Македонија
Николоски: Чистењето на криминалот и корупцијата приоритет број еден на новата влада на ВМРО-ДПМНЕ
Потпретседателот на ВМРО-ДПМНЕ, Александар Николоски на денешната трибина во Гевгелија на тема „Борба против корупцијата и криминалот“ од акцијата „Ова е Македонија за сите“, истакна дека чистење на криминалот и корупцијата ќе биде приоритет број еден на новата влада предводена од ВМРО-ДПМНЕ, затоа што сега со оваа власт на СДС и ДУИ, криминалот царува, а корупцијата цвета, што стана причина број еден зошто Македонија назадува.
„Ако поразговарате со луѓето кои си одат од Македонија ќе забележите сериозна разлика од пред 10, 15, 20 или 30 години со тие кои тогаш си оделе од државата. Ако тогаш број еден причина биле економските услови, сега број еден причина е како што вели народот дека нема ред. Нема ред е кажано она што го зборуваме денес, дека криминалот царува, а корупцијата цвета“, рече Николоски.
Спомена три клучни работи кои се штетни во моментов, како што рече првата ја гледаме по македонските улици секаде околу нас и директно ги погодува идните генерации, односно кокаин на македонските улици има како никогаш претходно.
„Цените се така ниски и е така достапен, да за средношколец или за студент станува подостапно да набави кокаин отколку да отиде на театарска претстава или кино. Тоа е тажната реалност. Како никогаш порано дрогата царува по македонските улици, локали и пред се е кокаинот. Тоа не може да е така доколку нема одобрение од највисоките структури на власта пред се МВР и Царинската управа, затоа што толкава количина на дрога по улиците некој го внесува и некој замижува истиот да се продава. Јавна тајна е дека вработени во МВР се главни организатори и дилери на трговијата со наркотици, пред се кокаинот. А се спречува едноставно доколку има волја и желба, а тоа нема затоа што министерот го гледаме со главните дилери. Не треба да не чуди кога среде Скопје се случуваат мафијашки убиства, крвни освети, затоа што се потекнува од системот“, изјави Николоски.
Тој прашува како е возможно лице со мерка притвор да му биде заменета со мерка домашен притвор и да избега и наводно да изврши убиство, а истото лице да биде убиено?
„Втората тема која сакам да ја споменам е корупцијата и злоупотребите во власта. Свесни сте сите дека нема функционер на СДСМ од најниско ниво, од обичен раководител завршувајќи со премиер кој не злоупотребува. Аферите на дневна основа еруптираат и за истите ние зборуваме во јавноста. Треба да зборуваме за иднината, а таа ќе биде предводена од влада предводена од ВМРО-ДПМНЕ, одговорност ќе има за конечно да се стави ред и да се воспостави функционален систем на владеење на правото. Мора да се направат темелни истраги за злоупотребите кои овие 6 години се направени, пред се во финансискиот дел, да се види текот на парите и се што е возможно да се врати во државниот буџет, а на тој начин кај граѓаните“, истакна Николоски.
Посочи дека корупцијата цвета на дневна основа, предводници се Ковачевски, Артан Груби, Али Ахмети, пајташите на Ковачевски во СДСМ од Зечевиќ па се надолу, тоа е врвот на корупцијата. Процентите во Македонија стана добро утро, за да се заврши работа се плаќа мито, и тоа отворено го бараат.
„Трета работа се европските интеграции. Јас со години зборувам и стојам позади тоа дека Македонија дури и да почне преговори ќе ги заврши после само 6 месеци со нова блокада, но таа блокада ќе е заради високото ниво на криминал и корупција. Се додека Македонија не воспостави функционален систем на владеење на правото, 5-6 поголеми земји на ЕУ нема да дозволат Македонија да оди напред, затоа што нема политичар во Европа кој сака од другата страна да седи си корумпиран политичар, нема политичар во Европа кој сака да седи со премиер чија сопруга влегува во фотоволтаичен бизнис или да го види Артан Груби кој стана главен за мито и корупција“, изјави Николоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пожарникарите извлекоа паднат човек во реката Драгор
Регионалниот ЦУК Битола информира дека пожарникарите од ТППЕ Битола од 18.45 до 19.35 часот, со четири пожарникари и едно противпожарно возило интервенирале на извлекување паднат човек во река Драгор кај месноста „Сали Мост“.
Паднатото лице не било повредено.
Од ЦУК апелираат за голема внимателност при појава на локалните нагли метео промени, да се избегнува движење во засеци во природата, суводолици и многу блиску до речни корита… и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја, внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови.
Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.
Македонија
Променливо облачно со повремени локални врнежи од дожд
Времето денеска ќе биде променливо облачно со повремени локални врнежи од дожд. Попладне на повеќе места ќе биде нестабилно со пороен дожд и грмежи локално во форма на краткотрајно невреме со интензивен пороен дожд, силен ветер и изолирана појава на град. Минималната температура ќе биде во интервал од 12 до 16, а максималната ќе достигне од 22 до 27 степени.
Во Скопје променливо облачно со повремен дожд. Попладне во делови од котлината ќе биде нестабилно со пороен дожд, грмежи и услови за појава на краткотрајно невреме. Минималната температура ќе се спушти до 16, а максималната ќе достигне до 26 степени.
До среда ќе се задржи нестабилно време, претежно во попладневните часови со локален пороен дожд и грмежи. Наместа ќе има услови процесите да бидат поинтензивни во форма на краткотрајно невреме, со засилен ветер, обилен пороен дожд за кратко време и изолирана појава на град. Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Скопје
Делови од три скопски општини денеска без струја
Според добиеното известување од ЕВН Македонија, Регионалниот центар за управување со кризи информира дека поради реконструкција денеска без снабдување со електрична енергија ќе останат делови од три скопски општини.
Во периодот од 09:00 до 15:00 часот без напојување ќе останат корисниците на дел од село Долно Лисиче, реонот околу чаталот, ул.10 во општина Аеродром.
Во периодот од 10:30 до 14:30 часот без напојување ќе останат корисниците дел од улица 16, на патот кон Визбегово во општина Карпош.
Во периодот од 13:00 до 14:30 часот без напојување ќе останат објектите на градинката Росица, на улица Мечкин Камен, број 45А. во општина Ѓорче Петров.