Економија
Богаташите масовно ја напуштаат Норвешка, земјата ќе изгуби десетици милиони евра

Рекорден број супербогати Норвежани ја напуштаат земјата и одат во земји каде има ниски даноци. Тие ја напуштаат земјата откако владата на левиот центар го зголеми данокот на богатство за 1,1 отсто.
Повеќе од 30 норвешки милијардери и мултимилионери ја напуштиле Норвешка во 2022 година, покажува истражувањето на весникот „Дагенс неринглив“. Бројот на супербогати луѓе кои ја напуштиле Норвешка минатата година бил поголем отколку во претходните 13 години.
Се очекува повеќе богати Норвежани да ја напуштат земјата оваа година поради зголемувањето на данокот на богатство во ноември, што ќе ја чини владата десетици милиони евра изгубени даночни приходи. Многумина се преселиле во Швајцарија, каде данокот е многу помал, пишува „Гардијан“.
Меѓу оние кои се преселиле е и индустрискиот тајкун Кјел Инге Роке, кој се преселил во Лугано, во близина на езерото Комо и модниот центар на Европа, Милано. Роке (64) е четвртиот најбогат Норвежанец, чие богатство се проценува на 1,65 милијарди евра.
Во отвореното писмо, тој рече дека го избрал Лугано за негова нова резиденција, која не е ниту најевтина, ниту има најниски даночни стапки, но за возврат е на одлично место во Европа.
„За оние кои се блиски до компанијата и мене, јас сум на еден клик од вас“, изјави Роке.
Неговото заминување од Норвешка ќе ја чини оваа скандинавска земја околу 15 милиони евра годишно. Минатата година Роке беше на прво место по платен данок, како физичко лице, а „Дагенс Неринглисв“ пресмета дека од 2008 година уплатил близу 132 милиони евра во државната каса.
Професорот од Норвешката бизнис школа Оле Џемс-Онстад рече дека проценката е дека луѓето што ја напуштиле земјата имаат вкупно околу 52,5 милијарди евра.
Брокерот и фармер на лосос Торд Уланд Колстад, чие богатство се проценува на околу 132 милиони евра, се преселил од градот Бодо во Луцерн, Швајцарија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.