Регион
Капачи во Хрватска добиле висока температура и дијареја, експертите велат: откривме случаи на опасен вирус
![](https://makfax.com.mk/wp-content/uploads/2023/07/plaza-1.jpg)
Дали ротавирусот се шири на местата за капење во западниот дел на Задар? Деновиве, на социјалните мрежи се појавија информации за необична инфекција меѓу луѓето што се капеле во областа Борик.
Повеќето пациенти имаат симптоми на цревни вируси, како треска, дијареја или повраќање. Некои велат дека циркулира стомачен вирус, а други тврдат дека болестите се предизвикани од фекален исцедок во морето.
Зошто се шират шпекулации дека капачите во песочниот залив на Борик и блиската плажа кон Дикл се разбудиле со цревни проблеми и каков е квалитетот на морето на тие места, новинарите од „Слободна Далмација“ го прашаа Бенито Пучар, менаџер на служба за здравје, екологија и заштита на животната средина при Институтот за јавно здравје во Задар (ЗЈЗЗ).
Тој потврди дека неколкупати во последните петнаесетина дена, поради појавата на информациите дека некои луѓе имаат симптоми на вироза, го тестирале квалитетот на морето.
„Редовното испитување на квалитетот на морето беше извршено на 21 јуни. Тогаш резултатите покажаа дека морето кај хотелот „Донат“ е од втор степен на квалитет, а во заливот, каде што е песочната плажа, е од прв степен на квалитет. Други примероци се земени на 26 јуни на барање на управата на блискиот хотел, која повторно побарала тестирање бидејќи имало информации дека неколку лица што се капеле на тие плажи имале симптоми на вирусот, како треска, дијареја и повраќање. Покрај редовните индикатори, кои вообичаено ги тестираме во морето, а тоа се ешерихија коли и цревни ентерококи, додадовме и тест за златна стафилокока, која може да предизвика повраќање“, рече Пуцар и додаде дека покрај редовната процедура на земање примероци од морето, кои се земаат на 30 сантиметри, но каде што морето е длабоко еден метар, побарал земање мостри и во плиткото.
„Не ја најдовме бактеријата стафилококус ауреус, а вториот тест за квалитет на морето покажа спротивна ситуација на 21 јуни. Морето кај хотелот ‘Донат’ беше прв степен на квалитет, а во заливот на песочната плажа беше втор степен на квалитет“, рече Пучар додавајќи дека на почетокот на јули повторно имале пријави дека се појавила зараза во хотелот.
„Тогаш лицата што имаа симптоми дадоа примероци од столицата за анализа и беше потврден еден случај на ротавирус. Во договор со нашата Епидемиолошка служба и ХЗЈЗ решивме да испратиме морски примероци од тие две места на 5 јули со цел да се обидеме да го изолираме ротавирусот од нив. Но, воопшто не сме сигурни дали такво нешто ќе биде возможно бидејќи тоа не е вообичаена процедура. Заедно со примероците од морето испративме и примероци од базенот на блискиот хотел“, рече Пучар и додаде дека лицата со симптоми на ротавирус треба да се обратат во Епидемиолошката служба на ЗЈЗЗ за да може да направат анкета меѓу пациентите и да дознаат што ги поврзува луѓето што се разболеле.
Директорот на Службата за епидемиологија, д-р Алан Медиќ, рече дека пред една недела имало поединечни пријави за гастроентероколитис, чии симптоми се дијареја и повраќање кај деца, а некои од тие деца пливале на плажата во Борик.
Медиќ нагласи и дека проблемот е што многу луѓе не носат примероци од столицата за анализа, туку повраќањето и дијарејата ги припишуваат на летниот вирус.
„Епидемиолошката служба издвои два случаја на заболени од ротавирус, еден кај возрасен, кој престојувал во хотелот, и еден кај дете, кое не било гостин во хотелот. Појавата на ротавирус во детството е честа, а повеќето деца, над 90 отсто од нив, ја преболуваат оваа форма на вирусот за ден-два, па родителите не носат примероци од столицата за анализа. Кога детето ќе добие ротавирус, најважното нешто на кое треба да внимавате е да не дехидрира“, рече д-р Медиќ и додаде дека ротавирусот е донекаде незгоден бидејќи има голем епидемиолошки потенцијал, но и дека досега не е забележан случај да се пренесе по море.
„Ротавирусот останува во околината и до неколку дена, можно е случајот со капење на песочна плажа да бил таков што вирусот останал на песокот, но кога вирусот трае само еден или два дена, повторувам, луѓето го прават тоа – не носат примероци од столицата за анализа и не сме во можност да го потврдиме развојот на болеста, односно причинско-последичната врска. Во литературата има само случаи кога овој вирус може да се пренесе во водата во базените, но никаде не е забележан пренос на ротавирус по море бидејќи вирусите во морето се разредуваат поради високата концентрација на сол. Но, таа песочна плажа е мала и на неа престојуваат голем број деца, па појавата на вирусот, како и на други места, каде што голем број деца престојуваат на едно место, односно во колективи, како игралишта и градинки, не е невообичаено. Ротавирусот може да остане на песокот што не го однел морето, децата може да си разменат играчки на плажа, може да се пренесе и преку воздухот, а болеста да ја развијат неколку луѓе“, истакнува д-р Медиќ, кој исто така советува да не се носат деца, особено оние кои што се со намален имунитет, на преполните плажи.
Поради појава на ротавирус во Борик, блискиот хотелски комплекс бил посетен од Државниот инспекторат, кој за ваквата состојба бил алармиран од Задарскиот институт за јавно здравје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Силен земјотрес го погоди Крит
![](https://makfax.com.mk/wp-content/uploads/2024/02/krit-830x0.jpg)
Земјотрес со јачина од 4,1 го погоди денеска грчкиот остров Крит, соопшти Европскиот медитерански сеизмолошки институт (EMSC).
Земјотресот бил на длабочина од 8 километри, додава EMSC.
Епицентарот на земјотресот бил на 64 километри југоисточно од најголемиот град на Крит, Ираклион.
Засега нема информации за евентуална материјална штета.
Регион
Завршено сослушувањето на новите сведоци во истрагата за убиството на малата Данка
![](https://makfax.com.mk/wp-content/uploads/2024/03/devojche-1.jpg)
Денеска, заврши сослушувањето на новите сведоци во истрагата за убиството на двегодишното девојче Данка Илиќ кога на прашања пред Вишото јавно обвинителство во Заечар, покрај брачниот пар Трајковиќ од Бањско Поле, одговараше Далибор Јовиќ.
Пред обвинителот вкупно три часа зборуваа тројца сведоци, а цело време беа присутни осомничениот и родителите на убиеното девојче.
Имено, веднаш по излегувањето од рочиштето, Јовиќ на насобраните новинари им порача дека не смее да каже ништо за да не ја загрози истрагата.
„За целта на истрагата не смееме да кажеме што му кажавме на јавниот обвинител. Останувам на мојот исказ што го дадов во полиција“, нагласи Јовиќ пред медиумите пред зградата на Обвинителството во Заечар.
Јовиќ рече и дека првпат се среќава лице в лице со осомничените за убиството на Данка, Срѓан Јанковиќ и Дејан Драгијевиќ, но дека и претходно бил сослушан во полициска станица.
„Пред неколку месеци веќе бев сослушан во полициска станица, а сега го кажав истото како и тогаш, џогирав, но ништо конкретно не видов“, изјави овој сведок.
Покрај него, сослушана е и брачната двојка Трајковиќ, кои истакнаа дека сè уште стојат зад зборовите што ги кажале претходно кога станува збор за страшното злосторство.
Тие во еден глас, како што пренесуваат српските медиуми, кажале дека остануваат на првичните изјави – дека во тој момент биле зад куќата и дека ништо ниту виделе ниту слушнале.
Регион
Експлозија во Загреб, разбојници разнеле банкомат
![](https://makfax.com.mk/wp-content/uploads/2024/07/hgfh-1.jpg)
Непознати разбојници разнеле банкомат во загрепски Бузин. Полицијата го блокирала патот.
„Утрово, поминував покрај бензинската пумпа и видов дежурна полиција во близина на банкоматот. Некој го разнел во текот на ноќта“, изјавил жител на Загреб за „24 сата.хр“.
Станува збор за банкомат што се наоѓа во непосредна близина на бензинската пумпа на аголот на авенијата Вечеслава Хољевац и улицата Бани.
Полицијата веднаш излегла на терен со четири возила.
Отпадоци имало насекаде, а засега нема информации колку пари успеале да украдат.