Економија
Синдикатот од Владата побара зголемување на платите во јавниот сектор за 14,2 проценти

Синдикатите бараат 14,2 проценти да се зголемат платите во јавниот сектор и да се исплати регрес за годишен одмор.
Како што истакна претседателот на Сојузот на синдикатите, Слободан Трендафилов, по средбата во Владата, тоа што охрабрува е дека има поместување од Министерството за финансии и од Владата во поглед на нивните предлози и забелешки.
Сојузот на синдикатите смета дека со предлогот што го претставиле денеска ќе се надминат сите состојби и проблеми од изминатиот период, кои биле наталожени.
„Прифатлив е моделот од две и пол години за да добиеме методологија како во делот на минималната плата, со тоа што ќе имаме просечна плата по коефициент на сложеност по истекот на две и пол години“, рече Трендафилов.
ССМ смета дека ако од септември се случи тоа, да почне примената на општиот колективен договор за јавниот сектор, функционерските плати ќе треба да се вратат пред одлуката на Уставниот суд и зголемувањето на платите да биде како за нив така и за работниците.
Синдикатите предложиле инфлацијата, која минатата година беше 14,5 проценти, да биде основен параметар со кој ќе се зголемат платите на вработените во јавниот сектор, од најниската категорија на работно место до највисоката, претседателот на државата и сите да добијат процентуално зголемување на платите.
Трендафилов по средбата објасни дека дискусијата се одвивала во насока на тоа дали да се земе како параметар зголемувањето на минималната плата од 12,55 или, пак, колку што е зголемена просечната плата – 10,9 проценти.
В среда, како што најави, продолжуваат состаноците во Министерството за финансии, каде што ќе бидат претседателите на сите синдикати во Македонија, и во најтесен круг ќе разговараат за можното решение.
„Решението мора да важи за сите еднакво. Не можеме ние како претставници на работниците да дозволиме 78 проценти зголемените плати на функционерите да се зголемат за дополнителен процент. Нема да дозволиме функционерските плати дополнително да растат на ваков начин. Синдикатите се едногласни по прашањето, нема таков човек, нема таков синдикалец што ќе потпише општ колективен договор на нивна штета. Предлогот е да се утврди на кој начин ќе пораснат платите. Ако се случи во септември, сите вработени во државата треба да знаат за колкав процент ќе им порасне платата. Нашето барање е 14,2 проценти да се зголемат платите во јавниот сектор и да се исплати регрес за годишен одмор во целиот јавен сектор“, додаде Слободан Трендафилов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.