Македонија
Коалиција „Сите за правично судење“ загрижена за постапувањето на судечкиот совет во врска со автобуската несреќа кај Ласкарци
Коалицијата „Сите за правично судење“ со загриженост гледа на постапувањето на судечкиот совет во предметот К-1407/19, а во врска со автобуската несреќа што се случи во 2019 година кај селото Ласкарци.
Коалицијата, потсетуваат од таму, веќе реагира на фактот што во временски период од над 1 година не беше одржано ниту едно рочиште за главна расправа бидејќи се чекаше да биде изготвено супервештачење по наредба на судот, а тој не ги примени законските одредби што ги има на располагање за да се осигури дека вештачењето ќе биде изготвено во разумен рок.
Додаваат дека откога беше доставено супервештачењето до Основниот кривичен суд Скопје, Ссдот на ден 24.1.2023 година закажа ново рочиште за главна расправа, на кое беше констатирано дека поради истек од 90 дена од последно одржано рочиште, главната расправа ќе почне одново и таа на наредното рочиште ќе продолжи во фаза на дополнение на доказна постапка, со изведување материјален доказ – супервештачење и испитување вешти лица што го изготвиле.
„Откако супервештачењето беше изготвено, беа закажани рочишта за негова презентација и за испитување на вештаците што го изготвиле, но, за жал, повторно и на овие рочишта коалицијата преку своите професионални судски набљудувачи детектира несоодветна примена на одредбите од Законот за кривичната постапка, овој пат на одредбите што го предвидуваат начинот на кој се врши испитување вешто лице на рочиште за главна расправа пред судот 2, како и постапувањето на судот со вешто лице или сведок што не е испитан.
Имено, на закажаните рочишта за главна расправа на 26.1.2023 година и на 2.2.2023 година, испитувањето на вештите лица било спроведено на начин што судот донел решение еден член од тимот да стои во делот предвиден за давање исказ и да дава одговор на прашањата што ќе му бидат поставени, а сите други вешти лица да останат и бидат присутни во судницата и да дополнуваат на претходно дадените одговори од страна на вештакот што се испитува од странките. Освен дополнување на дадените одговори, во повеќе наврати било забележано, наместо вештото лице што се испитува, одговори на поставените прашања да бидат дадени од страна на другите вешти лица од тимот присутни во судницата. Ваквиот начин на испитување бил дозволен од страна на судечкиот совет со образложение дека предметното супервештачење било изготвено од страна на вкупно четири вешти лица, сите тие заедно како тим работеле на неговото изготвување, вештачењето е потпишано од секој индивидуално и сите вешти лица пред судот имаат дадено, односно положено заклетва, иако јавниот обвинител оправдано се спротивставил на ваквиот начин на испитување на вештите лица“, додаваат во реакцијата од коалицијата.
Истакнуваат дека, без разлика на бројот на вешти лица што се вклучени во изготвување на едно вештачење (во случајот супервештачење), ваквата практика на постапување од страна на судечкиот совет при испитувањето на вешто лице е спротивна на одредбите од Законот за кривичната постапка, кои го регулираат овој дел, поради повеќе причини.
„Најнапред, во согласност со одредбите од ЗКП, конкретно членот 378, вештите лица може да присуствуваат во текот на главната расправа и да го следат судењето, односно да може да ги чујат исказите на сведоците што ќе бидат испитани, како и да се запознаат со другите докази што ќе бидат изведени во текот на главната расправа. Оваа одредба во ниту еден случај не значи дека тие може да даваат одговори на прашања што им се поставуваат на други вештаци, кои се предмет на испитување, или со други зборови, законот не предвидува можност за тимско одговарање на прашањата што се поставуваат за конкретното вештачење. Дотолку повеќе што согласно членот 360 од ЗКП претседателот на судечкиот совет е должен да ги предупреди присутните во судницата да не го нарушуваат текот на расправата, па дури може да нареди од заседанието да се отстранат лицата што како слушатели присуствуваат на главната расправа доколку тие и по опомената го нарушуваат одржувањето на главната расправа“, предупредуваат во соопштението.
Согласно членот 389 „судот може да нареди испитаните сведоци и вештаци да се отстранат од судницата и подоцна повторно да бидат повикани и повторно да се испитаат во присуство или отсуство на други сведоци или вештаци“, па така во конкретниот случај би било сосема оправдано доколку вештаците кои не биле испитани, се отстранат од судница, па дури откако би било утврдено евентуално несовпаѓање на нивните искази, да бидат повикани сите заедно во судницата со цел истите да се соочат и да се утврдат причините за неконзистентните искази на лицата кои го изготвиле вештачењето. Сепак, дури и во таков случај, соочувањето не би смеело да биде направено на начин што сите вештаци истовремено ќе одговараат на истото прашање, нагласуваат од „Коалицијата сите за правично судење“.
На ова, како што додаваат, се надоврзува членот 387, став 4 од ЗКП согласно кој „ако некоја од странките бара вештото лице да се испита на главната расправа, писмениот наод и мислење ќе бидат прифатени како доказен материјал само ако вештото лице кое го изработило вештиот наод и мислење дало свој исказ на главната расправа и била дадена можност да биде вкрстено испрашано“. „Во конкретниот случај, освен вештото лице кое било повикано да даде исказ пред Судот, ниту еден друг член од тимот на вешти лица кој бил присутен во судницата не смеел да одговара на прашањата што биле поставувани додека не биде повикан да сведочи, бидејќи на овој начин de facto се заобиколува можноста странките директно и вкрстено да ги испитаат сите вешти лица кои го изготвиле вештачењето. Ова е особено битно доколку се има предвид дека вкрстеното испитување е веројатно најголемата можност за дискредитација на вештото лице, односно дискредитација на изготвеното вештачење во целина, нешто што не е возможно да биде направено доколку истовремено се испитуваат сите вешти лица. Поради ова, Судот требало да повика едно од вештите лица согласно предлозите на странките, па дури откако ќе биде констатирано дека испитувањето на тоа вешто лице е завршено, да биде повикан друг вештак од тимот за да биде испитан, и така натаму додека не биде испитан и последниот член од тимот на вешти лица кои го изготвиле супервештачењето во рамките на овој судски предмет“, истакнуваат во реакцијата.
Коалицијата апелира судечкиот совет во оваа судска постапка, со должно внимание да го следи текот на главната расправа и испитувањето на вештите лица да го спроведе на начин што доследно ќе бидат испочитувани и соодветно толкувани релевантните одредби од Законот за кривичната постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Зеленски и ја честиташе победата на Гордана Силјановска Давкова
Денеска, 9 мај 2024 година, на социјалната мрежа „Икс“ по повод големата победа на професорката Гордана Сиљановска-Давкова на претседателските избори, се огласи ѝ претседателот на Република Украина, Володимир Зеленски. Во неговата честитка упатена до професорката Гордана Сиљановска-Давкова на англиски и на украински јазик, стои:
„Честитки до Гордана Сиљановска-Давкова за нејзината убедлива изборна победа. И посакувам успешен и плоден мандат. Го цениме нашето силно партнерство и ја цениме поддршката на Скопје за Украина во борбата против руската агресија. Со задоволство очекувам да ја зајакнеме нашата билатерална соработка со цел да ги вратиме мирот и стабилноста во нашата обединета Европа.“
Congratulations to Gordana Siljanovska-Davkova @gogamkd on her convincing election victory. I wish her a successful and fruitful tenure. We value our 🇲🇰🇺🇦 strong partnership and appreciate Skopje's support for Ukraine in countering Russian aggression. I look forward to further…
— Volodymyr Zelenskyy / Володимир Зеленський (@ZelenskyyUa) May 9, 2024
Професорката Гордана Сиљановска-Давкова се заблагодари на честитката на украински, македонски и на англиски јазик истакнувајќи го следново:
„Почитуван претседателе Зеленски, денеска кога го славиме Денот на Европа исто така се потсетуваме дека судбината на украинската нација е под закана. Ние ја поддржуваме Украина и ја нудиме солидарноста на сите македонски граѓански за постигнување на праведен мир и вистинска долгорочна безбедност. Ниту една европска нација, која ги споделува и брани заедничките европски вредности, не смее да биде изоставена од европското единство. Очекувам дополнително да ја зајакнеме билатералната соработка и се надевам на брз прием на нашите две земји во ЕУ.“
Македонија
Честитки за победата на Силјановска-Давкова пристигнуваат од региониот и Европа
Честитки за победата до професорката Гордана Сиљановска-Давкова, денеска упати претседателката на Република Словенија, Наташа Пирц Мусар која го напиша следново: „Честитки професорке Гордана Сиљановска-Давкова на Вашиот избор за прва жена претседателка на Република Македонија, наш пријател и НАТО сојузник. Во духот на Денот на Европа, очекувам заедно да работиме во градењето на европската иднина за вашата земја, народот и целиот Западен Балкан.“
Во одговорот на честитката, професроката Гордана Сиљановска-Давкова ги упати следните зборови: „Драга Наташа, благодарам на честитките и пријателската поддршка. Секогаш особено ми значи женската солидарност. Радува фактот што како жени имаме можност заедно да градиме нова перспектива за нашиот регион. Продолжуваме кон пријателска и уште поголема соработка со Словенија. Денес, славејќи го Денот на Европа, се повикуваме на европските цивилизациски вредности кои се дел од културата нашите две земји и во таа насока истакнувам дека безрезрвно ќе се залагам тие вредности заедно да ги споделуваме и во иднина кога Македонија ќе стане дел од ЕУ“.
Честитка по повод победата на изборите до професорката Гордана Сиљановска-Давкова и лидерот на ВМРО-ДПМНЕ, Христијан Мицкоски беше упатена и од заменик претседателот на пратеничката група ЦДУ/ЦСУ, Јохан Вадефул во која тој ја потенцира убедливата победа на ВМРО-ДПМНЕ. Имено во честитката е наведено: „Убедлива победа на нашата сестринска партија од семејството на ЕПП, ВМРО-ДПМНЕ и нашите македонски пријатели. Од се срце и честитам на новата претседателка, професорката Гордана Сиљановска-Давкова и на лидерот Христијан Мицкоски за нивните победи. Заедно ќе продолжиме да маршираме на патот кон стабилноста и просперитетот на Зaпаден Балкан и брзиот пристап кон ЕУ“.
Професорката Гордана Сиљановска-Давкова упати благодарност на честитката во која истакна: „Почитуван господин Вадефул, ајде да ги продолжиме нашите разговори и да овозможиме брз влез на Македонија и на целиот Западен Балкан во ЕУ, како единствен начин за траен мир, стабилност и просперитет во целиот регион.“
Со честитка се огласи и претседателката на Република Косово, Вјоса Османи која меѓудругото истакна: „Честитки до професорката Гордана Сиљановска-Давкова за нејзината победа на претседателските избори во Македонија, како и на нејзиниот избор за прва жена претседателка на државата. Косово и Македонија негуваат одлични соседски односи и споделуваат силна посветеност кон евро-атланаската интеграција. Очекувам соработка со претседателката во насока на остварување на заедничката цел и понатамошно продлабочување на косовско-македонските односи.“
Со одговор на честитката се јави и професорката Гордана Сиљановска-Давкова која напиша: „Почитувана Вјоса, ме радува Вашата искрена честитка. Среќна сум поради фактот дека жените во нашиот регион испишуваат политичка историја застанувајќи храбро на клучни позиции. Очекувам и понатаму да продолжиме со соработката за конечно да ја постигнеме клучната стратешка цел, евроинтеграција на целиот регион, како и да ги зацврстиме нашите односи преку една „женска“ синергија.“
Честитки по повод победата беа упатени и од страна на претседателот на Република Латвија, Едгар Ринкевич. Во неговата честитка се вели: „Честитки до Гордана Сиљановска-Давкова на нејзиниот избор за претседателка на Македонија. Со задовлство очекувам да продолжиме со развој на соработката помеѓу нашите две земји.“
Во одговорот на честитката, професорката Сиљановска-Давкова наведе: „Ви благодарам многу претседателе Ринкевич. Ајде зедно да работиме за зацврстување на македонско-латвиската соработка во НАТО и на заокружување на европската интеграција“.
Со своја честитка се огласи и претседалот на Република Црна Гора, Јаков Милатовиќ кој наведе: „Честитки до првата претседателка на Македонија, Гордана Сиљановска-Давкова на изборната победа. Пријателските односи помеѓу Македонија и Црна Гора се темелат на меѓусебната довера на нашите два народи. Со желба успешно да ја извршувате функцијата на претседател, се радувам на заедничката соработка на зацврствување на добрососедските односи и европската перспектива на целиот регион.“
Благодарност за честитката упати професорката Гордана Сиљановска-Давкова истакнувајќи: „Почитуван претседателе Милатовиќ, македонско-црногорските односи се редок пример на совршена соработка меѓу два балкански народи. Регионалната кооперација е еден од столбовите на мојата програма и се надевам дека заедно ќе го довршиме патот на нашите држави кон ЕУ.“
До професорката Гордана Сиљановска-Давкова пристигнаа честитки и од претседателот на Република Албанија, Бајрам Бегај кој наведе: „Честитки до професорката Гордана Сиљановска-Давкова за нејзиниот избор за прва жена претседател на Македонија. Уверен сум дека заедно ќе продолжиме да ги јакнеме нашите одлични односи помеѓу нашите пријателски земји, двете како членки на НАТО и идни членки на ЕУ, идеја на која останува посветена и албанската заедница во Македонија.“
Во одговор на честитката, професорката Сиљановска-Давкова истакна: „Почитуван претседателе Бегај, клучот за европската интеграција на Балканот се наоѓа во развојот на нашата регионална соработка. Ве повикувам заедно да работиме на унапредувањето на македонско-албанските односи, како и на нашата европска интеграција.“
Честитки на македонски, албански и англиски јазик упати и поранешниот претседател на Република Албанија, Илир Мета. Во неговите честитки стои: „Изразувам најсрдечни честитки до госпоѓата Гордана Сиљановска-Давкова по повод нејзиното успешно преземање на високата функција како прва жена претседателка избрана во Македонија. Со голема доверба верувам дека таа ќе одигра значајна улога во продлабочувањето на веќе одличните соседски односи помеѓу нашите две земји и народи, како и во унапредувањето на меѓуетничкиот соживот во Македонија. Уверен сум дека претседателката ќе придонесе кон импулс на билатералните односи во насока кон заедничките аспирации за што поскоро интегрирање во Европската Унија.“
Благодарност за честитките упати и професорката Гордана Сиљановска-Давкова, во нејзиниот одговор е наведено: „Почитуван претседателе Мета, Ви благодарам на честитките и на Вашите искрени напори за подобрување на македонско-албанските односи. Очекувам дека со истиот силен ентузијазам ќе го продолжиме и чекорењето на нашите две држави кон целосната европска интеграција.“
На социјалната мрежа Х, честитки по повод победата на претседателските избори до проф. д-р Гордана Сиљановска-Давкова, упати амбасадорката на Соединетите Америкнски Држави во Република Македонија, Анџела Агелер.
Во честитката на Агелер стои: „Моите срдечни честитки до Гордана Сиљановска-Давкова за нејзиниот историски избор за прва жена претседателка на Македонија. Честитки и сите граѓани кои го искористија нивното право на глас вчера, на претседателските и парламентарните избори. Соединетите Американски Држави ќе продолжат да ги поддржуваат вашите цели за безбедност, просперитет и целосна евро-атланска интеграција на државата.“
Благодарност за честитката упати професорката Гордана Сиљановска-Давкова истакнувајќи: „Почитувана амбасадорке Агелер, Ви благодарам на честитките. Очекувам да го обновиме духот на македонско-американските односи, да ја прошириме рамката на нашето стратегиско партнерство и соработка, како и евро-атланската димензија, така и билатерално.“
Честитка на македонски јазик упати и амбасадорот на Велика Британија во Република Македонија, Метју Лосон во која се истакнува: „Честитки до професорката Гордана Сиљановска-Давкова, првата избрана жена претседател на Македонија. Продолжуваме да ги зацврстуваме британско-македонските односи, да ги зближуваме нашите култури и народи и да работиме заедно како блиски сојузници и партнери во НАТО“.
По повод честитката се огласи и професорката Гордана Сиљановска-Давкова која напиша: „Почитуван амбасадоре, дозволете ми да ја изразам мојата благодарност за Вашите убави зборови, посебно додека ги читам на мојот мајчин јазик. Очекувам да го продолжиме патот на јакнење на македонско-британските односи и нашиот сојуз во рамките на НАТО!“
Честитки до професорката Гордана Сиљановска-Давкова пристигнаа и од Мисијата на ОБСЕ во Скопје. Во нив се вели: „Мисијата на ОБСЕ во Скопје и ја честита победата на претседателските избори на професорката Гордана Сиљановска-Давкова! Се радуваме на идната блиска соработка во иднина.“
Во одговорот на честитката професорката Гордана Сиљновска-Давкова наведе: „ОБСЕ беше секогаш составен дел од на приказната на македонската демократизација, работејќи со нашите институции за подобрување на владеењето на правото, правата на малцинствата, полициската реформа, инклузивното образование и другите клучни реформски процеси. Продолжуваме.“
Честитки за изборната победа упати и Постојаниот координатор на ООН во Македонија, Росана Дуџак: „Честитки за Гордана Сиљановска-Давкова на нејзиниот избор за претседателка на Македонија. Обединетите Нации со задоволство очекуваат продолжување на соработката за унапредување на човековите права, родовата еднаквост и одржливиот развој под Ваше лидерство.“
Професорката Гордана Сиљановска-Давкова се одговори на честитката потенцирајќи: „Драга Росана, благодарам на Вашите честитки. Мојата програма има силен фокус на продлабочување на македонската димензија во сите мултилатерални форуми и агендата на ООН во однос човековите права, родовата еднаквост и одржливиот развој, како на локално, така и на глобално ниво.“
Со своја честитка се огласи и поранешниот министер и пратеник во Парламентот на Република Албанија, Генц Поло. Во неговата честитка стои: „Честитки за професорката Гордана Сиљановска-Давкова на нејзината убедлива изборна победа во вториот круг. Посакувам нејзиното водство на народот да биде кон домашна и меѓународна хармонија.“
Во својот одговор професорката Гордана Сиљановска-Давкова наведе: „Почитуван господине Генц Поло, Ви благодарам за охрабрувачките пораки и се надевам декаи натаму ќе работиме на неопходните реформи за европската интеграција на нашите држави.“
Честитки за професорката Гордана Сиљановска-Давкова и ВМРО-ДПМНЕ, стигнуваат и од организациите во кои членува партијата, а кои се во фокус на поддршка за идното владеење.
Интересно е што професорката Гордана Сиљановска-Давкова оддаде почит кон сите што упатија свои честитки одговарајќи на нивните јазици покрај одговорите на англиски јазик.
Македонија
Можни се излевања на Крива Река по нејзиниот слив, ако продолжи водостојот да расте, предупреди ЦУК
Центарот за управување со кризи информира дека од УХМР известуваат дека водостојот на Крива Река на хидролошката станица во Крива Паланка е значително висок. Ако продолжи водостојот да расте можни се излевања на Крива Река по нејзиниот слив.
Од УХМР предупредуваат за внимателност при движење покрај сливот на Крива Река.
Истовремено, ЦУК, потсетува за голема внимателност при појавата на локалните нагли метео промени и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја.
Инаку, според днената хидролошка информација и очекуваната тенденција за водостојот на реките и езерата на УХМР, нивото на водостоите е во покачување, додаваат од ЦУК.