Македонија
Грковска – Матуела: Мора да се искористи новиот момент во проширувањето на ЕУ
Во рамките на работната посета на Брисел заменичката на претседателот на Владата задолжена за политики за добро владеење, Славица Грковска, денеска се сретна со Микела Матуела, вршителка на должноста директор за Западен Балкан во Генералниот директорат за соседство и преговори за проширување на Европската комисија. Разговорот се фокусира на прашањето на уставните измени и динамиката со која се одвива реформскиот процес во Северна Македонија и особено на важноста да се искористи новиот момент во проширувањето на Унијата. Матуела нагласи дека полноправното членство на Северна Македонија е заедничка цел и дека Европската комисија продолжува со целосна поддршка на нашата земја.
Поаѓајќи од улогата на координатор на антикорупциските институции во државата, вицепремиерката Грковска оцени дека клучен проблем е состојбата во правосудството затоа што двојните стандарди и неказнивоста ја продлабочуваат недовербата во системот и оневозможуваат поголем исчекор во борбата со корупцијата и владеењето на правото. На средбата се разговараше и за последните настани во Судскиот совет, но и за можните начини како да се подобри севкупната состојба во правосудниот систем преку постојните законски инструменти за јакнење на интегритетот
Грковска одржа состанок и со Марк Јорна, скрининг-координаторот за Северна Македонија и експерт за Западен Балкан во Генералниот директорат за соседство и преговори за проширување на Европската комисија. Се разговараше за чекорите што Владата ги презема во насока на исполнување на стратешките цели на државата. Соговорниците се согласија дека проблемите со Бугарија мора да се надминат бидејќи никој нема бенефит од нарушените меѓусоседски односи, а уставните измени не носат суштински измени во Уставот, кој секако забранува дискриминација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бесплатен ќе биде јавниот градски превоз денес по 18 часот
ЈСП Скопје ги информира граѓаните дека поради oвогодинешното издание на „Бела ноќ“, кое денеска (сабота, 5 октомври 2024) ќе се одржи на повеќе централни локации низ градот Скопје, во периодот од 18:00 часот од 2:00 по полноќ превозот на патниците во јавниот градски превоз ќе биде бесплатен.
Македонија
Бебе почина на Клиниката за детски болести во Скопје
Рано утринава на Клиниката за детски болести во Клиничкиот центар „Мајка Тереза“ во Скопје, почина 14-месечно девојче. Околу 04.50 часот на Детската клиника во Клинички центар „Мајка Тереза“, (В.С.) 29-годишен маж од село Гошинце и неговиот брат, оштетиле инвентар во болницата откако починало детето на В.С., информира МВР.
Бебето било донесено со Итна медицинска помош во болницата околу 03.45 часот, а причините за смртта дополнително ќе се утврдуваат.
„Денеска (05.10.2024) во СВР Скопје е пријавено дека околу 04.50 часот на Детската клиника во Клинички центар ‘Мајка Тереза’ В.С. (29) од с. Гошинце и неговиот брат Б.С. (35) од с. Гошинце оштетиле инвентар во болницата откако починала едногодишната ќерка на В.С., која, според пријавеното, била донесена со Итна медицинска помош во болницата околу 03.45 часот. Се преземаат мерки за расчистување на настанот“, велат од МВР.
Македонија
Поплави во Тетово, над 20 повици за помош добиле пожарникарите
Над 20 повици добиле ноќеска пожарникарите од Тетово за интервенци и испумпување на вода од поплавени куќи, дворови, подруми и улици. Најголем дел од поплавените куќи се во селата Мала Речица и Голема Речица. Интензивниот дожд траеше повеќе часа, а претпладнево нема врнежи.
Силниот и интензивен дожд што вчера попладнево и вечерва ја зафати Општина Тетово е причина за зголемување на бројот на повици до пожарникарите од страна на луѓе кои имаат потреба од нивна интервенција. Пожарникарите во текот на вчерашниот ден извлекуваа и неколку возила кои заглавиле кај поплавените подвозници.
Пред две недели, на 20 септември, силен дожд предизвика делумно поплавување на улици, дворови и куќи во градот како и во Мала Речица.