Европа
ЕБУ му забрани на Зеленски да се обрати на Изборот за песна на Евровизија
Украинскиот претседател Володимир Зеленски доби забрана да испрати видеопорака на финалето на Изборот за песна на Евровизија, чиј домаќин годинава во име на Украина е Велика Британија, пренесува „Јуроњуз“.
Зеленски изрази желба да сними видеопорака за натпреварувачите и за глобалната публика од 200 милиони луѓе за време на финалето на изборот, кое ќе се одржи в сабота во Ливерпул.
Организаторите на настанот велат дека постојат правила за да се задржи политиката надвор од натпреварот во пеење.
Европската радиодифузна унија (ЕБУ), која го продуцира настанот, рече дека го одбила барањето на украинскиот претседател да ѝ се обрати на публиката иако ја забележала неговата „намера за пофалба“.
„Натпреварот за песна на Евровизија е меѓународно забавно шоу и е раководено од строги правила и принципи, кои се воспоставени од неговото создавање. Еден од темелите на натпреварот е неполитичката природа на настанот. Овој принцип ја забранува можноста за давање политички или слични изјави“, се вели во соопштението од ЕБУ.
Одлуката на ЕБУ наиде на критики во некои кругови, кои тврдат дека од морален аспект на Украина мора да ѝ се даде можност да зборува против руската агресија.
Видеопораките на Зеленски на популарни настани и претходно предизвикаа контроверзии. Така, група италијански политичари сметаа дека говорот на Зеленски при неговото обраќање на музичкиот фестивал во Сан Ремо бил премногу политички.
The #Sanremo Music Festival, Italy’s biggest song contest and one of the most popular live-streamed TV programmes in the country, started with a fair bit of drama this year.https://t.co/eYkLtbRBhB
— Euronews Culture (@euronewsculture) February 8, 2023
Во услови на наплив на јавна поддршка од гласачите во Европа, украинската рап-група „Калуш“ победи на натпреварот минатата година, но Украина не можеше да биде домаќин на Евровизија поради руската инвазија, па организацијата ја презеде Велика Британија, која беше втора лани.
Инсајдери од Би-би-си, кои помогна да се организира настанот во Ливерпул, изјавиле претходно за „Тајмс“ дека во тек се тешки и деликатни преговори во врска со барањето на Зеленски поради стравувањата на организаторите на Евровизија од последиците од одбивањето на барањето.
Во текот на изминатата година Зеленски побара да се обрати – и беше експресно одбиен – на многубројни меѓународни настани.
„Оскарите“ го одбија во двата наврата истакнувајќи дека неговото обраќање ќе ги направи наградите несоодветно политички.
Филмскиот фестивал во Торонто во Канада го одби во септември минатата година, а ФИФА го одби барањето на Зеленски за обраќање на финалето на Светското првенство во Катар во декември.
„Навистина штета. Тој ќе им беше достојна конкуренција на учесниците на Евровизија годинава“, изјави портпаролката на руското Министерство за надворешни работи, Марија Захарова, коментирајќи ја одлуката на ЕБУ.
Захарова очигледно алудира на претходната кариера на Зеленски како комичар, кој понекогаш настапувал облечен како транссексуалец, а во една пригода се преправал дека свири пијано со половиот орган.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Втор круг парламентарни избори утре во Франција
Во Франција утре ќе се одржи вториот круг од парламентарните избори, на кои гласачите ширум Франција и прекуморските територии ќе гласаат за 501 од 577 места во Националното собрание, долниот и најважен дом на францускиот парламент.
Останатите 76 места веќе беа освоени во првиот круг на гласање, пренесе АП.
Екстремно десничарскиот Национален собир (РН) и неговите сојузници водат по првиот круг од изборите со околу 34 отсто од гласовите, левичарската коалиција Нов народен фронт освои 29 отсто од гласовите, а центристичката коалиција Заједно, која ја вклучува и партијата „Преродба“ на францускиот претседател Емануел Макрон, таа го зазеде третото место.
Во текот на неделата помеѓу двата круга на изборите, стотици центристички и левичарски кандидати се повлекоа од трката за да ги зголемат шансите на нивните умерени ривали и да се обидат да го спречат кандидатот на РН да победи.
Според резултатите од анкетите на јавното мислење, оваа тактика може да ги намали шансите на крајната десница да освои апсолутно мнозинство.
Сепак, партијата на Марин Ле Пен има поголема поддршка од кога било досега, а одлуката е на гласачите.
Проекциите на анкетите сугерираат дека РН најверојатно ќе има најмногу места во следното Национално собрание за прв пат по Втората светска војна, но најверојатно нема да има апсолутно мнозинство од 289 места.
Доколку РН добие апсолутно мнозинство, Макрон би го назначил Јордан Бардела, претседател на РН, за нов премиер на Франција, што би довело до „кохабитација“ на претседател од една политичка струја и премиер од друга.
Модерна Франција имаше три кохабитации, последната со конзервативниот претседател Жак Ширак и социјалистичкиот премиер Лионел Жоспен од 1997 до 2002 година.
Во случај на „кохабитација“, премиерот е одговорен пред парламентот, ја води владата и воведува закони.
Претседателот е ослабен за време на „кохабитацијата“, но сепак има одредени овластувања во областа на надворешната политика, европските прашања и одбраната и е одговорен за преговарање и ратификација на меѓународните договори.
Претседателот е исто така врховен командант на воените сили на земјата и ги поседува нуклеарните кодови.
Ова најверојатно ќе ги запре ветувањата на Макрон за реформи, како што се преобликување на бенефициите за невработеност или легализирање на евтаназијата за смртно болните.
„Кохабитацијата“ може да го отежне и носењето на буџетот.
Во случај резултатот од изборите да биде релативно мнозинство во парламентот (230 пратенички места), победникот ќе мора да склучи сојузи кои ќе овозможат носење закони, односно функционирање на парламентот.
Ако партијата не освои мнозинство, но освои голем број места, Макрон би можел да го назначи Бардела за премиер, иако РН може да го отфрли ова поради страв дека нивната влада може да биде заменета со гласање за доверба.
Постои уште една можност Макрон да избере премиер од партиите на центарот и левицата и да се обиде да коалицира со умерените партии.
Ако ниту една партија нема јасна поддршка за водење на владата, Макрон би можел да назначи влада од експерти.
Таквата влада најверојатно ќе се занимава со секојдневните прашања за одржување на нормалното функционирање на Франција.
Секоја од овие опции бара парламентарна поддршка.
Доколку политичките преговори траат долго за време на летните одмори и Олимписките игри, кои се одржуваат од 26 јули до 11 август во Париз, Макрон би можел да ја задржи преодната влада до понатамошно известување.
Макрон има претседателски мандат до 2027 година и изјави дека нема да се повлече пред крајот на мандатот.
За време на претходните кохабитации, одбраната и надворешната политика се сметаа за неформален домен на претседателот, кој вообичаено успеваше да постигне компромиси со премиерот за Франција да зборува со еден глас во странство.
Сепак, денес позициите и на екстремната десница и на левичарската коалиција во овие области значително се разликуваат од пристапот на Макрон и веројатно би биле предмет на тензии за време на потенцијалната кохабитација.
Бардела рече дека како премиер би бил против испраќање француски војници во Украина, можност што Макрон не ја отфрли.
Тој, исто така, рече дека ќе ги одбие француските испораки на ракети со долг дострел.
Околу 30.000 полицајци ќе бидат распоредени ширум Франција во недела за време на вториот круг од парламентарните избори за да се осигураат дека нема да има немири.
Европа
Албанец во Италија киднапирал жена и дете: ги пресретнал додека го носела синот во градинка, им се заканил со нож и ги врзал
Италијанската полиција уапси 33-годишен маж со потекло од Албанија, кој киднапирал жена и нејзиниот син во близина на Падова.
Жената и детето се ослободени, јавува римскиот весник „Стато Котидијано“.
Уапсениот пресретнал жена во регионот Венето, додека таа го возела својот син во градинка и со закана со нож ја принудил да му ја предаде контролата на возилото, а потоа ги врзал неа и детето.
По околу половина час, сопругот на киднапираната жена повикал полиција, загрижен дека неговата сопруга не се вратила.
Полицијата успеала телефонски да стапи во контакт со жената, но врз основа на нејзините чудни одговори заклучила дека нешто не е во ред.
Веднаш започна потрагата, која се прошири и во соседните региони, а благодарение на поддршката на системот за откривање регистарски таблички на италијанските патишта и технологијата за лоцирање на уреди за мобилни телефони, одобрена од Јавното обвинителство во Падова, карабинерите успеаја да лоцирајте го возилото.
Киднаперот се обидел да ги задржи жената и детето како заложници, но по бркотницата бил опколен во градот Тренто, оддалечен 100 километри, каде што бил уапсен.
Европа
Столтенберг: НАТО беше однапред информиран за одењето на Орбан во Москва
Генералниот секретар на НАТО, Јенс Столтенберг, денеска изјави дека алијансата била однапред информирана за заминувањето на унгарскиот премиер, Виктор Орбан, во Москва на разговори со рускиот претседател, Владимир Путин.
Столтенберг на самитот на НАТО истакна дека Орбан патува во својство на премиер на Унгарија и дека нема да го претставува НАТО, чиј член е Унгарија, во Москва, пренесува „Ројтерс“. Орбан рано денеска пристигна во Москва и по пристигнувањето рече дека со оваа посета ја продолжува мировната мисија откако неодамна го посети Киев, каде што разговараше со украинскиот претседател, Володимир Зеленски.
Столтенберг рече и дека НАТО работи на подготовка на Украина за приклучување кон алијансата.
„Сè што правиме, правиме за да ја направиме Украина посилна и поподготвена да се приклучи на нашиот сојуз“, рече тој додавајќи дека очекува земјите членки да обезбедат повеќе воздушна одбрана и муниција на Украина.
Столтенберг додаде дека Украина треба да одлучи, кои се прифатливите услови за мировни преговори. Од друга страна, според него, нема индиции дека Путин е подготвен за мир.