Култура
Министерките Костадиновска-Стојчевска и Гојковиќ: Културата преку „Отворен Балкан“ покажува дека Балканот е Европа
Во рамки на посетата на Белград, министерката за култура Бисера Костадиновска-Стојчевска, имаше работна средба со потпретседателката на Владата на Република Србија и министерка за култура, Маја Гојковиќ.
Средбата помина во пријателска атмосфера, а главни теми на разговор беа активностите поврзани со темелните вредности дефинирани во Иницијативата „Отворен Балакан“.
Беа истакнaти досегашните позитвни заеднички активности на театрите и на националните оперски и балетски куќи на двете земји, а се зборуваше и за големиот настан планиран за ова лето, за афирмација на културата во рамките на „Отворен Балкан“, во Европа.
„Трите земји од „Отворен Балкан“ сме соединети во голема изложба која ќе биде отворена летово во Париз, во српскиот културен центар. Овој проект е ново искуство за нашата основна соработка која има цел да помогне во мобилноста на културата и уметноста, во отворањето заеднички фондови, во размената на информации и искуства, да внесе иновативност и да ги обединиме нашите потенцијали. Со заеднички проекти ги зацврстуваме сопствените капацитети и градиме мостови на соработка во регионот. Оваа изложба во Париз е голем предизвик за сите, зашто ќе ги претстави културите на трите земји поеднечно, но ќе ја претстави балканската уметност и како целина, што ќе предизвика многу посилен ефект во европската заедница, ќе ја афирмира нашата сплотеност, заедништво, нашата заедничка визија и вредности кои ги споделуваме како балкански, но и европски земји“, рече министерката за култура Костадиновска-Стојчевска.
На средбата министерките за култура разговараа и за конкретните активности кои следат пред официјалното отворање на културно-информативниот центар на Северна Македонија во Белград.
Министерката Костадиновска-Стојчевска додаде: „Од огромна помош се нашите културно-информативни центри – нашиот центар во Тирана навистина покажува одлични резултати во промоцијата на македонската и балканската култура во Албанија – очекувам наскоро да се радуваме и на новоотворен македонски културен центар во Белград“.
Гојковиќ и Костадиновска-Стојчевска разговараа за конкретните активности по успехот на гостувањата на белградската „Жизел“ во Скопје, и на „Севилскиот берберин“ од НОБ во Белград, најавеното гостување на балетот „Госпоѓиците од Авињон“, македонско издание на реномираниот музички фестивал ЕГЗИТ кое се одржа во Струмица и за кое годинава се подготвува второ издание.
„Верувам дека по овој пример ќе развиеме соработки и на полето на филмот, на полето на театарот, и на полето на фестивалите – нашиот Балкан има и артисти, и продукции, и традиција, и дух и пасија да извезува уметност. Преку уметноста и културата со ваквите иницијативи веќе сме докажале дека Балканот е Европа“, вели Костадиновска-Стојчевска по работната средба со Маја Гојковиќ, потпретседателка на Владата и министерка за култура на Република Србија.
Основата на соработката во областа на културата меѓу Северна Македонија, Србија и Албанија беше поставена на Самитот на „Отворен Балкан“ во Охрид, во мај минатата година кога министерките за култура на трите држави потпишаа меморандум за соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Видик“ – нов фестивал за литература и општа култура
Скопје следниов период станува побогато со нова низа книжевни, музички, театарски и мултимедијални настани.
Почнува „Видик“ – нов фестивал, кој ќе се одржува од 16 мај до 16 јуни, во организација на „Литература.мк“.
Цел месец ќе уживаме во убава и динамична атмосфера во амбиентот на „Литература.мк“, која ќе комбинира литературни промоции, изложби, концерти и театарски изведби и ќе ги задоволи разновидните вкусови и интереси.
Прегледајте ја целата програма и придружете ни се!
ПР
Култура
Македонка Божиновска е лауреат за „Антево слово“ за 2024 година
Меѓународната поетска манифестација „Анџело Ла Векија“ (Il Parnaso – Concorso di Poesia – Premio Angelo La Vecchia), во соработка со Здружението за развој на културата и заштита на културното наследство „Контекст – Струмица“ (Kontext), годинава седми пат ја доделува наградата за најдобра необјавена поетска творба „Антево слово“ („Антево слово3), специјална награда на фестивалот утврдена во чест на великанот на македонската поезија – Анте Поповски.
Меѓу учесниците, освен поети од Македонија, имаше автори и од Англија, Албанија, Бугарија, Тунис и Кипар, а во поширокиот избор влегоа: Ристо Маџунков, Ана Бунтевска, Дарко Лешоски, Соња Карбева, Милчо Мисоски, Елизабета Дончевка-Лушин, Љубица Шопова, Јулијана Младеновска-Тешија, Елизабета Бандиловска, Маја Апостолова, Ирена Павлова де Одорико и Марија Чокалова.
Жири-комисијата во состав: Митко Гогов (претседател), Виолета Танчева-Златева, Драгана Евтимова, Жорж Поповски (членови) и Геро Ла Векија (надворешен соработник), по пристигнати стотина песни, едногласно одлучи да ѝ ја додели првата награда на Македонка Божиновска за песната „Криенка“.
1. Македонка Божиновска – КРИЕНКА
2. Милена Сиљаноска – АКО ИМАМ УШТЕ ЕДЕН ЧАС СО ТЕБЕ
Александра Спасеска – „ИМАЛО ДЕНОВИ
3. Рекија Фебио (Италија) – ЌЕ ЧЕКОРИШ
Антева Темјана (псевдоним) – ОРЕВОТ
Млад автор:
Васја Мицковски – ЗА ПЛАШЛИВИТЕ
ОБРАЗЛОЖЕНИЕ:
Во својата кратка, но ефектна песна „Криенка“, Македонка Божиновска ни ја открива целата филозофија на човекувањето. Симплифицирана во изразот, со само неколку слики од детството, ни открива панорама на сеќавања, колективна носталгија, но и суштински светоглед, кој ја одразува длабочината на авторското восприемање на реалноста.
Првата строфа е блескава слика на актуелната состојба на современиот човек, неговиот зазор од Другиот и обидот да се скрие во својата лушпа. Но, дури и кога мисли дека нашол добар заслон, сепак сенката го издава и останува видлив и изложен во светот. Издигнувајќи се над другите во животот, освојувајќи високо место во хиерархијата на она што го нарекуваме успех, човекот сфаќа дека и покрај достигнатите височини, останува „најдолу од сите созданија“.
Стихови што говорат за минливоста, за непостојноста, невидливоста и за кревкоста на единката, преиспитувањето на индивидуална позиционираност во системот на животните вредности. И тоа е мигот кога човек би требало да сфати дека секој од нас е само капка во морето на животот и дека вистинскиот успех се мери со нешто друго – со загледувањето во себе и со победа над возгордеаноста и над потребата за издвојување. Само во дослух со своето божествено битие сме вистински заштитени од злините на светот и само од него можеме да црпиме сили за да ги надвиеме нив и да ги прифатиме различностите. А вистинското издигнување е можно само преку сознанието (росната капка), кое е способно да ни го исчисти и избистри духот за вистинско човекување, за слевање со сите созданија на светот.
Култура
Втор концерт на Влатко Стефановски и Мирослав Тадиќ во Македонската филхармонија
По распродавањето на првиот концерт на Влатко Стефановски и Мирослав Тадиќ по повод 20 години од издавањето на aлбумот „Трета мајка“, закажан е и втор концерт за сите оние што не успеаја да набават влезници, и тоа на 2 јуни, во Македонската филхармонија, со почеток од 20.30 часот, објави организаторот.
На 1 и 2 јуни македонската публика ќе има ексклузивна шанса по навистина долго време, во интимна атмосфера како онаа во Македонската филхармонија, да ужива во изведбата на албумот „Трета мајка“, „Крушево“ и сето друго што го имаат подготвено големите мајстори на гитарата, Влатко Стефановски и Мирослав Тадиќ.
Воедно, ексклузивно во Македонската филхармонија на 1 и 2 јуни ќе имате и ексклузивна шанса да си го купите својот примерок од изданието „Трета мајка“ на винил, потпишано од страна на Влатко Стефановски и Мирослав Тадиќ!
Влезниците за вториот концерт ќе бидат пуштени во продажба од среда (15 мај) во 9 наутро онлајн на ticketx и во продажната мрежа на ticketx во Македонија по цена од 1.500 и 1.990 денари.