Европа
Британската влада им плаќа на албанските затвореници да се вратат дома
![](https://makfax.com.mk/wp-content/uploads/2023/05/Риши-Сунак-Еди-Рама.jpg)
Бројот на летови за депортација од Обединетото Кралство за Албанија се зголеми по договорот за соработка меѓу двете земји постигнат лани во декември за одвраќање и спречување на нелегалната миграција, пренесува албанската редакција на Би-би-си.
Британското Министерство за внатрешни работи соопшти дека оттогаш се вратени повеќе од 1.000 луѓе: околу половината доброволно, а другите се комбинација од одбиени барања за азил и странски криминалци.
Албанските власти потврдија дека повеќето нивни државјани, кои годинава биле принудни вратени од Британија, биле осудени за злосторства извршени таму.
Би-би-си разговарал со некои од Албанците вратени дома и дознава дека на некои затвореници им биле понудени 1.500 фунти (околу 1.700 евра) за да си заминат – иако некои од нив планираат веднаш да се вратат.
На некои затвореници им биле понудени пари за да се согласат на депортација и биле ослободени од затвор пред да ја издржат минималната казна според постојната програма за странски престапници.
На еден од депортираните албански затвореници, што Би-би-си го идентификува само како Марк, му била понудена финансиска помош од 1.500 долари за да се врати дома во Албанија според друга програма наречена Програма за олеснето враќање (ФРС).
Документот на британската влада јасно покажува дека програмата е финансиски поттик што им се нуди на странските затвореници под услов да соработуваат при депортацијата и да се откажат од правото на жалба.
Марк бил депортиран според британската Програма за предвремено ослободување (ЕРС), која се однесува на странските затвореници од сите националности.
Минатата година со владиниот Закон за националност и граници се продолжи периодот на предвремено ослободување и дозволува ЕРС од девет месеци на една година. Една од целите на таа промена, според информациите од британското Министерството за внатрешни работи, била да се зголеми бројот на депортации.
Истиот закон го укина статутот на застареност на неиздржани казни, што значи дека затворениците што нелегално се враќаат во Британија ќе мора да го издржат остатокот од казната, без оглед на тоа колку време поминало – засилувајќи го одвраќачкиот фактор за луѓето како Марк.
Албанците може слободно да се движат во земјите како Франција или Белгија, кои нудат лесна отскочна штица за преминување на Ла Манш.
Албанската полиција неодамна ги засили контролите на граничните премини во земјата за да ги улови депортираните од црната листа, кои се обидуваат да се провлечат.
Засилената соработка меѓу Велика Британија и Албанија се совпаѓа со наглото намалување на бројот на Албанци што пристигнуваат на островот со мали чамци – само 29 биле откриени во првите неколку месеци од годинава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Италијанскиот остров го забрани доаѓањето на туристи поради недостиг на вода
![](https://makfax.com.mk/wp-content/uploads/2024/06/kapri-italija-EPA.jpg)
Италијанскиот остров Капри денеска го забрани пристигнувањето на туристи поради недостиг на вода предизвикан од проблеми со снабдувањето од копното.
Градоначалникот на Капри, Паоло Фолко, ја прогласи забраната во седум часот наутро, поради што неколку фериботи веќе на пат кон островот мораа да се вратат назад.
Компанијата задолжена за снабдување на островот со вода објави дека има технички потешкотии во четвртокот, а иако подоцна објави дека ги решила, на Капри се уште му недостасува вода.
„Ситуацијата се влошува“
За време на објавувањето на забраната, Фалко предупреди на вонредна ситуација, велејќи дека иако во петокот имало малку вода на островот, акумулациите се празни.
„Ситуацијата се влошува со пристигнувањето на илјадници туристи секој ден во Капри“, рече тој.
„Забраната останува до понатамошно известување“
Жителите на тој остров во близина на Неапол имаат право на 25 литри вода за пиење по домаќинство, најави градоначалникот.
Забраната за пристигнување на туристи ќе остане на сила до понатамошно известување, додаде тој.
Капри, островот познат по своите бели вили, заливи и врвни хотели, има околу 13 илјади жители.
Европа
Барселона планира да забрани изнајмување станови на туристи
![](https://makfax.com.mk/wp-content/uploads/2021/05/barselona-turisti.jpeg)
Барселона денеска објави дека до 2028 година ќе го забрани издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град.
Левичарскиот градоначалник на градот, Жауме Колбони, рече дека до ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување.
„Се справуваме со она што го сметаме за најголем проблем на Барселона“, рече Колбони на настанот на градската влада.
Краткорочниот бум на изнајмување во Барселона, најпосетуваниот град во Шпанија, остави некои граѓани да не можат да си дозволат кирија откако кириите се зголемија за 68 отсто, а цените на недвижниот имот за 38 отсто во изминатите 10 години, рече тој. Пристапот до домување стана двигател на нееднаквоста, особено за младите луѓе, додаде тој.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката.
„Станува збор за правење сè што е потребно за да се гарантира пристап до прифатливи станови“, објави таа на Икс.
Airbnb, платформата за изнајмување станови, не одговори на барањето за коментар.
„Колбони прави грешка што ќе доведе до сиромаштија и невработеност“, соопшти асоцијацијата за изнајмување на туристички станови во Барселона АПАРТУР, додавајќи дека забраната ќе доведе до зголемување на нелегалните изнајмувања на станови.
Одлуката ќе биде од корист за хотелите. Екстремно левичарската партија која владееше со Барселона од 2015 до 2023 година забрани отворање на нови хотели во најпопуларните области во градот, но Колбони навести дека може да ги ублажи ограничувањата.
Од хотелската асоцијација на Барселона не сакаа да ја коментираат веста.
Тие 10.000 станови ќе ги користат граѓаните или ќе завршат на пазарот под кирија или продажба“, рече градоначалникот.
Локалните власти најавија строги инспекции кога забраната ќе стапи на сила.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување.
Европа
Русија: Треба да разговараме со САД, глобалната безбедност е загрозена, проблемите растат
![](https://makfax.com.mk/wp-content/uploads/2024/06/putin4-1.jpg)
Русија гледа итна потреба од безбедносни разговори со Соединетите Американски Држави, но тие мора да бидат сеопфатни и да го вклучуваат прашањето за Украина, соопшти денеска Кремљ. „Невозможно е да се извлечат поединечни делови од општиот комплекс на акумулирани проблеми, а ние нема да го сториме тоа“, рече портпаролот на Кремљ, Дмитриј Песков, на прашањето дали Москва е подготвена да разговара со Вашингтон за нуклеарните ризици.
„Отворени сме за дијалог, но за широк, сеопфатен дијалог кој ги опфаќа сите димензии, вклучително и сегашната димензија поврзана со конфликтот околу Украина, поврзана со директното учество на САД во овој конфликт“, рече Песков за новинарите. САД ги отфрлаат руските тврдења дека со вооружувањето на Украина станаа директен учесник во војната чија цел е да и се нанесе „стратешки пораз“ на Москва. Вашингтон вели дека какви било преговори за војната се во јурисдикција на Украина.
Руската позиција, како што ја претстави Песков, не е ништо ново, потсетува Ројтерс. Сепак, тој им рече на новинарите дека списокот на теми за кои Русија и САД треба да разговараат се зголемува. „Сè на сè, овој дијалог е многу неопходен. Неопходен е затоа што проблемите се натрупуваат, а има и многу тешкотии поврзани со глобалната безбедносна архитектура“, рече Песков.
Од перспектива на Вашингтон, рускиот претседател Владимир Путин, кој веќе трета година води војна во Украина, е одговорен за умножувањето на безбедносните проблеми.
Оваа недела Путин ја посети Северна Кореја, единствената земја која тестираше нуклеарно оружје во 21 век, и потпиша договор за заемна одбрана со нејзиниот лидер Ким Џонг Ун и рече дека можеби ќе му испрати руско оружје на Пјонгјанг како одговор на западното вооружување на Украина. .
Путин, исто така, во вторникот повтори дека размислува да ја ревидира руската доктрина за употреба на нуклеарно оружје. Најновиот договор за контрола на вооружувањето, кој го ограничува бројот на стратешки нуклеарни боеви глави што Русија и САД можат да ги распоредат, истекува во 2026 година.