Македонија
Работниците на коридорите ќе може да работат по 50 часа, а ако се измени законот, и по 60 часа – договорот со „Бектел и Енка“ останува мистерија
Ниту едно инсистирање на јавноста не го убеди премиерот Димитар Ковачевски да го објави договорот со „Бектел и Енка“ или делови од него. Тој новинарите ги упати, ако сакаат детали од договорот, да ги добијат на брифинг од министерот за транспорт и врски или од директорот на ЈПДП. Прашан дали работниците што ги ангажира државата за работа на автопатите ќе имаат 40 или 60-часовно работно време, тој рече дека може да работат по 50-часа сè додека не се донесат измените на Законот за работните односи, со кои би се дозволиле 60 часа работно време.
„Во моментот имаме закони што важат. Доколку се донесат законски решенија, кои ќе предвидат други услови за работа, тогаш ќе се применат тие други услови за работа. И сега кај нас, во согласност со законските решенија, може да се работи повеќе од 40 часа, односно 50 часа. Има голем број работници што работат и по 50 часа по свој избор и согласност“, рече Ковачевски.
Според Ковачевски, 51 процент од работите треба да се изведат од страна на македонски работници, инженери, македонска механизација, а голем дел ќе биде од странство, односно од „Бектел и Енка“. Договорот во кои се предвидени овие услови останува тајна.
„Сите договори, кои практично се од работата на ЈПДП и кои во своите одредби имаат деловна тајна на страните кои се потписници, имаат назнака доверливост. Тие содржат, како комерцијален договор – деловна тајна на компанијата, која е дел од договорот во која таа ги прецизира технологиите на работа, структурите на трошоците и ценовните елементи. Заради доверливоста на податоците да не дојдат во посед на нивните конкуренти, тие договори се карактеризирани како такви“, додаде Ковачевски.
Коридорот 8 ќе почне да се гради и Коридорот 8 ќе се изгради, додаде Ковачевски.
„Потпишан е договор на 400 страници, каде што се дефинирани сите обврски од изведувачот, како и обврски од другата страна, а тоа е државата, така што за сите детали, за текот на градбата, за изградбата, ќе може да ве информираат управувачкиот комитет и ЈПДП“, рече Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.
Македонија
Системот за видеонадзор на сообраќајниците „Безбеден град“ е поставен во Скопје, Куманово и Тетово
Министерот за внатрешни работи Панче Тошковски денес оствари работна средба на Единицата за оперативно-технички работи при Бирото за јавна безбедност во чија надлежност е системот за видеонадзор на сообраќајниците познат како “Безбеден град“.
Во рамки на посетата министерот беше запознаен со работата на оваа организациска единица, тековните активности и проблеми од делокругот на нивната работа.
„Во тој контекст беше истакнато дека во моментот ваков систем е поставен само во Скопје, Куманово и Тетово, има недостаток на покриеност на многу значајни крстосници, а голем дел од камерите и опремата која се користи во овој систем е технички застарена, а дел и неисправна. Исто така бев информиран за наградбата на системот која е во тек, а која опфаќа замена на постојните камери со нови и проширување на системот со нови камери на точки кои досега не беа покриени. Водено, во фаза на тестирање е системот за автоматско евидентирање на сообраќајни прекршоци за чие целосно ставање во функција потребно е да се направат и соодветни законски измени“, издвои министерот Тошковски од средбата и додаде:
Во иднина треба во континуитет да се инвестира во овој дел, да се прошири и во другите градови низ државата, како и да се распредели дополнителен кадар со цел оваа организациска единица да работи непречено во текот на 24 часа, бидејќи е од круцијално значење за обезбедување на поволна безбедносна состојба.