Регион
Вучиќ најави длабоки и суштински промени во надворешната политика на Србија
Претседателот на Србија, Александар Вучиќ, изјави дека по вчерашното гласање во Советот на Европа за членство на Косово во таа организација, ќе дојде до длабоки и суштински промени во надворешната политика на Србија, пренесува српска „Политика“.
Притоа Вучиќ посочи дека Србија не смее да си ги отсече рацете и да ги прекине односите со сите во светот.
„Им благодарам на Унгарија, Шпанија, Кипар, Романија, Азербејџан, Грузија, на луѓето што ги поддржаа меѓународното јавно право и Повелбата на ОН. Не смееме да заборавиме што направија за нас и секогаш мора да знаеме дека овие земји ни се поважни од сите други“, истакна српскиот претседател.
Според Вучиќ, Србија ќе донесе соодветни акти поврзани со безбедносната стратегија, како и со надворешната политика.
„Ќе работиме на тоа со тоа што ќе водиме сметка во надворешната политика да не излеземе од границите на реципроцитет во билатералните односи – ако некој не го почитува нашиот територијален интегритет, зошто ние да го почитуваме неговиот? Зошто по секоја цена да штитиме нечиј територијален интегритет ако тие се против нашиот. Тоа не се тектонски, туку длабоки и суштински промени во политиката и одговорен однос кон нашата земја“, рече Вучиќ.
Како што рече српскиот претседател, вчерашното воздржување во Советот на Европа било исто како да се гласа за членство на Косово.
„Не очекувајте да бидеме кучиња што ќе ви се поклонат и ќе молат за милост. Ќе има длабоки и суштински одлуки во однос на многу декларации и резолуции. На самитот на СЕ меѓу 15 и 20 мај се очекува сите 46 членки едногласно да се изјаснат за територијалниот интегритет на Молдавија и Украина, а тука е и Грузија, па ќе размислиме за нашата одлука. Одлуката мора да се донесе со консензус, нема да биде лесно да бидеме против. Ама да прејудицирам, ќе размислиме“, рече Вучиќ.
Истакнувајќи дека во СЕ има неопходно мнозинство и од членките на ЕУ и од земјите кандидати, кои без поговор ги слушаат Брисел и Вашингтон, српскиот претседател рече дека го изненадило само гласањето на Унгарија.
„Само одлуката на Унгарија беше неочекувана и јас бескрајно сум му благодарен на Орбан за тоа. Го замолив да ја разгледа позицијата на Србија и очекував да бидат барем воздржани. Тие се покажаа како најдобри пријатели и гласаа против. Им благодарам на Орбан и на Сијарто. Тоа го направија гласно“, вели Вучиќ.
За Грција, од друга страна, Вучиќ вели дека одлуката била очекувана врз основа на потезите од претходните месеци и години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ го посети повредениот полицаец, му честиташе за неговата смиреност и храброст
Претседателот на Србија, Александар Вучиќ денеска го посети повредениот припадник на Жандармеријата Милош Јевремовиќ (34), кој откако беше ранет од самострел, беше опериран и е во стабилна состојба.
„Пресреќен сум што Јевремовиќ Милош се чувствува добро по операцијата. Му честитав на Милош за неговата извонредна храброст, неговата смиреност и успешно завршената задача во борбата со терористот. Србија нема да има милост кон терористите“, напиша Вучиќ на фотографијата со ранетиот полицаец.
„Им честитам на командирите и на сите во полициските сили за исклучителното однесување на Милош Јевремовиќ, ќе му се оддаде почест штом ќе ја напушти болницата. Важно е што нашиот херој Милош е жив и здрав, покажа како треба да се реагира во таков момент“, изјави претседателот на Србија.
Непознато лице денес со самострел тешко го рани припадникот на жандармеријата кој бил на должност да ја обезбедува израелската амбасада.
Припадникот на жандармеријата употребил оружје во самоодбрана и го победил напаѓачот, кој од здобиените повреди починал.
Министерот за внатрешни работи на Србија Ивица Дачиќ изјави дека во Белград е уапсено уште едно лице под сомнение за терористичко здружување.
„Во Белград е уапсено уште едно лице осомничено за терористичко здружување. Станува збор за лице од Белград, родено 1999 година, кое веќе беше уапсено пред две години бидејќи бил администратор на неколку милитантни групи на Интернет кои повикувале на џихад“, соопшти Дачиќ.
Тој објасни дека случајот против него и понатаму се води, а тој е пуштен од притвор.
Регион
Голем шумски пожар на планина во северниот дел на областа Атика
Голем шумски пожар избувна на планината Парнита во северниот дел на областа Атика, поширокиот регион на Атина. Интервенираат противпожарни сили од копно и воздух, а силниот ветер дополнително го отежнува гаснењето, додека пак, иако пожарот е во планински дел, сепак од бројот 112 за итни случаи е испратена порака до жителите на околните населени места да бидат во состојба на готовност за евентуална евакуација.
Во гаснењето помагаат волонтери, цистерни и камиони од периферијата Атика и војската.
Планината Парнита беше зафатена од големи пожари лани во август, како и во текот на летото во 2021 година.
Регион
Непознато лице тешко рани припадник на жандармеријата пред израелската амбасада во Белград
Непознато лице, чиј идентитет се утврдува, со самострел тешко ранил припадник на жандармеријата кој бил на должност да ја обезбедува израелската амбасада.
Вицепремиерот на Србија и министер за внатрешни работи Ивица Дачиќ го посети повреден припадник на Жандармеријата. Дачиќ претходно изјави дека неидентификувано лице, чиј идентитет се утврдува, денеска околу 11 часот пукал со самострел во припадник на жандармеријата и го ранил во вратот.
Припадникот на жандармеријата М.Ј. (1990) употребил оружје во самоодбрана и го победил напаѓачот, кој од здобиените повреди починал.
„Специјалното обвинителство го презеде случајот, иако идентитетот на лицето не е утврден, но нема сомнеж дека се работи за терористички акт насочен и против државата Србија и против припадниците на Жандармеријата. Дали поединец делувал сам или групно ќе дознаеме наскоро… Превентивно уапсивме други лица кои беа во близина на полицискиот објекти. Некои сомнежи се веќе присутни и има индиции дека се работи за луѓе кои се познати на безбедносните служби и се работи за вахабистичко движење, но тоа не е потврдена информација. Ги зајакнавме сите безбедносни мерки во градот. Напаѓачот имал и нож. Заклучокот е дека станува збор за терористички напад во кој се вклучени лица кои имаат врски со вахабистичкото движење“, рече министерот Дачиќ.