Македонија
Османи од Ерменија: Мојата посета е во насока на поддршка за сеопфатно и одржливо решение помеѓу Ереван и Баку
Статусот на мировниот процес помеѓу Ерменија и Азербејџан и поврзаните хуманитарни прашања, но и соработката со ОБСЕ во насока на поддршка на реформската агенда на земјата, беа во фокусот на разговорите со Премиерот и Претседателот на Ерменија, со кои денеска се сретна министерот Бујар Османи во својство на Претседавач со ОБСЕ.
Со ерменскиот премиер Никол Пашинјан се осврнаа на позицијата на Ереван, особено во врска со безбедносните прашања, за која, како што рече Османи, е прагматична со оглед на актуелната ситуација.
Тој додаде и дека ОБСЕ, како долгорочен меѓународен партнер на Ерменија, ќе придонесе за унапредување на перспективите за мир.
„Ве уверувам дека мојата посета е во насока на поддршка на мирот и стабилноста, особено земајќи предвид дека сеопфатно и одржливо решение помеѓу Ереван и Баку сè уште не е постигнато“, рече на средбата Османи.
Тој исто така ја истакна и досегашната успешна соработка на земјата со ОБСЕ, потенцирајќи дека истата има можност уште да се продлабочува и притоа од Пашинјан побара поддршка за целосно оперативна и функционална Организацијата, со цел развој на нови активности кои ќе помогнат во сеопфатен мировен договор.
„ОБСЕ активно соработува со Ерменија во широк спектар на иницијативи во изминатите пет години како дел од ‘Програмата за соработка со Ерменија’, а ја имате мојата целосна политичка поддршка и за дополнителни активности кои ќе помогнат на луѓето погодени од конфликти“, рече Османи.
Актуелните теми во врска со конечно решавање на долгогодишните прашања и нормализирање на односите помеѓу сите земји беше предмет на разговор и со ерменскиот претседател Вахан Хачатуријан, на кого Османи му порача дека градењето мир и доверба е од огромно значење за сите.
„Верувам дека постои поддршка од сите страни за сеопфатен и траен мир меѓу Ерменија и Азербејџан, како и во целиот регион на Јужен Кавказ. Свесни сме дека доаѓање до решение е многу тежок предизвик, но најважно е да се бара иднината. Минатото колку и да е болно и тешко, нема да донесе излез од ситуацијата“, рече Претседавачот Османи.
Со претседателот Хачатуријан Османи разговараше и за поддршката на ОБСЕ како платформа за изнаоѓање целосно и сеопфатно решение во нормализирањето на односите меѓу двете земји, нагласувајќи дека Северна Македонија, како Претседавач со ОБСЕ може да даде корисен придонес за градење доверба и нормализирање на односите.
„Бев заинтересиран да се информирам повеќе за статусот на дискусии за перспективите за мир. Важно е сите страни да се ангажираат за смирување на тензиите, а ние ќе продолжиме со силна поддршка на иницијативите за постигнување мировен договор“, истакна Османи.
Двете средби со државниот врв на Ерменија беа во насока на изнаоѓање решение за кревката безбедносна ситуација на терен, но и поддршката од ОБСЕ во справувањето со внатрешните и надворешните предизвици во трите безбедносни димензии кои се во рамки на конкретниот мандат на Организацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес ќе се трча маратон во Скопје, затворени се улици и нема да возат дел од автобусите на ЈСП
Поради одржување на „Виз Ер Скопски маратон 2024“ денеска од 7 до 14 часот дел од автобусите од јавниот превоз ќе сообраќаат по изменет режим од вообичаениот, а дел воопшто нема да се вклучат во сообраќај. Нема да сообраќаат линиите: 3, 3Б, 4, 4А, 9, 16, 22А, 24, 25, 59Б.
Како што соопшти ЈСП „Скопје“, со непроменета траса се градските линии: 2, 2А, 8, 12, 19, 20, 45, 59 и 65В и приградски линии: 11, 11а, 18, 32, 47, 47а, 52, 53, 55, 56, 56а, 60, 61, 63, 63а, 63б, 65, 65а, 65б, 66, 66а, 68, 71, 74, 81 и 162.
Изменет режим на сообраќање ќе имаат автобусите со број 5, 7, 15, 15 А, 21, 22, 23, 27, 28, 31, 41, 51, 67, 70, 50, 50А, 57, 59, 59 А, 58, 58а и 58б. Изменетиот режим на сообраќање на автобусите е објавен на веб-страната на ЈСП „Скопје“.
– Ги потсетуваме сите учесници дека на денот на маратонот ќе можат бесплатно да го користат јавниот превоз со приложување на стартниот број (маица), се вели во соопштението од ЈСП „Скопје“.
МВР информира дека денеска од 8 часот поради одржување на „Виз ер – Скопски маратон 2024“, Единицата за безбедност на патниот сообраќај при СВР Скопје ќе преземе мерки за посебен режим на сообраќај, по и во близина на сообраќајниците каде ќе се движат натпреварувачите.
Траса на движење на маратонот, полумаратонот и штафетната трка (по наведената траса за штафетната трка и маратонот натпреварувачите се движат два пати) – Старт кај Собрание на РСМ на ул.„11 Октомври“, право кон „Рекорд“, односно по ул.„Димитрие Чуповски“, право по ул.„Митрополит Теодосиј Гологанов“, право по ул.„Војвода Васил Чакаларов“, се до крстосница со ул.„Ангел Динев“, каде се врти полукружно назад по истата траса се до Собрание на РСМ на ул.„11 Октомври“ и се продолжува право по ул.„11-ти Октомври“, лево по бул.„Крушевска република“, десно по бул.„Трета македонска бригада“, лево по ул.„Васко Карангелевски“, десно по бул. „Јане Сандански“, се до крстосница со бул.„Србија“, каде се врти полукружно и во истата коловозна лента назад по бул.„Јане Сандански“ се до крстосница со бул.„Кузман Јосифовски Питу“, каде се врти полукружно назад во истата коловозна лента до крстосница со ул.„Васко Карангелевски“, десно по ул.„Васко Карангелевски“, десно по бул.„Трета македонска Бригада“, лево по бул.„Крушевска република“, десно по ул.„11 Октомври“ до целта – плоштад „Македонија“, се вели во соопштението.
СВР Скопје апелира до граѓаните да ги почитуваат наредбите што ги издаваат полициските службеници по сообраќајниците каде ќе се одвива настанот.
Македонија
Променливо облачно со повремени врнежи од дожд
Времето во земјава ќе се задржи променливо облачно со повремени врнежи од дожд, наместа пообилни, локално во форма на невреме, проследени со грмежи и засилен ветер.
Како што информираат денеска од УХМР, потоа, во следните денови времето ќе биде стабилно со пораст на дневната температура, освен во среда кога се очекува слаб локален дожд.
Македонија
На покана на ЕИБ, Анѓушев говореше за поставување батерии на фотоволтаични електрани во Штип
Кредити од Европската инвестициска банка (ЕИБ) за македонските фирми да постават батерии на фотонапонските електрани, инсталирани на покривите на индустриските објекти, е поволноста со која европската финансиска институција ќе го поттикнува македонското стопанство да биде енергетски ефикасно.
Пред штипските фирми, во салата на општина Штип, консултантите на Европската Банка, Ловре Ристевски и проф. Даме Димитровски, порачаа дека има потреба ефикасно да се искористува електричната енергија од обновливи извори, наместо во значаен дел таа да се губи.
На претставувањето во Штип, бизнисменот Кочо Анѓушев, сопственик на енергетската компанија ФРОИНВЕСТ, говореше за батериските системи како единствено решение во моментот за справување со вишокот електрична енергија произведена од фотоволтаици, кој вишок производителот не може да го потроши, а електричната мрежа не може да го прими.
Анѓушев ги запозна штипските фирми за важноста на тоа дека секој кој инвестира во обновливи извори, без оглед на големината, потребно е да оди на интегрирано и комплетно решение за да има најбрз поврат на инвестицијата, и оптимало работење на електраната и на батеријата.
Поволните кредити на Европската инвестициска банка (ЕИБ) ќе бидат достапни преку македонските банки, по услови пропишани од ЕИБ.