Регион
Работеше градежништво до април годинава, не спомна дека некого во селото мрази, сведочи најдобриот пријател на убиецот од Младеновац
Урош Блажиќ (21), по вештачењето во Специјалната затворска болница во Белград, е префрлен во притвор во Смедерево, а според судска наредба вчера, нему и на неговите татко и вујко им е забрането да располагаат со имотот. Блажиќ е осомничен за смртта на 9 и за ранувањето 13 лица во масакрот кај Младеновац и Смедерево. Досега се сослушани повеќе од 50 сведоци, а меѓу нив е и најдобриот пријател на Урош, кој го видел само десет дена пред злосторството.
„Се сретнавме во Белград на кафе. Разговаравме за сè и сешто. Тој беше во добро расположение. Најмногу ми раскажуваше како е во Германија. Работел градежништво од јануари до април годинава. Никогаш не ми спомна дека некој во селото го мрази. Тој ги осуди сите форми на насилство и луѓето што пијат и земаат опијати. Јас сум негов најдобар пријател од раѓање и не можев да верувам што направи“, со овие зборови сведочеше најдобриот пријател на Урош во Вишото јавно обвинителство во Смедерево.
На распитот сведокот рекол дека Блажиќ е „задоволен од својот живот“. Во ниту еден момент од приказната и однесувањето на Урош не можел да заклучи дека ќе направи таков масакр.
Родителите на убиените и ранетите во масакрот кај Младеновац беа сослушани во Вишото јавно обвинителство во Смедерево, сведоци на злосторството, таксистот, но и мајката на Урош Блажиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.
Регион
Под сомнение за планирање терористички напад уапсено е малолетно девојче од Црна Гора
Во Австрија е уапсено четиринаесетгодишно девојче од Црна Гора, кое, според австриските медиуми планирало терористички напад на Јакоминиплац во Грац, а истражителите од Државната служба за државна безбедност и борба против екстремизмот во Штаерска успеале да спречат тоа.
При претресот на куќата, како што пишува истиот медиум истражителите заплениле секира и нож.
Информациите за планираниот напад дојдоа од Европска безбедносна управа. На овој начин, локалните истражители од Државниот завод за државна безбедност и борба против екстремизмот (ЛСЕ) на Штаерска им влегле во трага на првично непознатите лица.