Македонија
Грковска: Ја зајакнуваме постапката за избор на членови на управните одбори во јавните претпријатија
Заменичката на претседателот на Владата задолжена за политики за добро владеење, Славица Грковска, денеска присуствуваше на презентацијата на извештајот од следењето на управувачките структури во институциите од јавниот сектор, подготвен од Центарот за управување со промените.
Таа ја поздрави подготовката на ваквиот извештај, кој е добра основа за креирање идни политики, во насока на надминување на утврдените предизвици и слабости бидејќи, како што рече, од осамостојувањето на нашата држава до денеска не е посветено доволно внимание на мерење на ефикасноста на овие тела, што е клучен принцип за политики за добро владеење.
„Морам да истакнам дека за некои од слабостите што се детектирани во извештајот од следење на управувачките структури во институциите од јавниот сектор, што беше презентиран денеска, мојот Кабинет веќе презеде конкретни мерки и политики, што за мене е охрабрување дека сме на добар пат. Секако, тоа е резултат и на партнерскиот однос што мојот Кабинет го има со граѓанскиот сектор, на кого јас гледам како на клучен фактор во процесот на подобрување и унапредување на нашето општество“, нагласи вицепремиерката Грковска и се осврна на позитивните резултати што ги дава тесната соработка на Владата со граѓанскиот сектор.
Во тој контекст таа посочи дека во самиот извештај, во наодите во сите области, забележано е дека недостига транспарентност на институциите и додаде дека веднаш по преземањето на оваа позиција и заедно со Центарот за управување со промените и Агенцијата за слободен пристап до информациите од јавен карактер, по претходна заедничка анализа на состојбата, подготвено е упатство, со кое Владата ги задолжи сите институции, а кое ќе значи унапредување на транспарентноста, која мора постојано да се унапредува и надградува.
„Во тек се и низа други мерки, кои значат зголемување на одговорноста на функционерите, а во насока на унапредување на ефикасноста на институциите, кои се во директна корелација со наодите дадени во овој извештај. На пример, забележан е проблемот со поставувањето в.д. директори во институциите што, слободно ќе кажам, според мене, упатува и на злоупотреби.
За таа цел, со поддршка на нашите меѓународни партнери и во соработка со Институтот за демократија работиме на анализа на законската регулатива и на фактичката ситуација, ги детерминираме слабите точки, по што ќе произлезат и конкретни препораки по кои потоа ќе постапуваме“, додаде Грковска.
Како позитивна перцепција во извештајот се посочува на последните измени на Законот за јавните претпријатија, со кои се утврдени определени критериуми, кои треба да ги исполнуваат членовите на управните и надзорните одбори, кои се поврзани со надлежностите на одборите, се дефинира постапката за нивен избор. Под координација на вицепремиерката Грковска усвоен е правилник во таа насока, но е намален и бројот на членови на управните одбори, со што се обезбедува и значителна рационализација на процесот.
На денешната презентација на извештајот, покрај тимот на Центарот за управување со промените, предводен од Неда Малеска-Сачмароска, учествуваа и претседателката на Државната комисија за спречување на корупцијата, Билјана Ивановска, главниот државен ревизор Максим Ацески, Слаѓана Тасева од „Транспаренси интернешнл“ и Миша Поповиќ од Институтот за демократија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерот Ристовски им ги врачи медалите на најуспешните на маратонот
Министерот за спорт Борко Ристовски им ги врачи медалите на најуспешните на денешното јубилејно 20. издание на Скопскиот маратон, упатувајќи честитки за сите учесници на маратонот за нивната издржливост и посветеност.
Побединик на годинешната трка е Хилари Чемвоно од Кенија. Неговиот сонародник, Даниел Кипротич го освои второто место, а третата позиција му припадна на најдобриот македонски атлетичар, Дарио Ивановски.
Во женска конкуренција доминираше Кенијката Ирине Џеруто. Најдобрата македонска маратонка Адријана Поп Арсова заврши на второто место, а трета беше Вивијан Џелагат од Кенија.
На полумаратонска трка доминираа натпреварувачите од Турција. Прв низ целта мина Џан Хусеин, второто место го освои Емектар Мурат, а трет беше Гедиклиоглу Абдурахман. Најдобар македонски натпреварувач на полумаратонската трка беше Иван Пешовски кој заврши на шестата позиција.
Во женска конкуренција, на полумаратонската трка победи Милица Мирчева од Бугарија. Греша Бакрачи од Албанија беше втора, а третата позиција ѝ припадна на Јулие Ларсен од Норвешка.
-Скопскиот маратон и оваа година покажа дека Македонија е подготвена да организира спортски настани од светски размери. Горд сум што Министерството за спорт е главен покровител на оваа атлетска манифестација која го става Скопје и Македонија на светската маратонска мапа. Ние како Министерство за спорт секогаш ќе бидеме поддршка за ваквите настани кои негуваат вистински спортски вредности, градат традиција и носат промоција на нашата Македонија во светот, истакнал министерот Ристовски на доделувањето на медалите.
Тој упатил честитки до сите учесници на маратонот, како и до организаторите и до сите што придонеле денешната трка да мине во најдобар ред, нагласувајќи дека Скопскиот маратон е една од најзначајните спортски манисфестации која негува традиција и промовира вистински спортски вредности.
-Честитки до сите учесници, за вашата посветеност и напор. Вие сте вистински инспирација и пример дека преку спортот се градат не само здраво тело туку и заедница обединета во поддршката на заеднички цели. Честитки и благодарност и за организаторите, волонтерите и сите што помогнаа во реализацијата на овој голем спортски настан. Вашиот труд и ентузијазам направија овој маратон да биде успешен и сигурен за сите учесници и гледачи. Ова е уште една победа за спортот во Македонија, и се надевам дека ќе продолжиме да создаваме вакви можности за нашите спортисти и за заедницата. Спортот е мост што не спојува, а Скопскиот маратон е доказ за тоа, рече министерот Борко Ристовски.
На годинешниот јубилеен Виз Ер Скопски маратон настапија рекордни 13.400 натпреварувачи од 55 земји. Министерството за спорт е главен покровител на Скопскиот маратон.
Македонија
Обилните врнежи ја загадија водата за пиење во Гостивар
Пожарникарите од ТППЕ Тетово имале две технички интервенции за испумпување вода во тетовската населба Деребој, кај подвозникот за село Фалише и испумпување вода во поплавената куќа во истата населба.
– ЈКП „Шар“ од Тетово информира до ЦУК дека поради загаденоста на водата во изворите на Лешница, системот на филтер станицата на Лешница засега е целосно затворен, а градот Тетово се снабдува со намалено количество вода. Екипите на ЈКП „Шар“ се на теренот за брзо решавање на проблемот. Известуваат дека ќе има ограничување на водата во градскиот водовод од 13:00 до 15:00 часот и во период од 1:00 до 4;00 часот, стои во соопштението.
Од ЈП „Комуналец“ од Гостивар е добиено известување во ЦУК дека поради контаминација предизвикана од обилните врнежи од дожд, најновите физичко-хемиски и микробиолошки анализи потврдуваат дека водата од јавната водоводна мрежа во моментов не е безбедна за пиење.
– До натамошно известување, од ЈП „Комуналец“ од Гостивар да не се пие водата од чешма, од водоводот, информира ЦУК.
Македонија
Пожарникари извлекле жена во срушена куќа во Велес
Во Центарот за управување со кризи (ЦУК) според последниот извештај имало 2.142 повици во последното деноноќие на бројот за итни случаи 112, а немало пожари на отворено.
ЦУК информира дека вчера, од 9:30 до 10:15 часот, четворица пожарникари со едно противпожарно возило од ТППЕ Велес извлекле жена во срушена куќа. Жената се стекнала со мали повреди и со возило на итна медицинска помош била пренесена во болница во Велес.
ТППЕ Куманово дека вчера, од 12:08 до 12:30 часот, извлекувала лице од возило при сообраќајна незгода во близина на Домот за стари лица „Зафир Сајто“. Лицето, како што се наведува, имало тешки телесни повреди.
РЦУК Тетово, пак, информира дека околу 4:30 часот возило излетало во река во село Беловиште, Општина Гостивар. Се интервенирало со едно возило и четворица пожарникари. Сите лица биле извлечени, а само еден сопатник бил телесно повреден, кој бил пренесен во Гостиварскиот клинички центар.