Свет
Г7-договори за зголемување на санкциите против Русија и на помошта за Украина
Министрите за надворешни работи на Г7 во понеделникот се согласија да ги зголемат санкциите против Русија и да ја продолжат својата помош за Украина, се вели во заедничката изјава усвоена по состанокот во Каруизава, Јапонија.
„Остануваме посветени на интензивирање, координирање и на целосно спроведување на санкциите против Русија“, се вели во документот со кој Г7 се обврзуваат да ја поддржуваат Украина колку што е потребно.
Во документот исто така се истакнува дека Киев мора да продолжи со „антикорупциските и домашните реформски напори“.
За време на состанокот имало отворена размена на мислења во врска со ситуацијата во Украина, вклучително и процена на моментниот статус и идните перспективи.
Јапонскиот министер за надворешни работи, Хајаши Јошимаса, изјави дека, со оглед на одолжената војна, важно е да се одржи единството меѓу Г7 и другите истомисленици, да се продолжат строгите санкции против Русија и силната поддршка за Украина и да се зајакне соработка со другите земји, вклучувајќи го и т.н. глобален југ.
Хајаши објасни дека до денес Јапонија најавила помош за Украина и за соседните земји во износ од 7,6 милијарди американски долари. Покрај тоа, Хајаши посочи дека мерките против избегнување и заобиколување на санкциите и снабдувањето со оружје на Русија од трета страна се важни прашања.
Тој исто така ја осуди одлуката на рускиот претседател Владимир Путин да распореди тактичко нуклеарно оружје во Белорусија, што дополнително ќе ја зголеми тензијата на ситуацијата, и побара Москва да ги повлече трупите од Украина.
Покрај тоа, министрите за надворешни работи на Г7 истакнаа дека неодговорната нуклеарна реторика на Русија е неприфатлива и се согласија за зајакнување на координацијата за спречување и одговор на избегнувањето на санкциите, како и на снабдување со оружје од трета страна за Русија.
„Земјите од Г7 заеднички ќе се обидат да спречат испорака на оружје од трети земји во Русија и ќе продолжат да преземаат мерки против земјите што материјално ја поддржуваат руската војна против Украина“, се вели во заедничката изјава на министрите за надворешни работи на Г7.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с
Свет
Се повеќе мали деца се дебели, предупредува ФАО
Организацијата за храна и земјоделство на Обединетите нации (ФАО) предупреди дека прекумерната тежина кај деца под пет години, анемијата кај жените на возраст од 15 до 49 години и дебелината кај возрасните се во пораст во голем број земји.
Западен Балкан со 10,3 отсто и Кавказскиот регион со 9,1 отсто имаат највисока стапка на прекумерна тежина кај децата до пет години, додека стапката на дебелина кај возрасните исто така се зголемува.
Вредностите на анемијата кај жените на возраст од 15 до 49 години ја надминуваат глобалната проценка од 29,9 отсто во Киргистан со 35,8 отсто, Таџикистан 35,2 отсто и Азербејџан 35,1 отсто.
За да се справат со овие предизвици, сите актери во Европа и Централна Азија треба да се фокусираат на квалитетот на исхраната, осигурувајќи дека сите граѓани имаат пристап до разновидна и урамнотежена исхрана.
Никој не треба да се остави зад себе. Ова мора да биде поддржано со едукативни и кампањи за подигање на јавната свест кои поттикнуваат поздрав и поодржлив избор на храна, се додава во соопштението.