Кристијан Ериксен објави дека на крајот од сезоната го напушта Манчестер јунајтед, бидејќи се уште не добил понуда за продолжување на договорот.

Данецот има договор со клубот до 30. јуни оваа година, што значи дека на првиот ден од јули ќе може без обесштетување да замине од „Олд Трафорд“.

„Никој ништо не ми кажа, а кога нема такви информации, претпоставувам дека соработката ќе биде прекината. Сите знаат дека договорот ми истекува, па сметам дека има само еден исход“, изјави Ериксен за „ТВ Спорт“.

За „црвените ѓаволи“ досега одиграл 99 настапи, постигна седум гола и 17 асистенции. За време на неговиот престој во Јунајтед, тој го освои ФА Купот (2024) и Лига Купот (2023)

„Се помирив со фактот дека треба да најдам нов клуб. Слободен сум на пазарот и никогаш претходно не сум го доживеал тоа. Бев слободен по срцевиот удар, но тоа беше малку поинаква ситуација”, изјави Ериксен.

Тој рече дека не планира да се врати во татковината ова лето.

„Се уште се чувствувам како да имам неколку добри години во странство. Што се однесува до фудбалот, мислам дека не сум стигнал до точка кога би сакал да се вратам во Данска и да играм во Супер лигата. Моето семејство не сака да патуваме далеку, па затоа нема да играм во МЛС. Ќе видам што ќе биде најдобро за мене и за моето семејство”, заклучи 33-годишниот играч.

Данскиот фудбалер пред Јунајтед настапуваше за Брентфорд, Интер, Тотенхем и Ајакс.

Манчестер сити ќе го пушти Матео Ковачиќ на крајот од сезоната и тој би можел да ја продолжи кариерата во Атлетико Мадрид, кој покажа интерес за него.

Хрватскиот играч за врска е меѓу неколкуте играчи од првиот тим на англискиот шампион кои би можеле да го сменат клубот во летниот преоден рок, пренесуваат англиските медиуми.

Ковачиќ му се приклучи на Сити на почетокот на јули 2023 година во трансфер вреден 29,1 милиони евра од Челзи.

Со клубот „Етихад“ ја освои Премиер лигата, Светското клупско првенство на ФИФА, Суперкупот на УЕФА и Суперкупот на Англија. Тој има одиграно вкупно 33 натпревари за Сити оваа сезона, постига пет гола.

Тренерот на Сити, Пеп Гвардиола планира да го направи тимот повторно конкурентен во Англија и Европа. Дел од овие промени влијае и на Ковачиќ, за кого Сити ќе одреди почетна цена во преговорите со другите клубови од 30 милиони евра. Тој има договор со англискиот клуб за следните две сезони

Се зборува дека Гвардиола веќе нашол играч со кој би сакал да го замени Ковачиќ. Сити ќе се обиде да го ангажира играчот од средниот ред на Аталанта, Едерсон. Тој е играч на Аталанта со искуство со играње за репрезентацијата на Бразил. „Трансфермаркт“ го цени на 50 милиони евра.

Во Европа е од 2022 година кога пристигна во Салернита, а истата година се пресели во Аталанта. За Ла Деа оваа сезона одигра 41 натпревар, со учинок од четири гола и две асистенции.

Италијанската кошаркарска федерација тврди дека е блиску до натурализирање на бекот на Минесота Тимбервулфс, Донте Дивиченцо.

Претседателот на федерацијата Џани Петручи во интервју за „Ла Република“ изјави дека Дивиченцо сака да ја претставува Италија на претстојните натпреварувања.

Очигледно, по завршувањето на сезоната во НБА, тој би дошол во Италија за да ја заврши постапката за добивање пасош.

Селекторот на репрезентацијата Џанмарко Поцеко и Џанлуиџи Датоме наскоро би можеле да отпатуваат во САД за да разговараат со НБА кошаркарот на оваа тема.

Италијанците се обидоа да го натурализираат Паоло Банкеро, но кошаркарот на Орландо го избра дресот на САД.

„Дали се плашам од сличен исход како оној со Банкеро? Не чувствувам одговорност за тоа. Тој ни даде неколку ветувања и на крајот го избра американскиот дрес. Сакаше да се натпреварува на Олимпијадата, но на крајот не замина ни во Париз”, изјави Петручи.

Италијанците неколку пати се обидоа да го убедат Дивиченцо да го облече репрезентативниот дрес, но досега тоа не се случи.

Оваа сезона тој има просек од 11,7 поени, 3,7 скока и 3,8 асистенции, со 40% реализација во шутот за три поени.

Италија ќе учествува на овогодинешниот Евробаскет кој започнува на 27 август.