Регион
Децата од ОУ „Владислав Рибникар“ не мора да посетуваат настава доколку не се подготвени за тоа, соопштија од Владата на Србија
Децата од ОУ „Владислав Рибникар“ кои не се подготвени да одат на настава не мораат да ја посетуваат, а секое дете и неговите родители во секое време ќе можат да ја сменат таа одлука, стои во најновото соопштение на Министерството за образование на Србија.
Како што е соопштено, ова се препораките:
1. Секое дете кое не се чувствува подготвено не мора да посетува настава
2. Часовите, како и другите облици на поддршка на процесот на учење, се одржуваат исклучиво за деца чии родители изразиле желба за тоа.
3. Секој родител има можност, во секое време, да ја промени одлуката во согласност со моменталните чувства на своето дете.
4. Министерството за образование подготвува предлог за посебен модел на упис во средно училиште за учениците од 8-мо одделение од ОУ Владислав Рибникар, кој најпрво треба да им биде претставен на родителите.
По 19 дена од трагедијата, наставата во белградското основно училиште „Владислав Рибникар“ е обновена од понеделник на 22 мај, потврди за Радио-телевизија на Србија (РТС) Снежана Вуковиќ од Министерството за образование. Во ова училиште наставата беше прекината по 3 мај, кога 13-годишен ученик во напад со огнено оружје уби девет ученици и чуварот. Наставата во наредните денови ќе се одвива со зголемено присуството на полицијата.
Претставничката на српското Министерството посочи дека децата во ова училиште ќе имаат повеќе часови отколку во изминатите две недели, кога децата имаа по два до три часови дневно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.