Македонија
Судски совет ќе остави црна дамка врз правосудството, реагира Блупринт групата

Невладините од Блупринт групата за реформи во правосудството се сериозно загрижени по последните случувања во судскиот совет и особено по вчерашните седници.
„Вчера, на 4 мај 2023 година во период од помалку од четири часа, ССРСМ одржа дури три одделни седници на кои, наместо да ги исправи повредите сторени на седницата на 26 април 2023, продолжи со практиката на повреда на одредбите од Законот за Судскиот совет.
Како група на граѓански организации будно ги следевме случувањата околу разрешувањето на сега веќе поранешната претседателка Весна Дамева и сме непријатно изненадени од разврската и изборот на нов претседател на ССРСМ. Особено е погубно тоа што мнозинството од членовите на Судскиот совет на РСМ останаа глуви на забелешките од страна на огромен број водечки правни експерти, граѓански организации и медиуми дека на седницата одржана на 26.4.2023 се случи флагрантна и недопустлива повреда на Законот за Судскиот совет и Деловникот на Судскиот совет.
За жал и на штета на владеењето на правото членовите на ССРСМ направија неуспешен обид да го „озаконат“ своето незаконско постапување од 26.4.2023, повторно со повреда на одредбите од Законот за Судски совет и Деловникот со кој се уредува работата на ССРСМ. Во две од трите седници одржани вчера беше незаконито исклучена јавноста со повикување на чл. 39 ст. 2 од Законот за Судскиот совет, според кој јавноста може да биде исклучена единствено и само „заради заштита на угледот и интегритетот на судијата или кандидатот за судија“ што не беше случај. Меѓучовечките односи помеѓу членовите на ССРСМ не се и не можат да бидат основ за исклучување на јавноста. Потенцираме дека не се работи за приватни односи помеѓу вработени лица туку за односи помеѓу носители на јавна функција, членови на колективен орган со особено значајни уставни надлежности, и затоа Судскиот совет на РСМ како институција не треба да биде заложник на меѓучовечките односи на неговите членови“, велат од Блупринт групата во своето соопштение.
Оттаму се убедени дека со последниве случувања, Судскиот совет на РСМ е на пат да го загуби целосно легитимитетот да избира, оценува и разрешува судии.
„Легитимитетот, покрај од Уставот, во суштинска смисла треба да извира пред сѐ од стручноста, професионалноста и интегритетот на членовите на овој орган кои со своето познавање на правото треба да бидат пример за севкупната правосудна фела посебно кога станува збор за судии и истакнати правници. Оценувањето на работата на судии, кое претставува единствен случај на проверка на работата на носителите на власт во Република Северна Македонија од аспект на стручност и професионалност, треба да го вршат исклучиво лица кои со своето професионално искуство и знаење покажале дека се стручни и независни, а не лица кои се обидуваат да ги заобиколат законите за да остварат одредена цел која не е поврзана со правото и за која оправдано постои сомнеж за постоење на политички влијанија. Ова особено ако се следи дека четири од петте избрани членови на ССРСМ од страна на Собранието (со исклучок на Весна Дамева) беа поддржувачи на одлуката од 26.4.2023 година, која по тврдењата на Дамева е донесена по политички притисок, со што се поставува прашањето во јавноста дали до оваа состојба во Судскиот совет дојде по основ на политички влијанија врз членовите кои не доаѓаат од редот на судиите
Овие случувања за жал ќе предизвикаат особено црна дамка врз правосудството во целина иако одговорноста е пред сѐ кај членовите на ССРСМ и дополнително негативно ќе влијаат на довербата во правосудството која и така е на незавидно ниско ниво. Упатуваме повик до сите чинители вклучувајќи ги и членовите на ССРСМ да бидат достојни за функцијата која ја вршат и да преземат мерки за утврдување на индивидуална одговорност за сторените повреди од Законот за Судскиот совет на Република Северна Македонија“, дополнуваат од Блупринт групата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шукова и Мојсова најавија наплата на паркингот за гости во Карпош: Сите знаеме како е да кружиме околу зграда за слободно место

Кандидатките за градоначалнички на Скопје и на Карпош од СДСМ, Каја Шукова и Маја Мојсова, од Млечен ресторан денес најавија паметни паркинзи со дигитална наплата во оваа општина. Паркирањето на најголем дел од Карпош е бесплатно, но двете кандидатки за градоначалнички сметаат дека тоа не треба да остане така за да има повеќе места за паркирање на жителите.
„Денска сме во Карпош, општина што секојдневно се соочува со еден проблем, а тоа е паркирање. Сите знаеме како е да кружиме околу зградата по работниот ден барајќи слободно место, а коа ќе ни дојдат гости, уште поголем хаос. Во нашата програма паркирањето и урбанизамот се врвен приоритет. Воведуваме паметни паркинзи со дигитална наплата, зони на периферијата поврзани со јавен превоз и информации во реално време. Преку стратегијата ‘Скопје за сите’ обезбедуваме субвенциониран паркинг за семејствата со ниски приходи, пензионерите, младите невработени и секако лицата со попреченост“, рече Шукова.
Паркирањето таа ветува дека ќе го решава и со посебна стратегија „Скопје 2050“.
„Секој нов урбанистички проект ќе мора однапред да предвиди паркинг, зелени површини и простор за пешаци. Не по изградбата туку какао предуслов. Урбанизмот ќе биде транспарентен. Сите планови ќе бодат достапни онлајн со можност за јавни предлози. Ќе донесеме нов, строг и еколошки Генерален урбанистички план. Во првите две до четири години ќе ја изработиме стратегијата Скопје 2050, долгорочна визија за паметен и одржлив град со мешовити урбани зони и уредени јавни простори“, рече Шукова.
Мојсова се пожали дека денес изгубила многу време за да паркира кај Млечен, како што рече, нејзиното поранешно маало.
„Вртев половна час за да најдам паркинг место за да стасам тука. Сакаме Карпош да ја направиме самоодржлива општина. Што значи соамоодржлива? Тоа значи дека ние ќе стопанисуваме со паркингот, ќе треба да се исцртаат паркинг местата, ќе треба да знаеме точно колку паркинг места има во општина Карпош, но сето тоа ќе мора да биде и со некакво субвенционирање за граѓаните на Карпош, а за посетителите ќе биде со наплата. Тоа значи дека ќе работи по принципот на ПОЦ. Немањето паркинг секогаш е поврзано со неноранлата урбанизација, која во суштина ги прави овие проблеми. Кога ќе се сетам на минатото тука секогаш сум можела да најдам паркинг, сега не. И тоа не е најголемиот проблем, ова е првиот дел кој се граничи со општина Центар, кој е бесплатен и нормално сите посетители кои одат во Центар и кои што треба да плаќаат паркинг, тука наоѓаат бесплатен паркинг. Некако ќе мораме да го решиме тој проблем, граѓаните на Карпош се пред сите граѓани во оваа општина, да си го најдат паркинг местото и да доаѓаат без нервози дома“, рече Мојсова.
Им вети на карпошани дека повеќе урбанизација нема да има во тој дел на општината, односно нема повеќе да дозволува на местото на куќите кои се останати да се прават згради, а не ја исклучи и можноста паркирањето да се решава со монтажна гаража.
Македонија
Муцунски – Плаколм: Поддршка од Австрија за проширувањето на ЕУ

Денеска, во Министерството за надворешни работи и надворешна трговија, министерот Тимчо Муцунски оствари средба со министерката за Европа, интеграција и семејство на Република Австрија, Клаудиа Плаколм, која престојува во работна посета на нашата земја.
Во фокусот на разговорите беа актуелните прашања поврзани со европската интеграција и напредокот на државата во процесот на пристапување кон Европската унија.
Министерот Муцунски ја реафирмираше стратешката определба за членство во Унијата, нагласувајќи ја посветеноста кон спроведување на реформите, унапредувањето на регионалната соработка, добрососедските односи и придонесот кон стабилноста и мирот во регионот.
На средбата беше потврдена и континуираната поддршка на Австрија за проширувањето на Европската унија и нејзината важна улога во поттикнување на европската перспектива на земјите од Западен Балкан.
Двајцата соговорници ги потврдија одличните билатерални односи меѓу двете држави, при што изразија подготвеност за нивно понатамошно унапредување, со посебен акцент на продлабочување на трговската и економската соработка.
Македонија
Помошник на министерот за внатрешни работи незаконски зел надоместоци за прекувремена работа и бонус плата

Полицијата поднесе кривична пријава против помошник на министерот за внатрешни работи, раководител на Одделот за дисциплински и судски постапки, затоа што незаконски зимал надоместок за прекувремени работни часови како и една бонус плата со што го оштетил буџетот на МВР за над 100.000 денари.
Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство Скопје поднесе кривична пријава против Љ.Р. поради постоење на основи на сомнение дека пријавениот сторил кривично дело „злоупотреба на службена положба и овластување.
Пријавениот, како помошник на министерот за внатрешни работи, раководител на Одделот за дисциплински и судски постапки, ја искористил својата службена положба или овластување, односно ги пречекорил границите на своето службено овластување.
Тој за месеците јуни, јули, август, септември, ноември и декември 2023 година, врз основа на списоци за евиденција на прекувремени работни часови и листа на работници од Одделот за дисциплински и судски постапки кои ги исполнуваат услови за исплата на бонус плата за 2023 година која лично ја одобрил, во отсуство на писмени наредби за реализирани часови работа со кои бил задолжен да извршува работи и задачи повеќе од полното работно време, се стекнал со парични средства на име работа подолга од полното работно време во износ од 80.134 денари и бонус плата за 2023 година во износ од 36.614 денари или вкупна противправна имотна корист во износ од 116.748 денари на штета на буџетот на МВР.