Македонија
Лекарската комора: Здравствените работници се најважниот капитал на здравствениот систем
Лекарите и другите здравствени работници се најважниот капитал на здравствениот систем што треба да се почитува, заштити, поддржи и навремено да се надополнува за системот да биде во кондиција, да испорачува квалитетна здравствена заштита, истакнува Лекарската комора по повод одбележувањето на 7 Април, Светскиот ден на здравјето, велат од Лекарската комора.
Пандемијата предизвикана од Ковид-19, според нив, покажа дека заштитата на здравјето е од фундаментално значење за одржување на сите други системи во едно општество поради што треба да се инвестира во сите негови сегменти, особено во здравствените работници, кои се сржта на тој систем. Лекарите како основни носители на здравствената дејност очекуваат трудот што го вложуваат да биде соодветно валоризиран, да имаат можности за професионален раст и развој и да се чувствуваат безбедно на работните места.
Лекарската комора како стручно здружение води регистар на издадени, продолжени и обновени лиценци за работа, според кој има 9.520 активни докторки лиценци. Лиценците се издаваат со период на важење од 7 години по што се обновуваат во согласност со законските услови. Минатата година 435 доктори на медицина положиле стручен испит и првпат стекнале лиценца за работа. Трендот на миграција на лекарите е присутен, но кај нас поголем проблем е што имаме концентрација на голем број лекари во Скопје. Доколку се изнајдат механизми за редистрибуција на постојниот кадар, значително би се подобрила достапноста на медицинските услуги на целата територија во државата. Сериозен притисок за наредниот период прави и старосната структура на лекарите што сега работат, особено во одредени сегменти на здравствениот систем.
За да ги задржиме лекарите во нашата земја, особено е важно и да се поедностави политиката за вработување во јавното здравство. На младите лекари неопходно е да им создадеме услови за вработување веднаш по завршување на образованието, кои ќе им гарантираат пристојни приходи, но и олеснување на условите за специјализација, за што се направија некои позитивни промени, но процесот сè уште не е завршен. Реформите во примарното здравство исто така очекуваме да имаат позитивен импакт на ова прашање.
Комората истакнува и дека од голема важност за здравјето на пациентите, работењето на лекарите и за функционирање на системот воопшто е да престане јавениот линч и осуда на лекарите и здравствените работници, без да се има аргументи за тоа. Лекарите посветено ги извршуваат своите работни обврски и максимално се залагаат да дадат квалитетна здравствена заштита во согласност со расположливите услови за работа и искрено се борат за животот на секој пациент. Загубата на пациент е тежок удар за секој лекар, што никогаш не може целосно да се надмине. Треба да се има предвид и дека медицинските состојби во одредени случаи знаат да бидат многу комплицирани, болестите да не се прикажат со типични симптоми, а одговорот што го дава третманот да не биде како што се очекува.
За да се одговори на овие предизвици, Лекарската комора го поддржува повикот на Светската здравствена организација за преземање итна акција за регулирање на прашањето со здравствените работници и поставување на овој проблем како стратешки приоритет. Според процените на СЗО, до 2030 година се очекува да има недостиг на 10 милиони здравствени работници во светот, а овој проблем особено ќе биде изразен во земјите во развој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пожарникарите извлекоа паднат човек во реката Драгор
Регионалниот ЦУК Битола информира дека пожарникарите од ТППЕ Битола од 18.45 до 19.35 часот, со четири пожарникари и едно противпожарно возило интервенирале на извлекување паднат човек во река Драгор кај месноста „Сали Мост“.
Паднатото лице не било повредено.
Од ЦУК апелираат за голема внимателност при појава на локалните нагли метео промени, да се избегнува движење во засеци во природата, суводолици и многу блиску до речни корита… и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја, внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови.
Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.
Македонија
Променливо облачно со повремени локални врнежи од дожд
Времето денеска ќе биде променливо облачно со повремени локални врнежи од дожд. Попладне на повеќе места ќе биде нестабилно со пороен дожд и грмежи локално во форма на краткотрајно невреме со интензивен пороен дожд, силен ветер и изолирана појава на град. Минималната температура ќе биде во интервал од 12 до 16, а максималната ќе достигне од 22 до 27 степени.
Во Скопје променливо облачно со повремен дожд. Попладне во делови од котлината ќе биде нестабилно со пороен дожд, грмежи и услови за појава на краткотрајно невреме. Минималната температура ќе се спушти до 16, а максималната ќе достигне до 26 степени.
До среда ќе се задржи нестабилно време, претежно во попладневните часови со локален пороен дожд и грмежи. Наместа ќе има услови процесите да бидат поинтензивни во форма на краткотрајно невреме, со засилен ветер, обилен пороен дожд за кратко време и изолирана појава на град. Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Скопје
Делови од три скопски општини денеска без струја
Според добиеното известување од ЕВН Македонија, Регионалниот центар за управување со кризи информира дека поради реконструкција денеска без снабдување со електрична енергија ќе останат делови од три скопски општини.
Во периодот од 09:00 до 15:00 часот без напојување ќе останат корисниците на дел од село Долно Лисиче, реонот околу чаталот, ул.10 во општина Аеродром.
Во периодот од 10:30 до 14:30 часот без напојување ќе останат корисниците дел од улица 16, на патот кон Визбегово во општина Карпош.
Во периодот од 13:00 до 14:30 часот без напојување ќе останат објектите на градинката Росица, на улица Мечкин Камен, број 45А. во општина Ѓорче Петров.