Македонија
(Видео) Костовски: Срамно, ВМРО ДПМНЕ ги слави и наградува извршителите од крвавиот 27 април

27 април е најцрниот и најкрвав датум во современата македонска историја. Пред шест години, овде, во македонското Собрание, го видовме вистинското насилничко и режимско лице на ВМРО-ДПМНЕ, изјави пратеникот на СДСМ, Мартин Костовски.
„Вооружени насилници под контрола на ВМРО-ДПМНЕ насилно упаднаа во Собранието со цел да убијат пратеници, да повредат новинари и вработени во Собранието, да го загрозат уставниот поредок, па дури и да предизвикаат граѓанска војна. Само за тие да продолжат да крадат, да се обидат да се спасат од правдата и да ја држат Македонија во заложништво.
Да, ВМРО-ДПМНЕ го смисли и го спроведе крвавиот 27 април. 27 април е крвавиот печат на ВМРО-ДПМНЕ, од кој оваа партија и ден-денеска не сака да се откаже“, рече Костовски.
Тој додаде дека нема никаква промена во ВМРО-ДПМНЕ, дека тоа е истата режимска и насилничка партија.
„Партијата предводена од Христијан Мицкоски, кој и самиот беше надвор во толпата, денес сè уште е на страната на осудените насилници. Наместо осуда, наместо извинување, ВМРО-ДПМНЕ денеска ги слави осудените насилници нарекувајќи ги уставобранители, лицата што се обидоа да го суспендираат уставниот поредок. Бараат амнестија за нив, па дури и злоупотребуваат општински, народни пари, за да ги наградат“, нагласи тој.
Рече дека СДСМ нема да дозволи 27 ми април да се заборави, како и дека нема да дозволи никогаш да се повтори.
„За крвавиот четврток има ефективни затворски казни за извршителите. Секој од нарачателите на овој грозоморен чин во македонската демократија до извршителите мора да одговора“, порача Костовски.
27 април – никогаш повеќе!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.