапка, позната како „САСА против Македонија“, со вредност од 445 милиони евра и арбитражна постапка „ГАМА против Македонија“, со вредност од над 5 милиони евра.
Македонија
СДСМ: Скандалот со испитниот центар во МВР мириса на корупција, бараме истрага

Портпаролката на СДСМ, Богданка Кузеска, денеска обвини дека тендерот за организирање возачки испити во МВР е тежок скандал и „смрди на корупција“.
Според Кузеска, новооснована фирма зад која стои советник на ВМРО-ДПМНЕ добила милионски договор и петгодишен монопол за полагање возачки испити во Битола, Прилеп и Ресен, иако, како што рече, не ги исполнувала основните услови за работа. Таа потсети дека МВР прво ја лиценцирало фирмата, а сега истиот тој испитен центар бил затворен бидејќи немал документација, стручен кадар и возила.
„Дали милионскиот тендер бил доделен само затоа што зад фирмата стои советник на ВМРО-ДПМНЕ? Ова се јасни индиции за однапред наместен тендер и корупција кои мора да се истражат“, изјави портпаролката на СДСМ.
Партијата побара Државната комисија за спречување корупција да отвори предмет, а Обвинителството да покрене истрага за да се утврди одговорност.