Македонија
Амандманите за уставните измени заглавија во Владата, Ковачевски не сака да брза
Амандманите за уставните измени заглавија во Владата. Две недели откако премиерот Димитар Ковачевски посочи дека тие не се доставени бидејќи се подготвуваат, сега посочува дека не треба да се брза. Дали се подготвени – не даде конкретен одговор. Објасни дека за овој процес треба да има широка дебата.
„Тоа не е процес што треба да се брза. Тоа е процес што треба да помине една широка општествена дебата. Затоа со министерот за правда и со министерот за евроинтеграции имавме средби со невладини организации. Имав средба и со политичките партии, меѓу кои и со Христијан Мицкоски, кои прифатија уставни измени. Затоа сметам дека треба да се даде простор за тој процес кај нив да се усогласи и да се приклучат кон процесот на уставните измени“, рече Ковачевски.
Ја коментира и посетата на Мицкоски на Брисел, од каде што лидерот на опозицијата посочи дека нема да поддржат уставни измени.
„Мицкоски беше во Брисел и гледам дека планот што го изложуваше веќе го нема. И дека сега зборуваат каков план ќе направеле кога тие ќе дошле. На граѓаните им требаат политичари со решенија, а не политичари што блокираат. И затоа сметам дека опозицијата треба да се вклучи во овој процес. Ова не е процес на еден човек, туку широк процес“, посочи Ковачевски.
Со доставување на амандманите во Собранието почнуваат да течат роковите за отворање на Уставот и спроведување на измените.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).
Македонија
Сиљановска Давкова – Павловски: Максимално да се искористат сите можности за економски развој на земјава
Претседателката Гордана Сиљановска Давкова остварила средба со Крис Павловски, директор на водечката светска компанија за дигитални платформи Рамбл, кој е во посета на земјата во рамките на конференцијата Македонија 2025.
На средбата, како што соопшти претседателскиот кабинет, Павловски ја претставил работата на Рамбл, компанија која котира на индексот Наздак на берзата во Њујорк, со нејзината етаблирана видео платформа и е во подем во дејноста на развојот на дигиталната инфраструктура и клауд услугите.
Како водечки претприемач со македонско потекло, Павловски изнел мислења за состојбата во дигиталниот сектор, за трендовите и перспективите кои може да се искористат.
Претседателката Сиљановска Давкова го информирала Павловски за нејзината иницијатива за развивање на соработката со македонската дијаспора, со цел максимално да се искористат сите можности за економски развој на земјава.