Американските сили за специјални операции извршија итна евакуација на американската амбасада во завојуваниот Судан за помалку од еден час во неделата користејќи хеликоптери, пренесува „Политико“.

Вашингтон ја затвори американската мисија во Картум на неодредено време оставајќи без дипломатска помош во Судан илјадници американски граѓани, кои се во источноафриканската земја од приватни причини.

Претходно во саботата, амбасадата издаде предупредување дека поради неизвесната безбедносна ситуација во Картум и затворањето на аеродромот, во моментот не е безбедно да се преземе масовна евакуација координирана од владата на САД за тие граѓани.

Американските власти велат дека е премногу опасно за помасовна мисија за евакуација во ситуација кога е целосно затворен главниот меѓународен аеродром, а патиштата што водат надвор од земјата се под контрола на вооружени лица.

Во изјавата, во која им се заблагодарува на војниците, претседателот Џо Бајден посочи дека добива редовни извештаи за напорите да им се помогне на преостанатите Американци во Судан ако тоа е можно.

Евакуацијата ја извеле 100-ина американски војници, кои со три хеликоптери „MH-47’“ ги префрлиле преостанатите седумдесетина американски вработени од амбасадата до непозната локација во Етиопија, која им обезбедила поддршка за прелет и полнење гориво, посочува Моли Фи, помошник-државен секретар за африкански прашања.

Американската команда во Африка (АФРИКОМ) и генералот Марк Мили биле во контакт со двете завојувани фракции во Судан за да се осигурат дека американските сили ќе имаат безбеден премин за да ја спроведат евакуацијата.

Бајден, кој нареди евакуација на персоналот на амбасадата откога доби препорака од својот тим за национална безбедност и по нападот на конвој на амбасадата во Картум, рече дека во евакуацијата им помогнале и Џибути, Етиопија и Саудиска Арабија.

Речиси 16.000 американски државјани се регистрирани во амбасадата во Судан, но бројката е груба бидејќи не сите Американци се регистрираат во амбасадата кога доаѓаат или си заминуваат од земјата.

Евакуациите на амбасадите што ги изведува американската војска се релативно ретки и обично се случуваат само под екстремни услови. Кога ѝ наредува на амбасадата да го повлече персоналот или да ги прекине операциите, Стејт департментот претпочита персоналот да користи комерцијален превоз, ако тоа е опција.

Кога САД привремено ја затворија амбасадата во Киев непосредно пред руската инвазија на Украина во февруари 2022 година, вработените користеа комерцијален транспорт за да заминат.

Меѓутоа, во неколку други скорешни случаи, особено во Авганистан во 2021 година, условите ги направија комерцијалните патувања невозможни или крајно опасни. Американските војници го придружуваа и персоналот од американската амбасада во Триполи, Либија, при евакуацијата во 2014 година со копнен конвој до Тунис.