Македонија
Рокот за менување на личните документи е 2024 година, Спасовски се правда дека поскапеле за да може да се функционира

Сите граѓани во чии лични исправи го нема новото уставно име на државата, Република Северна Македонија, имаат рок до 2024 година да ги заменат со нови. Министерот Оливер Спасовски, денес, откога го претстави електронското државјанство, одговарајќи на новинарски прашања, рече дека рокот истекува, а неодамнешното поскапување на услугата за вадење на новите документи го оправда со поскапите цени на репроматеријалите.
„Следнава година, 2024, е рокот во кој треба да бидат заменети личните документи бидејќи дадовме рок при промена на Уставот на Република Северна Македонија и Законот за јазиците. Наводните цени се зголемени 90 % на репроматеријалите и затоа направивме зголемување, кое не е големо имајќи предвид дека утврдивме два вида цени. Оние што ги менуваат пасошите на 5 години, значи до 27 години, имаат иста цена на услуги, а за остатокот, имајќи предвид дека 10 години е важноста на документот, цената е незначително зголемена за да можеме да ги остваруваме тие функции“, рече министерот Спасовски.
Во март годинава поскапеа услугите за вадење лични документи. Личната карта од 190 денари поскапе на 310 денари. Пасошот за лицата над 27 години од 1.500 денари стана 2.000 денари, а возачката дозвола од 280 поскапе на 410 денари.
Смената на сите три документи од лице е 2.720 денари. Дополнително, МВР најави менување на регистарските таблички на кои треба да стои кодот NMK. Смената чини 1.500 денари. Министерот Спасовски пред неколку месеци најави можност за намалување на трошокот доколку се прифати предлогот, место нови таблички, да се стави налепница со новиот код NMK врз стариот код MK, но конечен став сè уште нема.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сомненија за шверц на златен накит вреден половина милион евра на скопскиот аеродром

Oбвинителството донесе наредба за спроведување истражна постапка против две лица, белгиски државјани, кои се осомничени дека како соизвршители сториле кривично дело шверцување.
Осомничените, маж и жена од Антверпен, на 6 април пристигнале во земјата со лет од Виена, па избегнувајќи ја царинската контрола на аеродромот, пренеле непријавени стоки – вкупно 209 парчиња златен накит со тежина од 1.711,1 грама и во вкупна вредност од 479.555 евра.
Откога ја поминале пасошката контрола на аеродромот во Скопје, осомничените поминале на зелениот канал, каде што поминуваат патници што немаат стока за пријавување, а второосомничениот при селекција од страна на царинскиот службеник бил упатен на преглед на личниот багаж на скенер, каде што било забележано дека двата куфера се наполнети со празни кутии за накит и други непријавени предмети. Тој појаснил дека патува со сопругата, која е првоосомничена, и дека таа ја поминала пасошката контрола. Нешто подоцна осомничената се вратила и при дополнителен царински преглед, во личниот багаж – ранецот, кој го носела, била пронајдена непријавената стока – златен накит, која ѝ била одземена.
Јавниот обвинител до судијата на претходна постапка достави предлог за определување мерка притвор за двајцата странски државјани осомничени за шверц на стока, која е во вредност од големи размери.
Македонија
29-годишниот Aлександар е 61. жртва на пожарот: имал 35 отсто изгореници од трет степен

Александар Гавриловски, роден на 7 март 1996 година, е 61. жртва на пожарот во кочанската дискотека „Пулс“.
Тој почина денес во 11 часот како еден од покритичните пациенти што се лекувале во Литванија.
Министерот Арбен Таравари изјави дека од 4 април му била влошена состојбата, а од вчера бил ставен на хемодијализа. На телото имал 35 отсто изгореници од трет степен, како и изгореници на дишните патишта.
Во моментот меѓу повредените што се лекувата има уште двајца критични пациенти, а нивната состојба е стабилна.
Александар е вториот пациент што почина во Литванија од 193-те повредени лица во пожарот.
Министерот Таравари изрази сочувство до семејството.
Во петокот минатата недела во Литванија почина и управителот на дискотеката „Пулс“, Александар Карадакоски. Министерот Таравари рече дека неговата состојба цело време била критична, на 1 април му откажале бубрезите, 36 отсто од телото му било со изгореници, а од вдишаниот пламен, дури 90 отсто од дишните патишта му биле изгорени.
Македонија
Фетаи: Земјата ги има решено речиси сите случаи на лица без државјанство, кои произлегуваат од распадот на поранешна Југославија

Заменик-претседателот на Владата на Република Северна Македонија, задолжен за политики на добро владеење, Арбен Фетаи, денеска оствари работна средба со г. Габриел Гуалано де Годој, претставник на Агенцијата на Обединетите нации за бегалци (УНХЦР) во Скопје, со кого разговараше за извонредниот напредок што го постигна Северна Македонија во елиминацијата на појавата на лица без државјанство.
За време на средбата беше истакнато дека Северна Македонија е веќе позитивен пример во рамките на глобалната алијанса за решавање на лица без државјанството позиционирајќи се како регионален и глобален лидер во оваа област. Земјата ги има решено речиси сите случаи на лица без државјанство, кои произлегуваат од распадот на поранешна Југославија, при што остануваат само уште два нерешени случаја, кои се однесуваат на граѓани од други поранешни републики што живееле на територијата на нашата земја пред распадот.
Дополнително, евидентирани се и 153 други случаи на лица без државјанство, кои главно се резултат на нерегистрирање деца по раѓањето. Од овие случаи, 90 проценти се од ромската заедница, 7 проценти се Албанци, 1 процент Македонци и 2 процента се од други етнички групи.
„Решавањето на проблемот со лицата без државјанство е многу повеќе од статистички предизвик – тоа е хуман и трансформативен чин, што директно го менува животот на луѓето“, беше потенцирано на средбата.
„Измените на Законот за државјанството имаа длабоко влијание врз животот на многу граѓани враќајќи им го човековото достоинство, кое им било скратено повеќе од три децении“, истакна Фетаи.
Заменик-претседателот на Владата ја повтори заложбата на Владата да продолжи со изградба на инклузивно општество, каде што секој граѓанин има право да постои со достоинство и да придонесува кон заедничката иднина на државата.
„Нашата заложба за измена на Законот за државјанството ги трансформира животите на овие луѓе и семејства враќајќи им го човековото достоинство, кое им беше скратено три децении по ред. Оваа заложба не запира тука. Ќе продолжиме да градиме инклузивно општество, во кое секој граѓанин има право да постои со достоинство и да придонесува кон заедничката иднина“, констатира Фетаи.