Македонија
Се основаат компании за игри на среќа диригирани од роднини на министри на ДУИ, реагира Сали од огнената фракција на партијата
![](https://makfax.com.mk/wp-content/uploads/2023/04/огнен.jpg)
Младите, кои се дел од фракцијата на ДУИ, односно од т.н. огнена група, посочуваат дека се загрижени бидејќи ќе се формира нова видеолотарија од страна на Владата. Уранија Сали, студент во медицинското училиште „Панче Караѓозов“, тврди дека се основаат компании за игри на среќа, чии предводници се роднини на министри од ДУИ.
„Младите се иднината на една држава, но денес мораме да потсетиме дека оваа Влада нè отсече од агендата, а со нас играат баш како со игри на среќа, кои од ден на ден се отвораат во форма на казина и обложувачници. Од овде сакаме да алармираме, освен што секојдневно нè терате да ја напуштаме државата и да го фатиме патот за странство, дополнително, со игрите на среќа ни го ставате злото на врата. Наместо да ни отворате библиотеки, работни места или младински центри, вие отворате обложувачници. Чувствуваме загриженост што ќе се формира нова видеолотарија од страна на Владата на Македонија, со што подразбираме дека апаратите ќе ги имаме насекаде“, посочи Сали.
Таа смета дека Владата си игра со среќата на младите.
„Во анкетата спроведена од движењето ‘Антикоцкање за влијанието на игрите врз младите’ се забележува дека 58 % од анкетираните млади барем еднаш играле во казино, обложувачница или онлајн-казино. Уште поалармантно е што во оваа анкета 67 % од испитаниците првпат играле на возраст од 8 до 18 години. Во Македонија имаме повеќе од 1.200 казина, обложувачници и онлајн-казина, а имаме 109 средни училишта, 227 библиотеки и 20 младински центри, што значи трипати повеќе. Затоа решивме да реагираме на оваа одлука на извршната власт и ги поттикнуваме нашите министри и нашата Влада да размислат повеќе за изградба на можности за младите да се развиваат во својот академски и социјален живот. Истовремено, ја повикуваме Владата да стави прст на глава дека ако под 10.000 млади луѓе годишно ја напуштиле државата за странство, оваа бројка ќе биде многу поголема благодарение на нивните политики за младите“, додаде таа.
Од огнената фракција посочија: „Вие имате само политики како да основате повеќе компании за игри на среќа и тие да се диригираат од ваши блиски луѓе, од кои три члена на новата видеолотарија се токму роднини на министри од ДУИ. Затоа ви кажуваме да не си играте со нашата среќа, затоа што ние не сме ваши игри на среќа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Министерот Тошковски претседаваше со конститутивната седница на Управувачкиот комитет за координација и управување со системот за управување со кризи
![](https://makfax.com.mk/wp-content/uploads/2024/07/449630277_122162759648197509_1806381321720411464_n.jpg)
Министерот за внатрешни работи Панче Тошковски денес како претседавач на Управувачкиот комитет за координација и управување со системот за управување со кризи, присуствуваше на конститутивната седница на комитетот која се одржа во просториите на Центарот за управување со кризи.
На седницата присуствуваа и министерот за надворешни работи и надворешна трговија Тимчо Муцунски, министерот за одбрана Владо Мисајловски, министерот за здравство Арбен Таравари и министерот за земјоделство, шумарство и водостопанство Цветан Трипуновски.
На средбата, директорот на ЦУК Стојанче Ангелов информираше за мигрантската кризна состојба на јужната и северната граница, кризната состојба во КПУ „Идризово“, како и за бројот на пожари на отворен простор и ресурсите за нивно гаснење.
„Продолжуваме посветено да работиме на надминување на овие предизвици, обезбедување брза и ефикасна реакција во кризните ситуации, се со цел поголема безбедност за нашите граѓани“, потенцираше министерот Тошковски.
Македонија
Средба Муцунски –Лудва: изразен интерес за искористување на потенцијалот за натамошно развивање на економската соработка меѓу двете земји
![](https://makfax.com.mk/wp-content/uploads/2024/07/mucunski-ludva-2.jpeg)
Министерот за надворешни работи и надворешна трговија Тимчо Муцунски, денес оствари средба со амбасадорот на Чешката Република, Јарослав Лудва.
На средбата беше истакнато взаемно задоволство од одбележувањето на 30-години од воспоставувањето на дипломатските односи меѓу двете земји, кои се карактеризираат со развиена соработка во многу сфери и отворен и продлабочен дијалог по сите клучни прашања за двете земји.
Министерот Муцунски се заблагодари за силната чешка поддршка за процесот за интеграција на нашата земја во ЕУ, особено нагласена и преку Вишеградската и Групата на пријатели на проширувањето, како и преку т.н. Славков формат. Притоа, ја потенцира цврстата определба на новата влада за забрзување на евроинтеграцискиот процес и спроведување на клучните реформи.
Министерот изрази интерес за искористување на потенцијалот за натамошно развивање на економската соработка меѓу двете земји во повеќе области, меѓи кои и во енергетскиот сектор и земјоделството. Притоа, изразувајќи задоволство од порастот на трговската размена во изминатите години, Муцунски ја нагласи важноста од натамошен фокус на унапредувањето на бизнис релациите, што ќе биде меѓу приоритетите на Министерството во следниот период.
Македонија
Зголемена фреквенција на возила на „Табановце“ и „Богородица“, се чека околу 30 минути
![](https://makfax.com.mk/wp-content/uploads/2023/04/DJI_0486.00_05_25_44.Still006.jpg)
Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. Нa ГП Табановце и Богородица има зголемена фреквенција на возила за излез од Мaкедонија, време на чекање околу 30 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.