Дилема повеќе нема, капитенот на фудбалската репрезентација на Македонија, Енис Барди, се враќа во Шпанија. „АС“, пишува дека Барди ќе ја продолжи кариерата во Ваљадолид, чии сопственик е славниот Бразилец Роналдо.

Енис Барди, пред три дена го раскина договорот со Трабзон, каде што во првиот дел од сезоната одигра само осум натпревари. Во ноември минатата година, Барди и уште тројца играчи, беа отпишани од тренерот Шенол Гунеш.

Откако заврши со Трабзон, Барди реши да се врати во Шпанија каде со голем успех до 2022година играше во Леванте.

Според „АС“, Ваљадолид го победил Еспањол и Леганес во трката за неговиот потпис.

Ваљадолид, синоќа загуби од Еспањол (2:1) и се наоѓа на претпоследното место на табелата со 15 бодови.

Заврши сагата, Хвича Кварацкелија е нов играч на Пари Сен Жермен. Наполи заработи 70 милиони евра плус некои бонуси, а Грузиецот потпиша четири и пол годишен договор за 8,5 милиони евра нето по сезона.

Трансферот на Кварацхелија го обележа зимскиот преоден рок. Клубовите преговараа една недела, Наполи се обиде да извлече повеќе пари, но мораше да попушти кога Кварацхелија јасно кажа дека сака да замине од Неапол.

Наполи и тренерот Антонио Конте сега се во потрага по играч кој ќе го замени Грузиецот. Според медиумите Наполи го сака во тимот Алехандро Гарначо. Де Лаурентис понудил 40 милиони евра за Аргентинецот. Оваа понуда ја одбиле од Манчестер јунајтед.

Легендарниот шкотски фудбалер Денис Ло, најпознат по десетгодишниот период во Манчестер јунајтед, почина во петокот на 84-годишна возраст. Веста ја соопшти неговото семејство, а по фантастичниот напаѓач тагуваат во Манчестер, Велика Британија и светот.

Ло ја започна својата кариера во Хадерсфилд, а помина една сезона во Манчестер сити и Торино, пред да го облече дресот на Манчестер јунајтед. За Јунајтед играше во периодот од 1962 до 1973 година, а пред да замине во пензија уште една сезона играше во Сити.

Секој негов трансфер, освен последниот, уриваше британски рекорди во однос на обештетувањето.

Тој играше 55 пати за Шкотска и постигна 30 гола.

Со Јунајтед освои две првенствени титули (1965 и 1967 година), еден ФА Куп и два Суперкупа, како и првата титула европски првак во 1968 година, иако целата сезона ја одигра повреден. и го пропушти финалето.

За Јунајтед одигра 404 натпревари и постигна 237 гола и е единствениот играч кој има две статуи пред „Олд Трафорд“. Ло е трет стрелец во историјата на славниот клуб.
Меѓу бројните индивидуални награди се издвојува Златната топка во 1964 година.