Македонија
Родителите на Јана сослушани во Обвинителството, дали има лекарска грешка се чека на Институтот за судска медицина
Родителите на петгодишната Јана, која почина по примањето инфузија со гликоза во битолската болница, дале искази во Обвинителството. Го виделе и обдукцискиот наод, но и тие, како и Обвинителството, го чекаат извештајот на Институтот за судска медицина.
„Дадовме искази во Обвинителството. Го кажавме сето она што веќе го изјавивме во медиумите. Ни го покажаа наодот од обдукцијата, но за да биде конечен, ќе чекаме да се изјасни Институтот за судска медицина. Ни кажаа дека тоа е процес што ќе потрае, неопходно е да се почекаат сите резултати“, вели Кристина Христовска, мајка на петгодишната Јана, за „Макфакс“.
Од Обвинителството веќе известија дека го разгледале наодот од обдукцијата извршена во Клиничката болница во Битола и со наредба побарале, врз основа на сите прибрани докази, да се изјасни Институтот за судска медицина за евентуална причинско-последична врска на медицинскиот третман со причините за смртта.
Родителите во сите досегашни изјави во медиумите се изјаснија дека се убедени оти за нивната ќерка пресудна била инфузијата со гликоза, која ѝ била дадена и покрај тоа што крвната слика покажала зголемено ниво на шеќер и оти се работи за лекарска грешка.
Петгодишната Јана почина во битолската болница во март годинава, само неколку часа откога била примена дехидрирана, со повраќање и со оток на очите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Топло со умерена облачност, температурата до 25 степени
Времето денеска ќе биде сончево и топло со мала до умерена локална облачност. На североистокот ќе има услови за појава на краткотраен дожд.
Ќе дува слаб до умерен, а по должината на Повардарието краткотрајно засилен ветер од југоисточен правец. Минималната температура ќе биде во интервал од 6 до 12, а максималната ќе достигне од 20 до 25 степен.
Во Скопје сончево и топло со мала до умерена облачност. Ќе дува слаб до умерен ветер од југоисточен правец. Минималната температура ќе се спушти до 11, а максималната ќе достигне до 23 степени.
Ќе настапи преодно стабилизирање на времето со позначителен пораст на дневната температура. Од сабота кон крајот на денот повторно се очекува нестабилно време со локален пороен дожд и грмежи, локално во форма на невреме. Повремена претежно попладневна нестабилност со пороен дожд и грмежи, со променлив интензитет, ќе има сѐ до средината на следната недела.
Скопје
108 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територијата на град Скопје изречени се вкупно 108 мерки, меѓу кои девет мерки за возење без возачка дозвола, четири санкции за минување на затворен сигнал – црвено светло, седум мерки за користење мобилен телефон при возење, осум санкции за некористење на сигурносен појас…“, извести МВР.
Од таму додаваат дека сообраќајните контроли продолжуваат и во наредните денови.
Македонија
Нема подолги задржувања за влез и излез од државата
Сообраќајот на државните патишта се одвива непречено, по наместа влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.