Денес попладне и во текот на ноќта, во западните, а утре во источните делови ќе има повремени врнежи од дожд, наместа пообилни од над 15 литри на метар квадратен.

Во сабота ќе има услови за локална појава на нестабилност со пороен дожд, грмежи и засилен ветер.

Во недела ќе има брз продор на студена воздушна маса од север и ќе има врнежи од дожд, на планините и на повисоките места од снег. Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места. Во понеделник наместа ќе има провејување на слаб снег, а утринските температури на повеќе места ќе бидат негативни.

Потоа следува период на стабилно и постудено време со утрински температури кои насекаде ќе бидат по нула.

Во Скопје, попладне и во текот на ноќта ќе има врнежи од дожд, во делови од котлината повремено пообилни (10 – 15 л/м2). Утре ќе се задржи променливо облачно време со повремен дожд. Во сабота ќе има преодно стабилизирање на времето, а во недела ќе биде претежно облачно, ветровито и студено со повремени врнежи од дожд. Во вечерните часови во повисоките делови од котлината ќе има услови за повремен слаб снег

Министерот за внатрешни работи, Панче Тошковски, и утрово порача дека неселективно ќе се бори против криминалците и кога тие доаѓаат од редовите на Министерството за внатрешни работи, но не кажа како документите класифицирани како службена тајна завршиле кај обезбедувачот на премиерот Христијан Мицкоски. Одговарајќи на новинарски прашања по обраќањето на дебатата  „Безбедноста на пешаците – одговорност на сите нас“, министерот Тошковски најави дека ќе сподели детали кога ќе заврши истрагата.

„Во овој момент не би сакал да откривам детали од истрагата. Кога ќе ги имаме потребните информации и кога ќе можеме, ќе ги споделиме“, кусо одговори министерот Тошковски на прашањето како обезбедувачот дошол до документите кои ги користел за изнуда.

Тошковски потврди дека е вознемирен од случајот исто како и останатите припадници на МВР.

„Сите во МВР се вознемирени кога гледаат дека некој криминалец се прикривал со униформа без разлика дали таа униформа е свечена, дали е тактичка или униформа која ја носат припадниците на одделот за обезбедување имот и лица“, рече министерот Тошковски.

Кривичната пријава против обезбедувачот на премиерот за Тошковски е иста како и кривичните пријави кои во минатото биле поднесувани против криминалците од редовите на МВР. Одделот за внатрешна контрола по добиените информации за случајот во рамки на спроведувањето на истрагата веднаш известил надлежен јавен обвинител, кој пак уште истата вечер издал наредби да се преземат дејствија.

Обезбедувачот на премиерот за 50.000 евра откривал полициски службени тајни од истрага. Обвинителството извести дека тој на 30 март годинава, на паркинг на паркинг пред хотел во Велес се сретнал со сведок во постапка и му покажал документи на МВР кои се службена тајна. Обвинителството побара, а судот прифати 30 – дневен притвор за обезбедувачот.

Во првите два дена од април продолжувајќи со засилените сообраќајни контроли на патиштата низ земјава, полициските службеници од сите сектори за внатрешни работи издале вкупно 1.296 платни налози за сторени прекршоци од страна на учесниците во сообраќајот, информира Министерството за внатрешни работи.

Притоа, заради неправилно паркирање евидентирани се 393 прекршоци, 196 за возење со брзина поголема од дозволената, потоа изречена е 101 мерка за управување на возило без возачка дозвола и дури 199 санкции за прекршоци што ги сториле пешаци.

Покрај ова детектирани се 72 учесници во сообраќајот кои што не користеле сигурносен појас, шест возачи на мотоцикл кои не носеле заштитна кацига, 32 санкции се изречени за користење мобилен телефон при возење, додека пак 16 возачи се отстранети од сообраќај поради возење под дејство на алкохол, а изречени се осум мерки за минување на црвено светло.

По однос пак на Законот за возила од сообраќај се отстранети 38 возила од кои 14 поради техничка неисправност, а 24 затоа што биле не регистрирани.

„Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, велат од МВР.