Македонија
„Рамо до рамо“ во Кавадарци, Неготино и Ресен: Членството во ЕУ носи европски стандарди и отвора нови пазари

Како дел од караванот „Рамо до рамо до победа“ денеска во Кавадарци беа секретарот за меѓународна соработка на СДСМ, Бојан Маричиќ и претседателот на Градската организација на СДСМ Васко Кичевски.
– СДСМ со своите визионерски, државнички и храбри одлуки обезбеди членство во НАТО и обезбеди почеток на преговорите со ЕУ по 17 години минати во чекалната. Сега пред нас е реализација на важната обврска да ги направиме потребните реформи и измени. Време е за глас за Европа. 80 гласа ЗА, кои ќе бидат гласови ЗА Европа. Бројни се придобивките од ЕУ и во поглед на демократизација на државата, но и во делот на финансиската поддршка, а тоа најдобро го знаат земјоделците од овој крај кои се корисници на средства од ИПАРД програмата. Ние сме земја лидер во регионот по искоритеност на средствата од ИПАРД 2 програмата. Се подготвуваме за почетокот на новата ИПАРД 3 програма, каде имаме 62% зголемување на неповратните европски средства. Но не се само неповратните средства, членството во ЕУ значи и отворање на пазарите ширум Европа, порача Маричиќ.
Членката на ИО Мелиса Ценовска Серафимовска и членот на ЦО на СДСМ Оливер Спасовски беа меѓу граѓаните на општина Ресен.
– Во кризна година СДСМ покажа што значат успешни економски политики. Ја зголемивме минималната плата на 20.175 денари и ги усогласивме и останатите плати со минималната. Просечната плата ја зголемивме за 34.000 денари, го исполнивме ветувањето пред граѓаните една година порано. Денеска вработените во МВР но и во други институции имаат поголеми плати за над 3.000 денари во бруто износ. И не само платите, растат и пензиите со рекордни проценти, 16% само во изминатата година обезбедивме поголеми пензии за сите 330.000 пензионери, за повеќе пари и подобар животен стандард за нашите највозрасни сограѓани, посочи Спасовски.
Во општина Неготино Кирил Парталов и Даријан Сотировски пред граѓаните ги претставија мерките и политиките на СДСМ кои обезбедуваат повеќе пари за земјоделците и зголемено домашно земјоделско производство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Актуелната власт го заборави Делчево само затоа што градоначалникот е од друга партија

Претседателот на СДСМ Венко Филипче заедно со градоначалникот на Делчево Горан Трајковски денеска ги посети капиталните проекти во градот. Салата АСНОМ, прочистителната станица, новиот пазар и новата градинка со капацитет за околу 150 дечиња.
„Станува збор за капитални проекти коишто беа навистина потребни и коишто сериозно го олеснуваат животот на граѓаните во Делчево.
Филипче оценува дека овие проекти не се само инфраструктура, туку се вложување во подобар живот за сите граѓани, проекти кои го менуваат животот на граѓаните на подобро. За жал, денеска Делчево не само што нема капитални проекти туку истото е целосно заборавено а тоа најмногу се одразува на граѓаните и тоа само затоа што градоначалникот не е од истата партија.
„Еве сега гледаме што значи да се нема поддршка од влада. Од оваа актуелна влада практично Делчево е заборавено и целосно е маргинализирано. Жалам што прават таква политичка сегрегација врз основа на тоа кој градоначалник од која партија е, тоа граѓаните навистина не го заслужуваат“, потенцираше Филипче.
Македонија
Во среда авионско прскање против комарци во Скопје

од Центарот за управување со кризи известуваат дека во Град Скопје во среда ќе се реализира авионско прскање против комарци.
„Авионската дезинсекција на подрачјето на градот Скопје, против ларви од комарци, ќе се реализира на 11.06.2025 година (среда), во раните утрински часови.
Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога временските услови ќе бидат поволни, во истите термини“, велат од ЦУК.
Се известуваат пчеларите навремено да ги преземат потребните мерки за заштита на пчелите.
Македонија
(Видео) Тренчевска: Хаосот во здравството не може да го среди министер информатичар

Владата, наместо да гради систем што треба да се грижи за здравјето на граѓаните, создава систем што го става во ризик животот на луѓето, систем кој убива. И овој хаос треба да го среди новиот министер за здравство – Азир Алиу, кој е професионалец во информатиката, но не и во здравството.
Хаосот во здравството не може да го среди министер информатичар. Алиу нема никакво претходно искуство во здравството, и додека да се запознае со областа во која влегува, најверојатно и него ќе го сменат или сам ќе си отиде. И повторно нема да е криво ВМРО-ДПМНЕ, туку ќе бидат криви коалиционите партнери затоа што дале такви кандидати, рече пратеничката на СДСМ, Јована Тренчевска, на денешната собраниска седница.
Тренчевска се осврна на, како што рече, сите пропусти на оваа влада, потсетувајќи и на вчерашната прослава, 34 години од постоењето на Унијата на млади сили на ДПМНЕ, со скандалозно шоу од пиротехнички средства, на неполни три месеци од пожарот во Кочани.
„Како паметот да не им доаѓа, или намерата беше да се испрати јасна порака дека сè им е дозволено. Цехот ќе си го носат родителите, сестрите, браќата, фамилијата, роднините, пријателите, граѓаните, а тие ќе си тераат како сакаат и ќе отвораат телефонски линии за да покажат некаква божемски грижа. Од финансиската поддршка, ништо не обезбедија. Обезбедија граѓаните и компаниите со донации, а на ДПМНЕ им остана фалбата и лажниот ПР, рече Тренчевска.
Таа потсети дека имаме влада која, заради својата неспособност, се соочи со најголемата трагедија во историјата на независна Македонија – кочанската трагедија, каде што згаснаа 62 млади животи, а 200 се повредени.
Влада која не знае како да се справи со здравствените предизвици. Токму во контекст на оваа трагедија, таа, додаде Тренчевска, не прифаќа понудени законски решенија од опозицијата, со кои се нуди вистинска и реална поддршка и помош, потенцираше Тренчевска.
Таа потенцираше дека во моментов ја имаме најнеспособната влада од осамостојувањето на Македонија до денес, која го донесе здравството до степен на „тежок пациент“ на кој му нема спас.
„Секој сектор од здравството е метастазиран од неспособноста и негрижата на власта, а граѓаните го плаќаат цехот со сопственото здравје“.