Македонија
Кисела Вода со мерки за сузбивање на булингот

Кисела Вода е првата општина што ќе понуди системско решение за справување со булингот. На денешната одржана седница на локалниот совет за превенција градоначалникот Ѓорѓиевски ја промовира првата од сетот мерки, која од денес им стои на располагање на жртвите од врсничко насилство или на нивните блиски. Имено, од денес функционира телефонската линија 078/358 639, каде што тие може да добијат поддршка од тим од психолози од невладиниот сектор, кои потоа, во координација со општинските служби, ќе дејствуваат директно во училиштето за спречување на насилната појава. Тоа се спроведува заедно со младинскиот центар „Крик“, чиј претседател Мила Ангелевска-Кардафова е еден од психолозите што ќе овозможи бесплатна помош и поддршка.
„Справувањето со булингот бара сеопфатен пристап, кој ги вклучува семејството, врсниците, но и институциите. Многу често тој не се препознава, се игнорира, а за жал, понекогаш и се минимизира оневозможувајќи на тој начин жртвата да добие помош. Како локална самоуправа, свесни сме дека сме важен дел во изнаоѓање на решението бидејќи превенцијата е првата станица. Училиштата што се во наша надлежност се места каде што најчесто се случува агресивното однесување, а тоа не застанува таму, туку продолжува да ги следи децата во домот преку интернет-мрежите. Потребна е едукација. И за децата, без разлика дали се жртви или се сведоци на булинг, и за наставниците и директорите во училиштата и градинките, кои не смее да бидат само неми набљудувачи. Решението има адреса. Но, некој треба проблемот да го пријави, треба да реагира и да ја заштити жртвата. Во изминатиот период во основните училишта во општина Кисела Вода поставивме кутии за анонимни пријави за меѓуврсничко насилство. Воедно, во насока на создавање систем што го спречува психолошкото насилство сакам да го промовирам новитетот што го спроведуваме заедно со здружението на граѓани „Крик“. Од денес жртвата на насилство или личноста блиска до неа може да се јави на телефонскиот број 078/358 639 и да го пријави проблемот, каде што психолози ангажирани од невладиниот сектор, во координација со општинските служби, ќе дејствуваат директно во училиштето за спречување на насилната појава. На овој начин ќе може да се надминат стравот и срамот за проблемот да се пријави, како и да се изнајде начин што побезболно тој да се реши“, истакна градоначалникот Орце Ѓорѓиевски.
На настанот учество зедоа и претставници од Основно јавно обвинителство Скопје, ПСОН Кисела Вода и ПСОН Драчево, од Одделението за превенција при СВР Скопје, од Министерството за труд и социјална политика, од Основниот суд во Скопје, претставници на советите на родители од основните и средните училишта, директори на училиштата и градинките, како и многу ученици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.