Македонија
Забрана за објава на непристојни фотографии за празници, ставови и коментирања добија вработените во тетовската болница по случајот со тик-ток анестезиологот
Десетина правила, од кои дел се забрани, добија вработените во тетовската болница, откако новиот колега анестезиолог се вклучи во живо на „Тик-ток“ и снимаше пациентки на гинеколошкиот оддел. Забраните ги потпиша организацискиот директор, Арменд Фазлиу. Најголем дел одредуваат како вработените ќе се однесуваат на социјалните мрежи и што смеат, а што не смеат да објавуваат на нивните профили.
„Воздржете се од критики, хумор и потсмев на вашите колеги во работно време и преку социјалните мрежи. Ова покажува дека лекарите ја изгубиле почитта кон колегите и го одразува рушењето на меѓу-колегијалното единство и соработка“, „Не објавувајте непристојни фотографии за време на празниците, ова влијае на вашиот углед и на угледот на болницата како ваш работодавач“, „Се предлага вашите социјални мрежи да бидат ограничени само на вашите блиски пријатели кои не ги злоупотребуваат вашите фотографии, размислувања и ставови. Внимавајте кого прифаќате за пријател или следбеник на социјалните мрежи“, стои во болничкото известување до вработените.
Првите одредби од правилата наложуваат забрана за објавување на приватни информации и тајни на пациентите. Се потсетува дека прекршувањето на ова правило е казниво и со македонските закони.
„Не давајте медицински информации и стручни совети на социјалните мрежи врз основа на историја на било кој пациент кој ви се обратил за помош. Не ги земајте како примери вашите пациенти за да објасните некоја болест и начинот на нејзино лекување. Медицинските совети треба да се даваат во амбуланта, одделение или во дискретен разговор со пациентот. Изјавите за медиумите и социјалните мрежи треба да се дадат откако ќе се разговара за потребата со болничките власти“, се додава во известувањето.
На вработените им е наложено и да се воздржат од коментирање на актуелни, општествени и политички теми.
Ваквиот правилник во болницата е донесен во вторникот. Пред ова, анестезиолог кој е осомничен дека сторил две дела, на тик-ток емитуваше снимки во живо од гинеколошкиот оддел. Тој доби и притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерот Ристовски им ги врачи медалите на најуспешните на маратонот
Министерот за спорт Борко Ристовски им ги врачи медалите на најуспешните на денешното јубилејно 20. издание на Скопскиот маратон, упатувајќи честитки за сите учесници на маратонот за нивната издржливост и посветеност.
Побединик на годинешната трка е Хилари Чемвоно од Кенија. Неговиот сонародник, Даниел Кипротич го освои второто место, а третата позиција му припадна на најдобриот македонски атлетичар, Дарио Ивановски.
Во женска конкуренција доминираше Кенијката Ирине Џеруто. Најдобрата македонска маратонка Адријана Поп Арсова заврши на второто место, а трета беше Вивијан Џелагат од Кенија.
На полумаратонска трка доминираа натпреварувачите од Турција. Прв низ целта мина Џан Хусеин, второто место го освои Емектар Мурат, а трет беше Гедиклиоглу Абдурахман. Најдобар македонски натпреварувач на полумаратонската трка беше Иван Пешовски кој заврши на шестата позиција.
Во женска конкуренција, на полумаратонската трка победи Милица Мирчева од Бугарија. Греша Бакрачи од Албанија беше втора, а третата позиција ѝ припадна на Јулие Ларсен од Норвешка.
-Скопскиот маратон и оваа година покажа дека Македонија е подготвена да организира спортски настани од светски размери. Горд сум што Министерството за спорт е главен покровител на оваа атлетска манифестација која го става Скопје и Македонија на светската маратонска мапа. Ние како Министерство за спорт секогаш ќе бидеме поддршка за ваквите настани кои негуваат вистински спортски вредности, градат традиција и носат промоција на нашата Македонија во светот, истакнал министерот Ристовски на доделувањето на медалите.
Тој упатил честитки до сите учесници на маратонот, како и до организаторите и до сите што придонеле денешната трка да мине во најдобар ред, нагласувајќи дека Скопскиот маратон е една од најзначајните спортски манисфестации која негува традиција и промовира вистински спортски вредности.
-Честитки до сите учесници, за вашата посветеност и напор. Вие сте вистински инспирација и пример дека преку спортот се градат не само здраво тело туку и заедница обединета во поддршката на заеднички цели. Честитки и благодарност и за организаторите, волонтерите и сите што помогнаа во реализацијата на овој голем спортски настан. Вашиот труд и ентузијазам направија овој маратон да биде успешен и сигурен за сите учесници и гледачи. Ова е уште една победа за спортот во Македонија, и се надевам дека ќе продолжиме да создаваме вакви можности за нашите спортисти и за заедницата. Спортот е мост што не спојува, а Скопскиот маратон е доказ за тоа, рече министерот Борко Ристовски.
На годинешниот јубилеен Виз Ер Скопски маратон настапија рекордни 13.400 натпреварувачи од 55 земји. Министерството за спорт е главен покровител на Скопскиот маратон.
Македонија
Обилните врнежи ја загадија водата за пиење во Гостивар
Пожарникарите од ТППЕ Тетово имале две технички интервенции за испумпување вода во тетовската населба Деребој, кај подвозникот за село Фалише и испумпување вода во поплавената куќа во истата населба.
– ЈКП „Шар“ од Тетово информира до ЦУК дека поради загаденоста на водата во изворите на Лешница, системот на филтер станицата на Лешница засега е целосно затворен, а градот Тетово се снабдува со намалено количество вода. Екипите на ЈКП „Шар“ се на теренот за брзо решавање на проблемот. Известуваат дека ќе има ограничување на водата во градскиот водовод од 13:00 до 15:00 часот и во период од 1:00 до 4;00 часот, стои во соопштението.
Од ЈП „Комуналец“ од Гостивар е добиено известување во ЦУК дека поради контаминација предизвикана од обилните врнежи од дожд, најновите физичко-хемиски и микробиолошки анализи потврдуваат дека водата од јавната водоводна мрежа во моментов не е безбедна за пиење.
– До натамошно известување, од ЈП „Комуналец“ од Гостивар да не се пие водата од чешма, од водоводот, информира ЦУК.
Македонија
Пожарникари извлекле жена во срушена куќа во Велес
Во Центарот за управување со кризи (ЦУК) според последниот извештај имало 2.142 повици во последното деноноќие на бројот за итни случаи 112, а немало пожари на отворено.
ЦУК информира дека вчера, од 9:30 до 10:15 часот, четворица пожарникари со едно противпожарно возило од ТППЕ Велес извлекле жена во срушена куќа. Жената се стекнала со мали повреди и со возило на итна медицинска помош била пренесена во болница во Велес.
ТППЕ Куманово дека вчера, од 12:08 до 12:30 часот, извлекувала лице од возило при сообраќајна незгода во близина на Домот за стари лица „Зафир Сајто“. Лицето, како што се наведува, имало тешки телесни повреди.
РЦУК Тетово, пак, информира дека околу 4:30 часот возило излетало во река во село Беловиште, Општина Гостивар. Се интервенирало со едно возило и четворица пожарникари. Сите лица биле извлечени, а само еден сопатник бил телесно повреден, кој бил пренесен во Гостиварскиот клинички центар.