Владата во овие четири месеци се движи во целосно спротивен правец од ветувањата што ги дававте пред изборите, а вашата политика нема никаков ’рбет, порача претседателот на Социјалдемократскиот сојуз на Македонија и пратеник Венко Филипче, на денешната собраниска седница во пратеничкото прашање упатено до премиерот Мицкоски.

„Целиот ваш политички успех се базираше на противењето на Преспанскиот договор – договор за кој тврдевте дека е национално предавство. Вие реално и немате друга политика по која би ве паметеле освен носењето на маичките со големо НЕ за Преспанскиот договор. Но, откако седнавте во премиерската фотелја, истиот договор стана „ремек-дело на дипломатијата“.Го барате како пример за други договори и од неуморен противник, станавте најгласен поддржувач. Оваа дволичност и врвно политичко лицемерие треба да се изучува во книгите за манипулација со граѓаните“, рече Филипче.

При тоа Филипче го повика Мицкоски да го врати мандатот како што тоа го ветуваше во предизборната кампања.

„Велевте дека ќе го вратите мандатот ако некогаш кажете Северна. Па ајде премиере, еве сега е шанса, во Собранието да го вратите мандатот. Наместо тоа, вие и вашите министри на мала врата почнавте да го користите уставното име, а некои богами тоа и со гордост го изговараат. Со ова покажавте дека вашата политика нема никаков ’рбет, но тоа го знаевме. Вие, премиере , го редефиниравте политичкото лицемерие и популизмот. Вашиот ’рбет се свитка, а вашите принципи паднаа“, порача претседателот на СДСМ и пратеник, Венко Филипче.

Собранието е подготвено за уставните измени, потребна е само политичка волја, истакна собранискиот спикер Африм Гаши по добивањето на извештајот на ЕК за работата на сите институции во државата.

„Собранието во смисла на процедурата е подготвено во секое време тоа да го почне. Но, за да почне тој процес, треба политичка волја и договор за да имаме јасна перцепција за да не почнеме нешто што нема да ни успее. Во однос на Собранието, службите и процедурата ние сме спремни. Се надеваме дека што побргу ќе дојдеме до тој политички договор за да се почне тој процес. Јас би сакал тоа да биде што побргу затоа што навистина мислам дека е од стратешко значење да ги почнеме преговорите што побргу и да станеме полноправна членка на ЕУ“, истакна Гаши.

Оценката за работата на Собранието во извештајот, како што рече, е позитивна и бележи мал напредок, но има забелешки за носењето на законите по скратена постапка.

„Имавме препорака во која се нотира дека Собранието не го злоупотребува повеќе европското знаменце, но дека ни се повторуваат скратените постапки. За жал, на почетокот на нашиот мандат, поради новиот Закон за управата и работата на Владата, повеќето од законите што беа по скратена постапка беа заради усогласување имиња на институци и министерства. Затоа да кажеме дека на почетокот имаме малку разбирање, но јас правам максимални напори со сите партии и пратеници, но и со Владата, и министрите ги убедуваме да не предлагаат закони по скратена постапка затоа што нема смисла и во насока на временските рокови. Ние многу често закажуваме седници, има предвидливост во седниците, така што дали три дена порано или подоцна не се добива многу на време. Ги убедуваме министрите повеќето или сите закони да ги предлагаат по редовна постапка“, изјави Гаши.

Најави дека со новиот Деловник ќе има и нов начин на пратенички прашања.

„Да, според новиот Деловник, освен редовните пратенички прашања, воведен е нов механизам, нов институт. Тоа се опозициски пратенички прашања, кои ќе бидат поставувани во текот на месецот на редовните седници два часа по усвојувањето на дневниот ред. Ќе се поставуваат пратенички прашања од опозициските политички партии кон власта, кон избраните членови, кои се избираат во Собранието“, рече Гаши.

Големо недоразбирање е проблемот со недостигот на учебници во Тетово откога општинските власти јавно се пожалија дека во училиштата недостигаат 20.000 учебници, па родителите фотокопираат за да имаат децата од што да учат. Министерската за образование и наука, Весна Јаневска, денес, пред почетокот на завршната конференција на ИПА-проектот „Подобрување на квалитетот на образованието“, уште еден посочи дека Министерството испорачало онолку учебници колку што побарале училиштата, а кои за да ги поштедат родителите, не ги пријавиле оштетените учебници.

„Жал ми е што морам да кажам дека ова е едно големо, големо недоразбирање. Министерството за образование и наука во ниеден момент не може да знае колку учебници им требаат на училиштата доколку тие тоа не го пријават. Постои електронски систем, кој на крајот на годината се вклучува. Ние им праќаме допис, ги информираме училиштата дека го вклучуваме електронскиот систем за тие да пријават зголемен број ученици или потреба од дополнување оштетени учебници“, рече министерката Јаневска.

Министерството годинава дало и дополнителен процент учебници, кои биле распоредени во училиштата, а кој бил релативно низок поради законските одредби. Јаневска вината за непријавените оштетени учебници ја гледа во училиштата.

„Ако добро ги следите изјавите на вработените во Општината, претпоставувам одговорни за образованието, тие самите велат дека ги поштедиле родителите. Законот предвидува, ако учебникот е оштетен, родителот треба да исплати сума за обнова на учебник од 10 до 70 %, во зависност од оштетувањето. Тие ги поштедиле родителите од за мене непознати причини, тие треба да си кажат зошто, и не ги пријавувале оштетените учебници. Но, анализата на Министерството за образование вели дека недостигот ба учебници што тие го спомнуваат навистина не е соодветен на реалноста“, рече министерката Јаневска.

Раководителот на секторот за јавни дејности во Општина Тетово, Назми Даути, кој рече дека во училиштата недостигаат дури 20.000 учебници, побара да се најде начин училиштата да се снабдуваат со нови книги барем на секои две години. За него, проблем е тоа што директорите на училиштата и наставниците не ги пријавуваат оштетените учебници за не дојдат во конфликт со родителите оти законски, ако детето оштети учебник, родителот треба да го надомести.