Македонија
„Јас гарантирам, поминете, нема да падне“, Гаревски ги охрабри пешаците кои не ја почитуваат забраната за движење на „Беласица“
Иако мостот „Беласица“ кај Транспортен центар веќе дванаесет дена е затворен и за сообраќај и за пешаци по пожарот во кој изгореа инсталациите за парно и се срони дел од бетонот, пешаци и велосипедисти го користат. Се шетаат по мостот, си прават селфиња, проверуваат каде горело…
Утрово оние кои ги игнорираа поставените барикади, на мостот се сретнаа со професорот Михаил Гаревски, директор на Институтот за сеизмички отпорни градби и климатски промени. Иако некои се обидоа да се вратат кога ја забележаа неговата екипа, која ја прави анализата на состојбата по пожарот и на мостот беше дојдена со автомобили, Гаревски им кажа да си поминат.
„Јас гарантирам, безбедно може да се помине пешки, нема да падне мостот“, им рече и ги пропушти.
За дваесетина дена тој најави дека ќе биде готов извештајот што го подготвува за оштетувањата на мостот и за неговата стабилност. Откога ќе биде готов извештајот, врз основа на наодите ќе се одлучи колку време ќе траат поправките.
„Поправки на мостот секако ќе има. Веќе е видливо дека е оштетена горната плоча во должина од пет метри и таа мора да се санира, но тоа ќе се заврши брзо. Доколку има оштетувања на пренапрегањето на мостот, на каблите, тогаш санација не може да се направи за помалку од шест месеци. Доколку нема такви оштетувања ќе се санира само горната плоча и оштетениот бетон каде што бил пожарот до 10-15 јули повторно може да биде вратен во функција“, изјави Гаревски за „Макфакс“.
Мостот изгоре во пожар кој ноќта на 12 мај пламтеше цели четири часа пред пожарникарите да го изгаснат. Изгореа топловодите и нивната изолација и направија видливи оштетувања на бетонот на мостот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).