Герет Саутгејт, селекторот на Англија најави дека речиси сигурно ќе го напушти кормилото на репрезентацијата доколку не ја освои титулата европски првак во Германија.

„Ако не победиме, веројатно повеќе нема да бидам на оваа позиција. Можеби ова е последна шанса. Сигурно половина од тренерите ќе си заминат по ЕП. Таква е нашата работа“, рече Саутгејт.

Саутгејт на клупата на Англија е осум години.

„Доаѓа момент кога веќе не можете да излезете пред јавноста и да кажете дајте ни уште една шанса. Ако сме голем тим и ако сум добар тренер, време е да направиме нешто големо, кога е најважно“, изјави Саутгејт.

Англиската ФА неодамна изрази желба Саутгејт да го води тимот на Светското првенство во САД, Канада и Мексико во 2026 година.

Англија на 16 јуни во недела ќе го одигра првиот натпревар на ЕП против Србија.

Мирослав Клосе, поранешниот германски напаѓач и најдобар стрелец во историјата на светските првенства, во следните две сезони ќе биде тренер на Нинберг.

Клосе кој се повлече од професионалниот фудбал на крајот од сезоната 2015/16, досега беше прв тренер на Алтах во Австрија, но на клупата остана само 24 натпревари.

Работеше и како асистент во Баерн (2020-2021) и самостојно го водеше кадетскиот тим на германскиот великан.

Кариера ја започна во Кајзерслаутерн, а подоцна играше во Германија за Вердер и Баерн, а во Италија играше за Лацио.

Одигра 599 натпревари на највисоко ниво и постигна 230 голови. Во дресот на германската репрезентација одигра 137 натпревари и постигна 71 гол. Во 2014 година со Германија го освои светскиот шампионат.

Тој се уште е најдобар стрелец во историјата на Светските првенства со 16 гола.

Одличниот играч за врска на Аталанта и на холандската репрезентација, Теун Копмајнерс (26), отпадна од списокот за ЕП само пет дена пред првиот натпревар на Холандија.

Причината е бизарна. Пред синоќешниот натпревар против Исланд, Копмајнерс самиот се повредил на загревањето.

Холандскиот фудбалски сојуз штотуку објави дека Копмајнерс мора да го пропушти ЕП, откако синоќа објави дека Френки де Јонг, уште еден одличен играч од средниот ред, исто така, поради повреда ќе го пропушти континеталниот шампионат.

Тоа е огромен удар за Холандија, која сега е во можеби најтешката група на ЕП (Франција, Австрија, Полска) ќе биде без Де Јонг и Копмајнерс, но и Мартен Де Рон и Матс Вифер, кои поради повреди не се најдоа на списокот на Роналд Куман.

Коупмајнерс беше одличен во неодамна завршената сезона. Со 15 гола и 7 асистенции ја предводеше Аталанта до финалето на Купот на Италија, до трофејот во Лига Европа и до четвртото место во Серија А.

Аталанта го купи пред три години од АЗ за 14 милиони евра, а сега Копмајнерс е блиску до трансфер во Јувентус.