Свет
(Видео) Aмерикански платеник кој обучувал Украинци убиен во Бахмут
Лидерот на руската приватна воена компанија „Вагнер“, Евгениј Пригожин, во видео објавено во вторникот на каналот на компанијата на „Телеграм“ тврди дека американски државјанин загинал во украински град Бахмут, пренесува Си-ен-ен.
Американскиот државјанин и платеник Николас Дуан Мајмер, инаку поранешен ветеран на специјалните сили на Армијата на САД, бил ликвидиран ноќеска, вели Пригожин во едно од последните видеа на „Вагнер“ објавено на мрежите.
Во видеото во кое говори промосковскиот воен блогер Александар Симонов, Пригожин е прикажан како прегледува едно тело и, како што тврди тој, американски документи за идентификација.
Видеото е снимено ноќе во западните делови на Артјомовск – руското име за Бахмут – и на него се слушаат звуци од минофрлачки напад.
Мајмер пристигнал во Украина пред повеќе од една година и првично ѝ се приклучил на американската приватна воена компанија „Моцарт груп“, но набрзо ја напуштил и почнал да ги обучува украинските сили за територијална одбрана, пишува истакнатиот воен дописник Евгениј Подубиниј.
Според Пригожин, Мајмер чесно загинал во војната и затоа неговото тело, кое било пронајдено во урнатините на една повеќекатница во западниот дел на Бахмут, ќе биде ставено во ковчег завиткан во американско знаме, и ќе биде испратено во САД.
„Значи, ќе им го предадеме на САД, ќе го ставиме во ковчег, ќе го покриеме со американско знаме од почит, бидејќи тој не умрел во својот кревет како дедо, туку во војна и со најверојатно достојна смрт, нели,“ вели лидерот на „Вагнер“.
Пригожин и „Вагнер“ често објавуваат видеа за пропагандни цели и често мешаат вистински снимки со пропагандни тврдења.
Си-ен-ен не може да ја потврди автентичноста на документите и не може да ја потврди националноста на телото прикажано на видеото, не наведувајќи го ниту името на загинатиот во очекување на потврда за неговиот идентитет.
Wagner owner Prighozin shows the veteran ID card and purportedly the body of Nicholas Dwain Maimer. According to pro-Ukrainian sources, Mainer was tortured before he was finally killed. pic.twitter.com/mufxiIZwpg
— Tessaron News (@TessaronF) May 16, 2023
Ниту американскиот Стејт департмент не го потврди тврдењето на Пригожин, но портпаролот рече дека се запознати со извештаите и дека бараат дополнителни информации.
„Нашата способност да ги потврдиме извештаите за смртта на американските граѓани во Украина е крајно ограничена“, истакна портпаролот во вторникот, изразувајќи им сочувство на семејствата на сите чии животи се изгубени како резултат на војната во Украина.
Тој исто така повтори дека Американците не треба да патуваат во Украина.
„Ја повторуваме нашата порака дека граѓаните на САД не треба да патуваат во Украина поради активниот вооружен конфликт и издвојувањето на американските граѓани во Украина од страна на руските безбедносни службеници. Исто така нагласуваме дека американските граѓани во Украина треба веднаш да заминат ако е безбедно да го сторат тоа користејќи какви било комерцијални или други приватно достапни опции за копнен транспорт“, додаде портпаролот на Стејт департментот.
Бахмут и понатаму останува центар на борбите на фронтот во Украина, а главните битки моментално се водат во нејзиниот западен дел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Злосторство во Тузла: мајка со чекан си ја убила ќерката, оставила две проштални писма
Незаборавно злосторство се случи во Босна и Херцеговина, пренесуваат локалните медиуми.
64-годишен маж, утринава, околу 1.15 часот во полициската станица ПС Центар пријавил дека во семејниот дом во Тузла го пронашол безживотното тело на 31-годишната ќерка.
Полицијата излегла на самото место и ги потврдила наводите од пријавата за што веднаш било известено Кантоналното обвинителство на Тузланскиот кантон, извести МУП ТК, пренесе „Аваз“.
„Во текот на истрагата е констатирано дека жената имала повреда во задниот дел на главата. Денеска ќе биде наредена обдукција за да се утврди точната причина за смртта“, изјави Адмир Арнаутовиќ, портпарол на Обвинителството ТК.
Според последните информации, како што пренесуваат тамошните медиуми, станува збор за кривично дело, кое, според првите индиции, најверојатно, го извршила мајката на 31-годишна девојка. На самото место истражителите пронашле две проштални писма, како и предметот со кој, сметаат истражителите, е извршено делото. Очигледно се работи за чекан.
Девојката која е убиена наводно била тешко болна.
Свет
Борел: Без поддршката на Западот, војната во Украина ќе завршеше за 15 дена
Високиот претставник на Европската Унија за надворешна политика и безбедност, Жосеп Борел денеска изјави дека војната во Украина ќе заврши за 15 дена доколку западните сојузници престанат да ја поддржуваат таа земја.
„Многу луѓе сакаат војната да заврши што е можно побргу. За почеток, самите Украинци. Но, важно е како. Ако престанеме да ја поддржуваме Украина, за петнаесет дена војната ќе заврши и рускиот претседател Владимир Путин ќе ги постигне своите цели, но дали тоа е она што го сакаме за Украинците и за безбедноста на нас Европејците?, изјави шефот на европската дипломатија во интервју за шпанскиот весник „20 минути“.
Тој повтори дека сојузниците мора да направат сè што е во нивна моќ за кога ќе дојде време за преговори со Русија, Украина да ги води „под услови поволни за суверенитетот и територијалниот интегритет“.
Свет
Шолц: Германија стои до Израел, мора да се спротивставиме на терористите на Хамас
Германскиот канцелар Олаф Шолц денеска изјави дека Германија стои на страната на Израел нагласувајќи дека мора да се спротивстави на терористите на Хамас.
Тој ова го рече на отворањето на меѓународната конференција за одржливост, што се одржува во Хамбург, и посочи дека официјален Берлин ги поддржува прекинот на огнот, ослободувањето на заложниците и почетокот на политичкиот процес, дури и ако тоа изгледа потешко од кога било.
„Решението со две држави може да биде единствена цел за секој политички процес“, рече Шолц.
Според него, изминатата година на војна му донесе незамисливо страдање на палестинското население во Појасот Газа.
„Хезболах и Иран мора веднаш да ги запрат нападите врз Израел“, рече Шолц и предупреди дека овие напади претставуваат уште една ескалација во инаку тензичната ситуација на Блискиот Исток.
Израел денеска ја одбележува првата годишнина од нападот на палестинската милитантна група Хамас, а израелскиот претседател Исак Херцог го почна денот со едноминутно молчење во кибуцот Реим.
Во нападот на Хамас на 7 октомври 2023 година загинаа најмалку 370 луѓе, а во војната што тогаш избувна и сè уште трае до крајот на септември годинава загинаа повеќе од 43.000 луѓе, од кои 41.431 Палестинци, најмногу во Појасот Газа.
Повеќе од половина од зградите во Појасот Газа се уништени, а речиси целото население на Газа е раселено – приближно 2,3 милиона луѓе.