На прашањето дали го променил својот став за предавањето на источниот регион Донбас по денешните разговори, украинскиот претседател Володимир Зеленски рече дека не го променил.

„Мојот став не се променил бидејќи се заснова на украинскиот устав, а украинскиот устав не се променил“, истакна тој.

„Не може да се дискутира за никакви прашања што се однесуваат на територијалниот интегритет на нашата земја без почитување на нашиот народ, волјата на нашиот народ и украинскиот устав“, додаде тој.

Во воведот на своето обраќање, Зеленски му се заблагодари на германскиот канцелар Фридрих Мерц за денешното гостопримство и за поширокиот придонес на Германија кон безбедноста на Украина.

Тој рече дека сите лидери што се сретнаа денес ја изразија својата желба за „мир во Украина, мир во Европа“. Тие се согласија за низа принципи пред средбата меѓу Доналд Трамп и Владимир Путин во петок и нагласија: „Она што ја загрижува Украина мора да се разговара со Украина“.

Зеленски рече дека Трамп поддржува прекин на огнот и безбедносни гаранции за Украина, додавајќи: „Русија не треба да има вето врз изгледите на Украина за членство во НАТО“.

„Треба да има заеднички притисок врз Русија, треба да има санкции и јасна порака дека ако Русија не се согласи на прекин на огнот во Алјаска, овој принцип мора да се примени“, рече тој.

Тој рече дека им рекол на Трамп и на европските лидери дека „Путин блефира – се обидува да напредува по целата фронтова линија“ и дека блефирал и кога тврдел дека санкциите не влијаат врз него. „Всушност, санкциите се многу ефикасни и ѝ штетат на руската воена економија“, рече Зеленски.

Тој додаде дека на состанокот јасно ставил до знаење дека „Путин не сака мир – сака да ја окупира нашата земја“ и повика на санкции од САД и Европа, кои ги гледа како клучна алатка за „запирање на војната на Путин“.

За состанокот меѓу Трамп и Путин, тој рече: „Се надеваме дека централната тема ќе биде прекин на огнот. Американскиот претседател го кажа тоа неколку пати. Ми предложи, по состанокот во Алјаска, веднаш да стапиме во контакт, да ги разговараме резултатите – доколку ги има – и да се договориме за понатамошни чекори“.

фото: принтскрин

Можноста, американскиот претседател Доналд Трамп самиот да седне со Владимир Путин, предизвика нервоза кај европските лидери.

Иако Трамп јавно покажа поддршка за Украина во последните недели, европските престолнини стравуваат дека Путин, поранешен шпион на КГБ, би можел да го убеди да ја прифати неговата верзија за решение на конфликтот.

Откако беше објавено дека самитот во Алјаска ќе се одржи в петок, европските лидери се обидуваа повторно да разговараат со Трамп и да ги пренесат своите ставови. Сега кога успеаја, тие се фокусираат на три клучни пораки:

Прво, Русија мора да се согласи на прекин на огнот пред да може да се дискутира за какви било територијални прашања. Украина и нејзините сојузници веруваат дека Москва не може да се сфати сериозно во мировните преговори додека секојдневно бомбардира украински градови и се обидува да заземе повеќе територија.

Второ, не смее да има одлука за Украина без Украина. Тие се грижат дека ако Киев не е на преговарачката маса, предмет на трговија. Европските лидери јасно ставија до знаење дека договор не е можен без директно учество на украинското раководство.

Трето, Украина нема да прифати територијална размена. Иако постојат различни верзии за наводните услови на Путин за крај на војната, повеќето вклучуваат барање Украина да се повлече од делови од регионот Донецк што сè уште ги држи, евентуално во замена за руско повлекување од други области. За Киев и Европа, наградувањето на Русија со територија што не успеа да ја земе со сила е целосно неприфатливо.

На прес-конференцијата во понеделникот, Трамп рече дека сака да ги чуе европските предлози, така што кога ќе се сретне со Путин во Алјаска, „ќе влезе во тоа целосно подготвен“. Европа сега се надева дека американскиот претседател ќе се држи до таа изјава.

Макрон: Трамп сака да постигне прекин на огнот во Украина за време на средбата со Путин
Според Ројтерс, францускиот претседател Емануел Макрон изјавил дека американскиот претседател Доналд Трамп им рекол на европските лидери дека „сака да постигне прекин на огнот во Украина за време на средбата со Путин“.

Фото: принтскрин

Германскиот канцелар Фридрих Мерц изјави по разговорите со американскиот претседател Доналд Трамп дека прекинот на огнот мора да биде првиот чекор кон траен мировен договор.

Тој го нагласи европскиот принцип дека „границите не смеат да се менуваат со насилство“ и дека сите дискусии за територијата треба да се водат во контекст на постојната фронтова линија. Тој додаде дека европските партнери сакаат да обезбедат „силни безбедносни гаранции за Украина“.

„Стратегијата се заснова на поддршка на Украина и вршење притисок врз Русија. Доколку нема напредок од руска страна во Алјаска, САД и Европејците мора да го зголемат притисокот“, рече Мерц.

Според него, Трамп „во голема мера се согласува“ со европската позиција и го опиша разговорот како „многу добар и конструктивен“. Тој оптимистички заклучи: „Постои надеж дека нешто се придвижува. Постои надеж дека мирот би можел да дојде во Украина“.

Отворајќи ја својата изјава, Мерц рече дека европските лидери се решени да помогнат самитот меѓу Трамп и Путин, кој ќе се одржи во Алјаска во петок, да биде успешен. „Ние Европејците правиме сè што можеме за да ги насочиме подготовките за овој состанок во вистинската насока“, рече тој, додавајќи дека украинскиот претседател Володимир Зеленски бил вклучен во подготовките од самиот почеток.

Фото: принтскрин