Семејствата на жртвите на поранешната терористичка група ЕТА се бесни откога баскиската партија ЕХ Билду, која се залага за независност, вклучи 44 осудени поранешни членови на терористичката организација на своите официјални списоци за регионалните и општинските избори, пренесува „Еурактив“.

Одлуката на ЕХ Билду да вклучи поранешни членови на ЕТА, од кои седум се осудени за убиство, на своите 300 листи за општинските избори во Баскија и Навара, предизвика експлозивна дебата во политичките кругови во регионот и во Мадрид во особено жестоката кампања.

Меѓу првите политичари што излегоа со реакција беше шпанскиот министер за внатрешни работи, Фернандо Гранде-Марласка (ПСОЕ), кој го смета потегот на ЕХ Билду за навреда на демократијата и за сериозна повреда на жртвите на тероризмот.

Еускал Херија Билду (ЕХ Билду) е коалиција на баскиските националистички партии што се залагаат за независност. Основана во 2012 година, коалицијата има четири пратеници во шпанскиот парламент, а лидер на коалицијата е поранешниот припадник на ЕТА, Арналдо Отеги.

Во меѓувреме, лидерот на централнодесничарската опозициска Партидо популар (ПП/ЕПП), Алберто Нуњез Фејо, во саботата посочи дека не само што е непристојно да се има поранешни членови на ЕТА на списоците на ЕХ Билду, туку е непристојно и тоа што ПСОЕ ја има поддршката во парламентот од баскиската партија за независност за одобрување на некои од нејзините политики.

Реакциите беа најжестоки меѓу семејствата на жртвите на ЕТА. Даниел Портеро, претседател на организацијата „Дигнинад и хустисија“ (Достоинство и правда) го повика шпанското Јавно обвинителство да провери дали потегот е во согласност со одредбите на Законот за политичките партии.

Здружението на жртвите на тероризмот (АВТ), кое ги анализира казните на 44-те кандидати на ЕХ Билду, истакна дека сите тие ги издржале своите казни и затоа нема основа за неподобност, објави регионалната баскиска радиотелевизија ЕИТБ.

Портеро, син на поранешниот главен обвинител во Андалузија, Луис Портеро, кого ЕТА го уби во октомври 2000 година, истакна дека контроверзните кандидатури би можеле да претставуваат флагрантно кршење на Законот за политичките партии бидејќи ЕХ Билду на своите списоци вклучува луѓе осудени за тероризам, што автоматски ги дисквалификува.

Консуело Ордоњез, претседателка на групата Жртви на тероризмот во Баскија (Ковите), ја нарече иницијативата на ЕХ Билду провокација и резултат на демократски дефицит и ги повикаПС и ОЕ и ПП да усвојат минимум политички и етички критериуми за ова.

Ордоњез, која е сестра на Грегорио Ордоњез, советник на ПП во Сан Себастијан убиен од ЕТА во јануари 1995 година, ја критикува ПСОЕ дека не зазема став во врска со нејзиниот предлог, а ПП ја критикува за политичка употреба на тероризмот, пренесе „Ел паис“.

На 3 мај Шпанија ја одбележа петтата годишнина од формалното расформирање на ЕТА, терористичката организација која уби најмалку 840 луѓе во шесте децении терор (1958/60-2018).