Регион
Габриел ќе формира бугарска влада со најголемиот непријател на ГЕРБ
![](https://makfax.com.mk/wp-content/uploads/2023/05/Марија-Габриел-и-Николај-Денков.jpg)
Поранешната еврокомесарка Марија Габриел е блиску до формирање нова бугарска влада како дел од сложениот политички договор со главниот непријател на нејзината централно-десничарска партија ГЕРБ – реформистичката партија Продолжуваме со промените (ПП) на поранешниот премиер Кирил Петков, пренесува „Еурактив“.
Според неочекуваниот договор постигнат во понеделникот, двете партии ќе ротираат премиери за период од по девет месеци, а Габриел ќе почне како вицепремиер.
Според договорот меѓу ГЕРБ и ПП, во првите девет месеци премиер би бил поранешниот министер за образование и професор по хемија, Николај Денков, од партијата на Петков, а Габриел како вицепремиер и министер за надворешни работи. Тие потоа би ги смениле улогите по девет месеци.
„Марија Габриел е личноста која може да помогне со некои од најважните приоритети во нашата програма. Немаме подобар наш претставник во европските институции“, изјави Денков, член на Бугарската академија на науките.
Габриел ја напушти работата како бугарски еврокомесар на барање на нејзиниот политички покровител, поранешниот премиер и лидер на ГЕРБ Бојко Борисов, кој ја номинираше за кандидат за премиер на 10 мај.
Изненадувачкиот договор се појави непосредно пред Габриел да се сретне со бугарскиот претседател и да му предаде празна папка, што би значело дека не успеала да обезбеди мнозинство и да формира влада.
Габриел во неделата доживеа уште едно непријатно изненадување откако лидерот на „Има таков народ“, Слави Трифонов, ја повлече својата поддршка за неа.
Но, дури и со поддршка од партијата на Трифонов, на Габриел ѝ недостасуваа уште пет пратеници за да добие мнозинство во парламентот.
Со оглед на тоа што остана само една партија да ја поддржи – мнозински етничко турското Движење за права и слободи (ДПС) – аналитичарите предвидоа дека Бугарија ќе оди на уште едни предвремени избори, по петти пат во две години.
За време на оваа долга криза, политичкиот живот на Бугарија беше обележан со дистанцирањето од ГЕРБ и Борисов, со кои ниту една друга политичка партија не сакаше да влезе во коалиција. Борисов е обвинет дека создал клиентелистички систем на владеење.
Според бугарскиот изборен закон, кога партијата што освоила најмногу гласови не успева да формира влада, претседателот ѝ го дава мандатот на втората партија по големина.
ГЕРБ има 69 пратеници, а ПП имаат 64 пратеници иако би можеле да добијат солидно мнозинство со поддршка од 36-те пратеници на ДПС.
Денков истакна дека новата влада ќе биде посветена на уставните и судските реформи; буџетски дефицит во рамките на прагот од 3% утврден со Пактот за стабилност и раст на ЕУ, кој ѝ овозможува на Софија да притиска за влез во еврозоната; промена на изборниот законик и законски измени за чистење на безбедносните служби од странско влијание.
Според анкетите, големо мнозинство од поддржувачите на ПП отфрлаат коалиција со ГЕРБ. Извори на ЕУРАКТИВ велат дека голем број политичари од ГЕРБ се подеднакво критични кон коалиција со партијата на Петков.
Експертите велат дека ако предложената влада стапи на должност, ова ќе биде голема победа за Борисов, кој ќе избега од политичкта изолација и ќе се врати на власт, иако не како премиер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Во 80-тите, војската на ЈНА се обидела да собори НЛО над Загреб: „Двапати целевме во него, но ни отскокна“, пишува хрватски медиум
![](https://makfax.com.mk/wp-content/uploads/2024/06/zagreb-nlo-jna.jpg)
Следевме неидентификуван летечки објект во областа на Загреб. Алармот се вклучи и стотина од нас излеговме надвор ноќе и погледнавме во необичната светлина на небото. Ова за хрватскиот весник „24сата“ го изјавил Хрват кој во средината на 80-тите служел како офицер во силите за воздушна одбрана на ЈНА.
Тоа било мистерија која и денес го држи буден, бидејќи ниту еден од сведоците од војската никогаш не добил одговор што се случувало на небото над Хрватска таа ноќ.
„За необичната светлина прв ни раскажа војникот кој беше на стража. Не предупредија со сирена, за неколку минути требаше да бидеме спремни за акција. Работеше радарот П18, а воочувањето го потврдивме со таргетскиот радар на ракетниот систем Волхов. Потоа гледав сè на екранот. Се упати кон Загреб. Бевме спремни да пукаме во него“, ја раскажал офицерот приказната и побарал анонимност.
Иако поминале речиси 40 години, разузнавачките служби, наводно, според тврдењата, се обиделе да се погрижат никој никогаш да не зборува за тоа.
„Ракетниот систем Волхов беше распореден за одбрана на Загреб. Бев зад радарот за таргетирање и успеавме двапати да го покриеме. Гледањето на радарот само значеше дека НЛО-то е направено од некој вид метал. Но, секогаш кога ќе го фатевме, тоа буквално ќе скокнеше“, раскажа сведокот, додавајќи дека тоа можел да го направи или поради неговата голема брзина или поради некоја напредна технологија, невидена во тоа време.
„Секогаш кога пукаа во него, како да се огласуваше аларм. Се одбиваше и бегаше. Сè траеше од 15 до 20 минути. Луѓето надвор гледаа во таа светлина. Не би знаел каква форма е. Тоа секако ги надмина границите на денешната технологија“, вели офицерот кој би ги споредил можностите на НЛО со денешниот американски борбен авион Ф-35, само многукратно побрз.
„Во еден момент НЛО само исчезна во празнината на небото. Сето тоа го документиравме, секој момент од борбениот маневар, но следниот ден т.н чувари буквално ја скинаа страницата. Имајте на ум дека овие документи беа означени. Секоја страница беше означена и печатена прецизно за да не се случи тоа, некој да прикрие нешто, а тие едноставно ја искинаа и си заминаа“, изјави сведокот за „24сата“.
Додава дека на сите им забраниле да зборуваат за инцидентот, но тоа било главна тема во мензата, но и на средбите со други војници во тогашна Југославија.
„Не успеаја. Луѓето отидоа во кафулето пред касарната и по две ракии сите дознаа за таа приказна“, се присети офицерот.
Целата сторија на 24сата.
Регион
Огномет од луксузна јахта во Грција предизвика пожар и пеплоса борова шума: туристите ги налутија Грците
![](https://makfax.com.mk/wp-content/uploads/2024/06/jahta-grcija.jpg)
Шумскиот пожар на грчкиот остров Хидра кај Атина избувнал поради огномет испукан од луксузна јахта, соопштија пожарникарите.
За предизвикување на пожарот уапсени се 13 патници од јахтата од која запалиле огномет и предизвикале пожар во Хидра, а бродот е запленет.
Грчките власти го осудија инцидентот кој се случи во екот на туристичката сезона и првиот топлотен бран.
Пожарот што синоќа избувна на туристичкиот остров Хидра, јужно од Атина, е ставен под контрола, соопштија локалните власти. Причина за пожарот, кој ја запали единствената борова шума на тој грчки остров, според грчкиот противпожарен тим, бил огномет кој бил испукан од приватна јахта.
Според грчките медиуми, граѓаните на Казахстан ја изнајмиле јахтата, а властите најавиле апсења поради пожарот. Капетанот на блискиот брод кој бил сведок на инцидентот дал изјава пред властите, пренесе Екатимерини.
Градоначалникот на островот Хидра, Јоргос Кукудакис, го осуди инцидентот, велејќи дека е „навреден што одредени луѓе предизвикуваат пожари на таков неодговорен начин“.
„Во екот на туристичката сезона сме. Секој треба да одговара за своите постапки“ рече Кукудакис.
Оваа вест предизвика негодување и на социјалните мрежи.
„ Богати луѓе со повеќе пари отколку мозок“, рекол еден корисник, пренесува BBC.
На почетокот на годинава Грција ги заостри казните за предизвикување пожари, а на сторителите им се заканува казна затвор до 20 години и парична казна до 200.000 евра.
Регион
Како снема струја на Балканот
![](https://makfax.com.mk/wp-content/uploads/2017/12/404373-od-nevremeto-delovi-od-zemjava-bez-struja-ekipi-na-evn-rabotat-na-teren.jpg)
Невиден колапс на електроенергетскиот систем ги погоди Црна Гора, Босна и Херцеговина, Хрватска и Албанија. Се сомнева дека – во моментот кога кај сите работат клима уредите, а потрошувачката е огромна – некои далноводи испаднале од системот.
Засега нема официјални информации што го предизвикало колапсот на електроенергетскиот систем кој во петокот остави без струја големи делови од четирите балкански држави.
Директорот на Националниот диспечерски центар на електропреносниот систем на Црна Гора, Ранко Реџиќ, вели дека „вакво нарушување не е забележано триесет години“.
„Проблемот беше од регионален размер и зафати големи делови од Црна Гора, Албанија, Босна и Херцеговина и значителен дел од Хрватска. Засега немаме информации што го предизвикало овој настан. Имаше прекин на струја, откажаа некои елементи, во системите во околината и во нашиот систем. Тие елементи ги вративме под напон“, рече Реџиќ и додаде дека се уште се истражува причината, пишува „Дојче Веле“.
Тој се осврна и на информациите дека недостатокот на енергија настанал како последица на голем пожар во близина на 400 kV далновод на непристапен терен на границата меѓу Црна Гора и Босна и Херцеговина.
„Тоа се уште се истражува. Многу е можно тоа да се случило“, рече тој, додавајќи дека Црна Гора се уште нема информации дека причината доаѓа од оваа земја.
„Во моментот кога ќе се формира комисијата и ќе заврши истрагата, ќе знаеме што се случило и како се одвивало се. Засега нема причина да се верува дека причина за колапсот е човечкиот фактор“, заклучи Реџиќ.
Телевизија Н1 ја пренесува изјавата на црногорскиот министер за енергетика Саша Мујовиќ кој вели дека проблемот настанал како „резултат на големото зголемување на дневниот товар и високите температури“.
„Кога ги имате тие два примерока поврзани еден со друг, тогаш имате ситуација да не можете правилно да пренесете струја низ далноводите, односно далноводите се преоптоварени и доаѓа до нивни прекини. Распадот на едниот вод значи преоптоварување на другиот и така се случи ова“, вели Мујовиќ.
Независниот систем-оператор на Босна и Херцеговина соопшти дека причина за прекинот на снабдувањето со електрична енергија е „проблем во преносната мрежа во регионот и преоптоварување на клучните 400 kV интерконективни линии“. Ова резултираше со „каскадно пренесување на нарушувања“ на Електроенергетскиот систем на Босна и Херцеговина.
Поголемиот дел од оваа земја остана без струја, поради што дојде до колапс во сообраќајот во многу градови. Во Сараево, како што пренесуваат тамошните медиуми, неколку луѓе со часови останале заробени во лифтови, додека некои делови од градот останале без вода и тоа во ден кога биле забележани рекордно високи температури.
Прекинот се прошири и во Хрватска, со која Босна и Херцеговина има најголем број меѓусебно поврзувачки далноводи, поради што речиси цела Далмација остана без струја.
„Со оглед на тоа што БиХ, дел од Хрватска, Црна Гора и Албанија испаднаа од целиот напон, се утврдуваат деталите и причините. Нашите служби не утврдија дека има некаков вид на дефект кај нас“, изјави министерот за економија на Хрватска, Анте Шушњар.
Директорот на Секторот за управување со хрватскиот електроенергетски систем Данко Блажевиќ вели дека за овој случај е покрената истрага на европско ниво.
„Дел од работата на операторите на преносните системи е веднаш да реагираат и имавме телеконференција на европско ниво. Се случи несреќен сплет на околности што два далноводи, едниот во Црна Гора, другиот во Албанија, згаснаа за кратко време“, објасни Блажевиќ.
Албанската министерка за енергетика Бељинда Балуку рече дека има дефект на интерконекторот меѓу Албанија и Грција и дека слушнала за слични околности во Црна Гора и делови од Хрватска и Босна и Херцеговина.
„Истрагата ќе потрае, но раните анализи сугерираат дека големи количини на енергија во преносниот систем и многу високи температури го создадоа овој технички проблем“, рече Балуку.
Зборувајќи за тоа како можеше да дојде до ваков колапс, експертот за енергија и поранешен генерален директор на Електропривреда БиХ Амер Јерлагиќ вели дека вакви дефекти на системот се случуваат во лето.
„Веројатно поради голема потрошувачка на енергија имало големо оптоварување, а ако имало дефект, односно дефект на далноводот поради преоптоварување, тогаш тоа се пренесувало низ целиот регион според системот домино ефект“, изјави Јерлагиќ за БХ. Радио 1.
Експертите предупредуваат дека во последните две години побарувачката на струја е зголемена за повеќе од 20 проценти.