Свет
Кремљ издаде предупредување за договорот за жито

Русија не гледа како може да се продолжи договорот за извоз на украинско жито ако не се исполнат сите негови одредби, изјави во понеделникот портпаролот на Кремљ, Дмитриј Песков.
„Сметаме дека Црноморската иницијатива не може да се продолжи без исполнување на барањата“, истакна Песков во изјава за „РИА новости“.
Со договорот од јули 2022 година, постигнат со посредство на ОН и на Турција, беа воспоставени коридори во Црното Море за безбеден извоз на жито од Украина.
Но, договорот исто така ги обврзува САД и нивните сојузници да го деблокираат извозот на руско жито и вештачко ѓубриво, кој беше запрен поради санкциите на Западот врз рускиот бродски сообраќај. Тие досега не си ги исполнија обврските.
Генералниот секретар на ОН, Антонио Гутереш, во понеделникот му врачи писмо на рускиот министер за надворешни работи, Сергеј Лавров, во врска со договорот за жито, кое содржи детален извештај за веќе постигнатиот напредок и заложбите на светската организација да продолжи да работи на преостанатите прашања.
Гутереш потврди дека Црноморската иницијатива е пакет-договор, но и дека само првиот дел од неа е успешно имплементиран.
Лавров го потврди постоењето на писмото по едночасовната средба со Гутереш.
„Искрено, напредокот досега не е многу забележлив. Не гледаме желба кај западните земји навистина да го направат она што е неопходно за успех на договорот за жито“, истакна Лавров.
САД и ЕУ тврдат дека извозот на земјоделски производи и ѓубрива од Русија се исклучок од нивните санкции. Но, стоката нема како да стигне каде што е најпотребна бидејќи Западот ја санкционира целата руска бродска индустрија и ѝ оневозможи пристап до брокерски и осигурителни услуги.
Иако Црноморската иницијатива првично беше претставена како начин да им се помогне на неразвиените земји зависни од увоз на храна – главно во Африка, но и делови од Азија – најголемиот дел од извозот на Украина, всушност, заврши во ЕУ.
Според истражувањето на еден австриски центар објавено во февруари, голем дел од украинската пченка завршил како храна за свињи во Шпанија, од кои се произведува светски познатата и скапа сушена шунка „хамон“, а само 15 % од вкупниот извоз на жито стигнал до Африка.
Во март Москва се согласи да го продолжи договорот за 60 дена, но предупреди дека тој нема да биде дополнително продолжен ако не се исполнат сите негови одредби. Сегашниот аранжман истекува на 18 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Грција го усвои контроверзниот закон – отворен патот за 13-часовно работно време

Грчкиот парламент денес го усвои новиот закон за труд, кој предизвика бурни реакции и протести во целата земја. Со 158 гласа „за“ и 109 „против“ владиниот предлог беше изгласан, а левичарската опозициска партија СИРИЗА одби да учествува во гласањето.
Законот, кој според владата има цел да го направи пазарот на труд поприспособлив и поефикасен, им овозможува на работодавците во приватниот сектор да бараат од своите вработени да работат до 13 часа дневно наместо досегашните осум. Продолженото работно време може да се применува најмногу 37 дена годишно, а работниците се заштитени од отказ доколку одбијат да работат прекувремено.
Владата тврди дека со новите правила се зголемуваат флексибилноста и заштитата на работниците, особено оние со семејства, и дека законот дозволува четиридневна работна недела доколку има претходен договор меѓу работодавецот и вработениот.
Меѓутоа, синдикатите и опозицијата остро реагираа предупредувајќи дека реформата ја укинува суштината на осумчасовниот работен ден и ја легализира прекумерната експлоатација. Синдикатот на државните службеници ADEDY порача дека „флексибилното работно време во пракса значи уништување на семејниот и на општествениот живот и укинување на работничките права“.
Синдикатите потсетуваат и дека просечните плати во Грција се значително пониски од европскиот просек, а нерегистрираниот труд и натаму е голем проблем. Опозициските партии оценија дека законот е застарен и спротивен на европските тенденции за скратување на работното време и воведување пократка, но поквалитетна работна недела.
Новите одредби предвидуваат и поголема флексибилност при вработувања на определено време, со цел, како што наведува Министерството за труд, да се стимулираат продуктивноста и модернизацијата на пазарот на труд.
И покрај уверувањата на владата дека законот ќе ги заштити работниците и ќе овозможи подобра рамнотежа меѓу работа и приватен живот, јавноста останува поделена.
Свет
Индонезија, Азербејџан и Пакистан – три земји во преговори за мировна мисија во Газа

Американски официјален претставник изјави дека Индонезија, Азербејџан и Пакистан разговараат со САД за можноста да испратат војници во идната меѓународна мисија за стабилизација на Пojaсот Газа, објави американски функционер од одбраната, кој побарал да остане анонимен поради чувствителноста на преговорите, јавува „Политико“.
Ова е дел од планот во 20 точки за мир предложен од Доналд Трамп, кој предвидува привремени сили за обука и поддршка на палестинската полиција и соработка со Египет и Јордан.
САД нагласуваат дека американски војници нема да влегуваат во Газа, туку ќе дејствуваат од координативен центар северно од Израел. Египет, Катар и ОАЕ ќе имаат свои официри таму. Досега нема официјални потврди од трите земји.
Целта на мисијата е привремено да се обезбеди обука на палестинските безбедносни структури и да се овозможи разоружување на Хамас. Аналитичари и дипломати ја доведуваат во прашање изводливоста на планот, а формирањето на силите може да трае неколку месеци од моментот на одлуката.
Свет
„Борбата не е завршена“ – Нетанјаху решен да ги врати сите тела на заложниците

Израелскиот премиер Бенјамин Нетанјаху изјави дека Израел е решен да ги врати сите тела на заложниците што сè уште се во рацете на Хамас.
Тој ја повтори својата порака за време на одбележувањето на втората годишнина од нападот на Хамас велејќи:
„Борбата уште не е завршена, но едно е јасно – секој што ќе крене рака против нас, ќе плати висока цена“.
Израел го обвини Хамас за прекршување на договорот за примирје, според кој сите заложници – живи и мртви – требало да бидат предадени до понеделник. Хамас предаде 20 живи заложници и девет тела, но тврди дека за другите му е потребна специјална опрема за пребарување под урнатините.
Министерот за одбрана Израел Кац порача дека ако Хамас не го почитува договорот, Израел во координација со САД ќе ја продолжи офанзивата до целосен пораз на организацијата.