Македонија
Тркалезна маса за регионална размена и зајакнување на отпорноста на работниците во регионот во областа на трудовата експлоатација
Македонското здружение на млади правници (МЗМП) спроведe настан за споделување и размена на регионални искуства од Западен Балкан за ризиците од појава на трудова експлоатација, вклучувајќи ја правната регулираност и улогата на главните актери во процесот на идентификација на жртви на трговија со луѓе, предизвиците при идентификација на жртви на трговија со луѓе, добри практики за поефикасна идентификација на жртви на трговија со луѓе, како и заклучоци и препораки за подобрување на постоечката законска рамка.
Учесниците ја презентираа актуелната состојба на трудовата експлоатација, профилот на жртвата, системот за идентификација, законската регулираност и координацијата и соработката на Западен Балкан и се дискутираше за предизвиците со кои се соочуваат државите.
Од дискусијата произлегоа заклучоци според кои ќе се изработи и документ за јавни политики. Клучна поента е дека трговијата со луѓе општо, но особено трговијата со луѓе со цел трудова експлоатација менува форми и облици и многу често не е навремено препознаена. Поради тоа мора да се работи на подигнување на јавната свест и да се прави контиунирана обука на вработените кои се вклучени во борбата против трговија со луѓе.
Регионалната соработка и размената на алатките и добри практики е нешто што треба да биде редовен начин на комуникација и функционирање. Постои потреба од обука за сензибилизирање на оние кои во прв ред се среќаваат со потенцијалните жртви како: униформираната полиција, здравствените работници, учителите итн.
Соработката помеѓу Инспекторатите за труд и Полицијата е клучна и само со мултидисциплинарен пристап може да се очекува постигнување на резултати. Конечно, се истакна дека со борбата против трговија со луѓе паралелно мора да продолжи и борбата против корупцијата на Западен Балкан, земајќи предвид дека трговијата со луѓе е организиран криминал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Центар и Бутел денеска без вода
Од ЈП Водовод и канализација – Скопје известуваат дека денеска без вода ќе бидат делови од општините Центар и Бутел.
Поради дефект на улична цевка ф 2“ на улица Рајко Жинзифов бб раскрсница со улица Киро Крстевски Платник без вода ќе останат корисниците на дел од улицата Киро Крстевски Платник и дел од улицата Шумадиска во општина Центар. Водоснабдувањето ќе биде прекинато од 08:00 часот до завршување на интервенцијата.
Поради дефект на огрлица од ф 250мм на улицата Македонско Косовска Бригада крак 11 бб. без вода ќе останат корисниците од комплекст Вива Фреш, касарната Илинден и улица Македонско Косовска Бригада крак 11 во општина Бутел.
Водоснабдувањето ќе биде прекинато од 09:00 часот до завршување на интервенцијата.
Македонија
Мурал на потпорен ѕид долг 120 метри крај реката Пена со порака за отпорност кон поплавите
Потпорниот ѕид изграден за спречување на лизгање на земјиштето во близина на ХЕЦ Пена, покрај тоа што обезбедува сигурност за возилата и пешаците, трансформиран е и во дело на уличната уметност, преку голем мурал кој пренесува порака за отпорност и единство во заедниците соочени со катастрофи.
Муралот е изработен како дел од серијата активности кои УНДП ќе ги спроведе за одбележување на меѓународниот ден за намалување на ризиците од катастрофи, 13-ти октомври.
На претставувањето на муралот нацртан по целата должина на ѕидот долг 120 метри денеска присуствуваа Постојаниот претставник на Програмата за развој на Обединетите Нации (УНДП), Армен Григорјан и градоначалникот на Тетово, Биљал Касами.
„Овој ѕид е одлично направен и обезбедува безбедно одвивање на сообраќајот и движење на граѓаните на Тетово кон Бањиче, популарна рекреативна дестинација. Но, беше сив и ние сакавме да го разубавиме, но и да испратиме значајна порака за отпорност и единство во заедниците соочени со ризик од катастрофи“, изјави Григорјан.
„Големо задоволство е да се биде тука со нашите партнери од УНДП, на презентацијата на овој мурал, во чија подготовка учествуваа и повеќе млади лица. Заедно спроведуваме значајни активности со кои сакаме во Полог да ја засилиме отпорноста кон поплавите и нашите заедници да ги направиме поотпорни на катастрофи“, рече Касами.
Инспирација за приказната претставена на муралот, уметниците најдоа во цртежите кои ги изработија учениците од повеќе основни училишта во Тетовско, на работилниците организирани од УНДП.
Ѕидот кој послужи како платно за уличните уметници е изграден во рамки на проектот за „Подобрување на отпорноста кон поплавите во Полошкиот регион“, финансиран од Швајцарија, кој Програмата за развој на Обединетите нации го спроведува во партнерство со Министерството за животна средина и просторно планирање и општините во регионот.
Македонија
Потпишан договор за европски грант, 50-тина училишта ќе добијат соларни фотоволтаични системи
Педесетина училишта во Македонија ќе ја подобрат енергетската ефикасност преку инсталирање на соларни фотоволтаични системи, за што, денеска министерката за образование и наука проф. д-р Весна Јаневска и вицегувернерот на Банката за развој на Советот на Европа, Томас Бошек потпишаа договор за неповратен грант вреден 1,1 милион евра.
Училиштата ќе ја заменат енергијата базирана на фосилни горива со чиста и обновлива енергија. На овој начин, тие ќе дадат дополнителен придонес кон заштитата на животната средина, а ќе заштедат и средства кои ќе можат да се реалоцираат во унапредувањето на условите за настава.
На потпишувањето на договорот за овој проект одобрен преку Европскиот фонд за зелени општествени инвестиции, наменет за јакнење на инклузивните климатски мерки, Јаневска изрази благодарност до Банката за развој при Советот на Европа за континуираната поддршка на државата во унапредувањето на инфраструктурните услови во областа на образованието.
Министерката изрази очекувања дека соработката во насока на достигнување на европските стандарди за квалитет, ќе продолжи и во иднина.